ប្រមុខរដ្ឋាភិបាល អំពាវនាវមិនឲ្យបន្ថោកតម្លៃស្រូវរបស់កសិករ

ជាតិ

សេដ្ឋកិច្ច

ប្រមុខរដ្ឋាភិបាល អំពាវនាវមិនឲ្យបន្ថោកតម្លៃស្រូវរបស់កសិករ

11, Dec 2019 , 9:39 pm

រូបភាព

ដោយ:

ភ្នំពេញ៖ ខណៈដែលការប្រមូលផលស្រូវកំពុងមមាញឹកក្នុងរដូវនេះ ប្រមុខរដ្ឋាភិបាលបានអំពាវនាវដល់រោងម៉ាស៊ីនកិនស្រូវ និងឈ្មួញ កុំបន្ទាបតម្លៃស្រូវរបស់កសិករ។ ការអំពាវនាវរបស់សម្ដេចបែបនេះ ធ្វើឡើងក្នុងពិធីប្រគល់សញ្ញាបត្រជូននិស្សិតសាកលវិទ្យាល័យឯកទេសនៃកម្ពុជា នៅថ្ងៃទី១១ខែធ្នូនេះ។

ប្រសាសន៍សម្ដេច ហ៊ុន សែន ៖

ប្រមុខរដ្ឋាភិបាលបានលើកឡើងដូច្នេះថា៖«យើងយល់ហើយពីក្រឹត្យក្រមសេដ្ឋកិច្ច មានតម្រូវការច្រើនការផ្គត់ផ្គង់តិចអាហ្នឹងឡើងថ្លៃ មានតម្រូវការតិចតែមានការផ្គត់ផ្គង់ច្រើនគឺចុះថ្លៃ ប៉ុន្តែខ្ញុំសូមអំពាវនាវដល់ម៉ាស៊ីនកិនស្រូវ កន្លែងស្តុកស្រូវដែលទទួលទិញពីកសិករ សុំកុំបង្អាប់ថ្លៃស្រូវរបស់ប្រជាជន»។

អត្ថបទទាក់ទង

ធនាគារអភិវឌ្ឍន៍ជនបទ ប្រកាសទុន ៥០លានដុល្លារ សម្រាប់ការទិញស្រូវពីកសិករ

វិស័យស្រូវអង្ករ ត្រូវការថវិកាខ្ទង់រយលានដុល្លារបន្ថែម ដើម្បីប្រមូលទិញពីកសិករ

ក្នុងពេលថ្មីៗនេះ រដ្ឋាភិបាលបានបញ្ចេញថវិកា៥០លានដុល្លារ សម្រាប់ផ្ដល់ឥណទានដល់រោងម៉ាស៊ីនកិនស្រូវ តាមរយៈធនាគារអភិវឌ្ឍន៍ជនបទ ដើម្បីប្រមូលទិញ និងរក្សាស្ថិរភាពថ្លៃស្រូវកសិករ។ ក្នុងពិធីខាងលើនេះដែរ សម្ដេចនាយករដ្ឋមន្ត្រីបានហាមមិនឲ្យយកកម្ចីពីកញ្ចប់ថវិកា៥០លានដុល្លារនេះ ទៅបន្ទាបថ្លៃស្រូវកសិករ។ សម្ដេចគូសបញ្ជាក់ដូច្នេះថា៖«រដ្ឋាភិបាលបានបញ្ចេញ ៥០លានដុល្លារ ដើម្បីជួយឲ្យម៉ាស៊ីនស្រូវ ប៉ុន្តែសូមអស់លោកយល់ មិនមែនយក៥០លានដុល្លារទៅច្របាច់កប្រជាជនសម្រាប់ទម្លាក់ថ្លៃនោះទេ»។

ពេលនេះជារដូវដែលកសិករកំពុងប្រមូលផលស្រូវ ហើយបានហូរចូលទីផ្សារច្រើន តែស្រូវបានធ្លាក់ថ្លៃ។ នេះបើតាមសម្ដេច ហ៊ុន សែន ។

ក្នុងរយៈពេល១១ខែឆ្នាំ២០១៩ កម្ពុជាបាននាំចេញអង្ករ ៥១ម៉ឺនតោន កើន ៣,៤ភាគរយ។ អង្ករទាំងនេះត្រូវបាននាំចេញទៅទីផ្សារអន្តរជាតិជិត៦០ប្រទេស ដែលចិនឈរនៅលំដាប់ទី១ គឺទំហំ ២០,៥ម៉ឺនតោន នាំមុខសហគមន៍អឺរ៉ុបដែលមានត្រឹម ១៧,៤ម៉ឺនតោន។ ក្នុងឆ្នាំ២០១៩នេះ កម្ពុជាកំពុងអនុវត្តកូតានាំចេញ ៣០ម៉ឺនតោនដែលប្រទេសចិនផ្ដល់ឲ្យ ហើយថ្មីៗនេះប្រទេសចិនបានអនុវត្តឲ្យក្រុមហ៊ុន១៨ទៀតដែលសរុប៤៤ក្រុមហ៊ុនហើយ ក្នុងបញ្ជីនាំចេញអង្ករទៅចិន។ ក្រៅពីអង្ករ កម្ពុជាបាននាំចេញស្រូវក្រៅផ្លូវការ ១,៩លានតោនទៅប្រទេសជិតខាង ក្នុងរយៈពេល១១ខែ។ នេះបើតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ៕