អន្តរជាតិ
រូបភាព៖ Koreaherald
×![]()
ដោយ: ធៀន ភារិន្ទ
អាមេរិក នៅថ្ងៃទី១១ ខែធ្នូ បានប្រគល់មូលដ្ឋានយោធាចំនួន៤របស់ខ្លួន ឲ្យកូរ៉េខាងត្បូងត្រលប់មកវិញ បន្ទាប់ពីមានការពន្យារពេលយ៉ាងយូរ។ ការពន្យារពេលនេះ ដោយសារតែទីតាំងយោធាទាំងនោះ ត្រូវការសម្អាតជាមុនសិន ដើម្បីប្រាកដថា វាគ្មានបញ្ហាបរិស្ថាន ឬមេរោគផ្សេងៗ។ 
ប្រសិនបើគ្មានការប្រែប្រួលទេ អាមេរិក នឹងប្រគល់មូលដ្ឋានយោធារបស់ខ្លួនចំនួន ៤ ឲ្យមកកូរ៉េខាងត្បូងគ្រប់គ្រងវិញ។ មូលដ្ឋានយោធាទាំង៤នោះ មានដូចជា បន្ទាយ Camps Eagle និង Long, Camp Market, Camp Hovey ជាដើម។ ទីតាំងទាំងនោះមានចម្ងាយឆ្ងាយបំផុតត្រឹមតែ ១៣០គីឡូម៉ែត្រប៉ុណ្ណោះ ពីទីក្រុងសេអ៊ូល។ បន្ទាយទាំងនេះ បានបិទដំណើរការចន្លោះឆ្នាំ២០០៩ និងឆ្នាំ២០១១ ។
តាមរយៈកិច្ចប្រជុំរួមគ្នាលើកទី ២០០ ដែលធ្វើឡើង ក្រោមកិច្ចព្រមព្រៀងស្តីពីកម្លាំងយោធា ភាគីអាមេរិក និងកូរ៉េខាងត្បូង បានបង្កើតកិច្ចព្រមព្រៀងមួយ ដែលអនុញ្ញាតឲ្យអាមេរិក ប្រគល់មូលដ្ឋានទ័ពមកកូរ៉េខាងត្បូងវិញ។
បើតាមកិច្ចព្រមព្រៀងមួយនេះ អាមេរិក បានយល់ព្រមប្រគល់មូលដ្ឋានយោធា ឲ្យកូរ៉េខាងត្បូងវិញ ដោយភ្ជាប់ជាមួយលក្ខខណ្ឌ។ ក្នុងលក្ខខណ្ឌនេះ ភាគីទាំងសងខាងនៅតែផ្តល់កិច្ចពិភាក្សាគ្នាទៅវិញទៅមក ដើម្បីឆ្លើយតបទៅនឹងការសម្អាតបរិស្ថានក្នុងមូលដ្ឋានយោធាទាំងនោះ។ បានសេចក្តីថាភាគីអាមេរិក និងកូរ៉េខាងត្បូង នឹងដោះដូរយោបល់គ្នា ពាក់ព័ន្ធទៅនឹងការធ្វើបន្សុទ្ធខ្សល់ និងបញ្ហាបរិស្ថាន នៅក្នុងបន្ទាយយោធា។
នៅពេលទទួលបាន កូរ៉េខាងត្បូង នឹងសំអាតមូលដ្ឋានយោធាទាំងនោះ ដើម្បីទុកទីតាំងទាំង៤នេះ សម្រាប់លក់ ឬទុកជាសម្បត្តិរបស់រដ្ឋ ឬសម្រាប់ជាមូលដ្ឋានយោធា។ ការធ្វើនេះ គឺដើម្បីប្រាកដថា ទីតាំងទាំងនោះមិនមានបញ្ហាបរិស្ថាន ឬបញ្ហាកខ្វក់ផ្សេងៗ។
ពាក់ព័ន្ធទៅនឹងមូលដ្ឋានយោធានេះ អ្នកអង្កេតមួយចំនួនរំពឹងថា ទីក្រុងសេអ៊ូល អាចពិភាក្សាការចំណាយលើការសម្អាតជាមួយទីក្រុងវ៉ាស៊ីនតោន ប៉ុន្តែការណ៍នេះ អាចត្រូវបានអាមេរិក បដិសេធ ដោយផ្អែកថា យោធាអាមេរិកគ្មានបញ្ហាសុខភាពទេ។
ដោយសារតែការឈ្លានពានរបស់កូរ៉េខាងជើង នៅក្នុងឆ្នាំ១៩៥០ អាមេរិក បាននាំយោធារបស់ខ្លួនមកការពារកូរ៉េខាងត្បូង ដែលស្ថិតក្រោមសមត្ថកិច្ចរបស់ក្រុមប្រឹក្សាសន្តិសុខអង្គការសហប្រជាជាតិ។ អំឡុងពេលសង្គ្រាមមួយនេះ អាមេរិកបានដាក់ទ័ពប្រមាណជា ៣២ម៉ឺននាក់ នៅលើទឹកដីកូរ៉េខាងត្បូង។ បន្ទាប់ពីសង្គ្រាមបានបញ្ចប់ អាមេរិកបានរក្សាទ័ពជិត៣ម៉ឺននាក់ នៅលើទឹកដីមួយនេះ។
បច្ចុប្បន្ន អាមេរិក មានបន្ទាយធំពីរនៅកូរ៉េខាងត្បូង។ បន្ទាយមួយនៅ Pyeongtaek ចម្ងាយប្រមាណ៧០គីឡូម៉ែត្រពីរដ្ឋធានីសេអ៊ូល និងមួយទៀតនៅទីក្រុង Daegu ដើម្បីការពារសម្ព័ន្ធមិត្តរបស់ខ្លួនប្រឈមមុខការគំរាមកំហែងរបស់កូរ៉េខាងជើង៕
Tag:
អាមេរិក
កូរ៉េខាងត្បូង
© រក្សាសិទ្ធិដោយ thmeythmey.com
