អន្តរជាតិ
×![]()
សហរដ្ឋអាមេរិក នឹងទទួលបានកងកម្លាំងអវកាសថ្មីមួយជាមួយកញ្ចប់ថវិកាការពារជាតិ ៧៣៨ពាន់លានដុល្លារ ក្រោមកិច្ចព្រមព្រៀងមួយដែលទទួលបានគាំទ្រពីសំណាក់អ្នកតាក់តែងច្បាប់ នៅថ្ងៃអង្គារ ១០ ធ្នូ ។ ការសម្រេចនេះ គឺបំពេញបំណងរបស់ប្រធានាធិបតី ដូណាល់ ត្រាំ។
ការចំណាយប្រចាំឆ្នាំ២០២០ក្នុង «ច្បាប់ការពារជាតិ» គឺកើនឡើងចំនួន២២ពាន់លានដុល្លារ បើធៀបនឹងឆ្នាំ២០១៩ ស្មើនឹង ៧១៦ពាន់លានដុល្លារ។ កញ្ចប់ថវិកាដ៏ច្រើនសម្បើមនេះ នឹងយកទៅចំណាយលើសកម្មភាពយោធាជាច្រើន។ វា ក៏នឹងបង្កើតទីបញ្ជាការកម្លាំងអវកាស ដែលទទួលបន្ទុកកិច្ចការលំហអាកាសផងដែរ។
តាមពិតទៅ លោក ត្រាំ ចង់បង្កើតអង្គភាពអវកាសមួយដែលមានឋានៈស្មើកងទ័ពជើងគោក ជើងអាកាស ជើងទឹក ម៉ារីន និងកងឆ្មាំការពារឆ្នេរ។ យ៉ាងណាមិញ គោលដៅនេះ រងការជំទាស់ពិសេសលើរចនាសម្ព័ន្ធអង្គភាពថ្មីតែម្ដង។ ក្រោមច្បាប់ថវិកាឆ្នាំ២០២០ ទីបញ្ជាការអវកាសថ្មី នឹងស្ថិតក្រោមកងទ័ពជើងអាកាស។
សំណើច្បាប់ ទទួលបានការអនុម័តពីសំណាក់អ្នកតាក់តែងច្បាប់មកពីបក្សសាធារណរដ្ឋនិងប្រជាធិបតេយ្យ ទាំងក្នុងគណៈកម្មាធិការនីតិបញ្ញត្តិរបស់សភាតំណាងនិងព្រឹទ្ធសភា ហើយទំនងជាអាចឆ្លងកាត់សភា (Congress)។ សំណើច្បាប់នេះ ដែលសភាចាំបាច់ត្រូវអនុម័យរៀងរាល់ឆ្នាំ ប្រគល់លុយ ៦៣៥ពាន់លានដុល្លារទៅកាន់មន្ទីរបញ្ចកោណ ហើយ២៣,១ពាន់លានដុល្លារផ្សេងទៀតទៅដល់ក្រសួងថាមពលសម្រាប់ការថែទាំនិងជួសជុលឃ្លាំងអាវុធនុយក្លេអ៊ែរ និងប្រេងឥន្ធនៈ។
តាមការចុះផ្សាយរបស់ទីភ្នាក់ងារព័ត៌មាន AFP ប្រតិបត្តិការយោធាក្នុងបណ្តាប្រទេស ដូចជា អាហ្វហ្គានីស្ថាន ស៊ីរី និងសូម៉ាលី ទទួលបាន ៧១,៥ពាន់លានដុល្លារ ខណៈសំណើច្បាប់នេះ ក៏ដំឡើងប្រាក់បៀវត្ស៣,១ភាគរយសម្រាប់កងទ័ពផងដែរ ដែលជាអត្រាខ្ពស់បំផុតក្នុង១០ឆ្នាំចុងក្រោយ។ ទន្ទឹមនេះ កញ្ចប់ថវិកាជាតិថ្មីនេះ ក៏នឹងផ្តល់៥,៣ពាន់លានដុល្លារជួសជុលមូលដ្ឋានទ័ពអាមេរិកក្នុងករណីជួបគ្រោះធម្មជាតិក្នុងរដ្ឋ Florida និង North Carolina ដែលត្រូវបំផ្លាញដោយព្យុះ Hurricans កាលពីឆ្នាំមុន។
តួលេខនេះ នៅមានកម្រិតទាបជាងសំណើ៩,២ពាន់លានដុល្លាររបស់សេតវិមានអាមេរិក ដែលចង់យកលុយនេះទៅផ្គត់ផ្គង់ការសាងសង់ជញ្ជាំងនៅតាមព្រំប្រទេសម៉ិកស៊ីក ដែលលោកត្រាំចាត់ទុកថាជារឿងចាំបាច់ដើម្បីទប់ស្កាត់ការធ្វើអន្តោប្រវេសន៍ខុសច្បាប់ពីម៉ិកស៊ីក។ ចំណែក នៅក្នុងសំណើច្បាប់នេះ អ្នកតាក់តែងច្បាប់អាមេរិក ក៏បានបញ្ចូលលក្ខខណ្ឌខ្លះ ដែលគ្រប់គ្រងការប្រើប្រាស់ថវិការបស់មន្ទីរបញ្ចកោណ រួមមាន ការរារាំងលើការកាត់បន្ថយចំនួនកងទ័ពដែលឈរលើទឹកដីកូរ៉េខាងត្បូង និងការបញ្ជូនយន្តហោះចម្បាំងទំនើបផុតលេខ F-35 ទៅកាន់តួកគី ជាដើម។
Tag:
សហរដ្ឋអាមេរិក
កងកម្លាំងអវកាស
© រក្សាសិទ្ធិដោយ thmeythmey.com
