ជាតិ
សម្ដេច ហ៊ុន សែន ប៉ងវាយកូនហ្គោលជាមួយលោក ត្រាំ នៅអាមេរិក
× ភ្នំពេញ៖ នាយករដ្ឋមន្ត្រី ហ៊ុន សែន គ្រោងវាយកូនហ្គោលជាមួយលោក ដូណាល់ ត្រាំ ក្រោយកិច្ចប្រជុំរវាងអាមេរិក-អាស៊ាន នៅអាមេរិក នាឆ្នាំ២០២០ខាងមុខ។ សម្ដេច ហ៊ុន សែន ថ្លែងបែបនេះ នៅក្នុងពិធីចែកសញ្ញាបត្រដល់និស្សិត សាកលវិទ្យាល័យឯកទេសនៃកម្ពុជា (CUS) នាព្រឹក ថ្ងៃទី១១ ធ្នូ។
«ខ្ញុំត្រៀមប្រដាប់វាយកូនហ្គោលទៅហើយ ព្រោះលោក ត្រាំ ពូកែវាយកូនហ្គោល។ ចង់មិនចង់ ខ្ញុំវាយកូនហ្គោលឱ្យបាន»។ នេះជាការបញ្ជាក់របស់សម្ដេច ហ៊ុន សែន ដែលឆ្លើយតបបែបចំអក ទៅអ្នករិះគន់លោកថា អាមេរិកកំពុងដាក់សម្ពាធមកលើរដ្ឋាភិបាលកម្ពុជា។
ដោយមិនទាន់អស់ចិត្ត ប្រមុខរដ្ឋាភិបាល បានអះអាងបន្ថែមថា រដ្ឋាភិបាលអាមេរិក គ្មានហេតុផលអ្វីមកសង្កត់«ក» សម្ដេចឡើយ ខណៈប្រទេសទាំងពីរកំពុងពង្រឹងទំនាក់ទំនងគ្នា តាមរយៈសេចក្តីថ្លែងការណ៍ប្រកាសពីជំហរភាគីទាំងសងខាង ទៅវិញទៅមក កាលពីពេលថ្មីៗនេះ ។ «អញទៅលេងកូនហ្គោលជាមួយ ត្រាំ ។ អញទៅប្រជុំជាមួយ ត្រាំ ។ រឿងអី ត្រាំ មកសង្កត់«ក» ហ៊ុន សែន»។ នេះជាការលើកឡើងរបស់លោកនាយករដ្ឋមន្ត្រី ដែលចង់សាកថ្វីដៃវាយកូនហ្គោលជាមួយប្រធានាធិបតីអាមេរិក ដូណាល់ ត្រាំ ក្រោយឮដំណឹងពីនាយករដ្ឋមន្ត្រីជប៉ុន ស៊ិនហ្ស៊ូ អាបេ ថា លោក ត្រាំ ពូកែវាយកូនហ្គោល។
កាលពីរសៀលទី២១ ខែវិច្ឆិកា ឆ្នាំ២០១៩ ប្រធានាធិបតីអាមេរិក បានបញ្ជូនលិខិតចំនួនពីរច្បាប់មកសម្ដេចនាយករដ្ឋមន្ត្រី ហ៊ុន សែន តាមរយៈលោក W. Patrick Murphy ឯកអគ្គរដ្ឋទូតអាមេរិកប្រចាំកម្ពុជា។ ក្នុងលិខិតទី១ គឺអាមេរិក និយាយពីការពង្រឹងទំនាក់ទំនងរវាងកម្ពុជានិងអាមេរិក។ ជាពិសេសគាំទ្រដល់កម្ពុជា និងគោរពអធិបតេយ្យភាពរបស់កម្ពុជា រួមទាំងមិនគាំទ្រឲ្យមានការផ្លាស់ប្តូររបបនៅកម្ពុជាឡើយ។ ដ្បិតលោក ត្រាំ លើកឡើងបែបនេះក្តី ប៉ុន្តែក្នុងលិខិតនោះ ក៏បានតំលេចឃ្លា ដែលលោក ត្រាំ ជំរុញឱ្យលោកនាយករដ្ឋមន្ត្រី ហ៊ុន សែន នាំនាវាកម្ពុជា ឆ្ពោះទៅកាន់ប្រជាធិបតេយ្យដែរ។
ដោយឡែកលិខិតទីពីរ គឺលោក ដូណាល់ ត្រាំ អញ្ជើញសម្តេចនាយករដ្ឋមន្ត្រី ទៅចូលរួមប្រជុំកំពូលរវាងអាមេរិក និងអាស៊ាន ដែលរៀបចំលើទឹកដីអាមេរិក នៅឆ្នាំ២០២០។ សម្ដេច ហ៊ុន សែន យល់ព្រមតាមលិខិតរបស់ប្រធានាធិបតីអាមេរិកនេះ៕
Tag:
ហ៊ុន សែន
ដូណាល់ ត្រាំ
អាស៊ាន
© រក្សាសិទ្ធិដោយ thmeythmey.com