ក្លិបបាល់ទាត់ក្រសួងការពារជាតិ(ទ័ព)នៅថ្ងៃទី១១ ខែធ្នូ ឆ្នាំ២០១៩ ប្រកាសចែកផ្លូវជាមួយកីឡាករ ឈិន ឈឿន, ច្រឹង ពលរដ្ឋ និងកីឡាករបរទេស៣រូបផ្សេងទៀត។ មុនការប្រកាសរបស់ទ័ពមួយថ្ងៃ ក្លិបព្រះខ័នរាជស្វាយរៀង បានប្រកាសស្វាគមន៍ការចូលរួមរបស់ខ្សែបម្រើ ឈិន ឈឿន សម្រាប់រដូវកាលក្រោយផងដែរ។
បើតាមកីឡាករ ឈិន ឈឿន រូបគេបានចំណាយពេល១៥ឆ្នាំរួមរស់ជាមួយក្រសួងការពារជាតិ។ កីឡាកររូបនេះបានចូលប្រឡូកក្នុងវិស័យកីឡាបាល់ទាត់ដំបូងដោយធ្វើជាយុវជនថ្នាលរបស់ក្លិបនេះ។ បន្ទាប់មកកីឡាករវ័យ៣០ឆ្នាំរូបនេះត្រូវបានដំឡើងឲ្យមកលេងក្នុងក្រុមឈុតធំនៅឆ្នាំ២០១០ រហូតដល់ឆ្នាំ២០១៩។
ក្រោយប្រឡូកបាន១ឆ្នាំ ឈិន ឈឿន ត្រូវបានកោះហៅឲ្យចូលរួមជាមួយក្រុមជម្រើសជាតិអាយុក្រោម២២ឆ្នាំ, ២៣ឆ្នាំ និងក្រុមជម្រើសជាតនៅឆ្នាំ២០១១។ កីឡាកររូបនេះ បានបង្ហាញខ្លួនជាមួយក្រុមជម្រើសជាតិអាយុក្រោម២២ឆ្នាំបានចំនួន៦លើក និងរកបានមួយគ្រាប់ និងបានបង្ហាញខ្លួនជាមួយក្រុម U23 បានចំនួន១៥លើកដោយរកបាន៣គ្រាប់។ កីឡាករមកពីខេត្តព្រៃវែងរូបនេះបានបង្ហាញខ្លួនក្នុងក្រុមជម្រើសជាតិបានចំនួន៥៥លើក ដោយរកបាន៤គ្រាប់។
កីឡាករ ឈិន ឈឿន នឹងជួយក្លិបបាល់ទាត់ព្រះខ័នរាជស្វាយរៀងប្រជែងដណ្តើមជើងឯកពានរង្វាន់លីគកំពូល និងពានរង្វាន់សម្តេច ហ៊ុន សែន នៅរដូវកាលក្រោយពីឆ្នាំ២០២០-២០២១។ នេះបើយោងតាមក្លិបព្រះខ័នរាជស្វាយរៀងប្រកាសលើទំព័រហ្វេសប៊ុកខ្លួនកាលពីថ្ងៃទី១០ ធ្នូ ឆ្នាំ២០១៩។
ចំណែកកីឡាករ ច្រឹង ពលរដ្ឋ ក៏រីកធំធាត់ផ្នែកវិស័យកីឡាបាល់ទាត់ជាមួយក្លិបក្រសួងការពារជាតិដែរ ដោយរូបគេធ្វើជាយុវជនថ្នាលរបស់ក្លិបនេះពីឆ្នាំ២០០៨-២០១០។ បន្ទាប់មករូបគេផ្លាស់ទៅចូលរួមជាមួយក្លិបព្រះខ័នរាជស្វាយរៀងពីឆ្នាំ២០១០-២០១៣ មុនផ្ទេរទៅរួមរស់ជាមួយក្លិបត្រាយអាស៊ីភ្នំពេញ(អង្គរថាយហ្គឺរ)ពីឆ្នាំ២០១៣-២០១៥។
ក្រោយចំណាយពេលរួមរស់ជាមួយត្រាយអាស៊ីបានពីររដូវកីឡាករវ័យ២២ឆ្នាំរូបនេះ បានត្រឡប់មករួមរស់ជាមួយក្រសួងការពារជាតិជាថ្មីចាប់ពីឆ្នាំ២០១៥-២០១៨។ នៅរដូវកាលមុន(ឆ្នាំ២០១៩) រូបគេ បានចុះកុងត្រាលេងឲ្យក្លិបក្របខណ្ឌលីគកំពូលរបស់ថៃ Buriram United ប៉ុន្តែដោយសាររបួសរូបគេក៏បាត់បង់ឱកាសលេងឲ្យលំដាប់កំពូលរបស់ថៃមួយនេះ ហើយក៏ត្រឡប់មកចូលរួមជាមួយក្រសួងការពារជាតិវិញ។
ពលរដ្ឋ បានក្លាយជាសមាជិកក្រុមយុវជនជម្រើសជាតិអាយុក្រោម១៦ឆ្នាំនៅឆ្នាំ២០១១ ហើយបានក្លាយជាសមាជិកក្រុមជម្រើសជាតិអាយុក្រោម១៩ឆ្នាំនៅឆ្នាំ២០១៥។ រូបគេត្រូវបានសហព័ន្ធកីឡាបាល់ទាត់កម្ពុជាកោះហៅឲ្យចូលរួមជាមួយក្រុមជម្រើសជាតិអាយុក្រោម២៣ឆ្នាំនៅឆ្នាំ២០១៧ ដោយបានបង្ហាញ១០លើកនិងរកបាន១គ្រាប់។ តាមពិតខ្សែបម្រើរូបនេះ បានក្លាយជាសមាជិកក្រុមជម្រើសជាតិតាំងពីឆ្នាំ២០១៥មកម្ល៉េះ ដោយរូបគេបង្ហាញខ្លួនបាន២៣លើក តែរកបានតែ២គ្រាប់ប៉ុណ្ណោះ។
ក្រៅពីកីឡាករឆ្នើមទាំងពីររូបខាងលើ ក្លិបបាល់ទាត់ក្រសួងការពារជាតិ ក៏បានប្រកាសចែកផ្លូវជាមួយកីឡាករបរទេស៣រូបទៀតផងដែរ។ កីឡាករបរទេសទាំងនេះរួមមាន Bisan George, Mohamed Hamza Abdelhamed Allam និង Khan Mohammed Faeez៕