អន្តរជាតិ
អ្នកស្រី ស៊ូជី ការពារប្រតិបត្តិការយោធាមីយ៉ាន់ម៉ាចំពោះមុខតុលាការយុត្តិធម៌អន្តរជាតិ លោកស្រីអ៊ុងសាន ស៊ូជី ទីប្រឹក្សារដ្ឋ និងរដ្ឋមន្រ្តីក្រសួងការបរទេស កំពុងផ្តល់សក្ខីកម្មនៅតុលាការយុត្តិធម៌អន្តរជាតិ, រូបភាព៖ AFP
× ម្ចាស់ពានរង្វាន់ណូបែលសន្តិភាព អ្នកស្រី អ៊ុងសាន ស៊ូជី នៅថ្ងៃទី១១ ខែធ្នូ បានផ្តល់សក្ខីកម្មនៅមុខចៅក្រមតុលាការយុត្តិធម៌អន្តរជាតិយ៉ាងច្បាស់ៗថា គ្មានអំពើឧក្រិដ្ឋកម្មប្រល័យពូជសាសន៍ណាមួយ កើតមាននៅក្នុងទឹកដីមីយ៉ាន់ម៉ាឡើយ ហើយប្រតិបត្តិការយោធាមីយ៉ាន់ម៉ាកន្លងមក គឺគ្រាន់តែជាការបោសសម្អាតក្រុមភេរវកម្មតែប៉ុណ្ណោះ។
តាមរយៈការផ្តល់សក្ខីកម្ម នៅចំពោះមុខចៅក្រម ១៧រូប ក្នុងតុលាការយុត្តិធម៌អន្តរជាតិ អ្នកស្រី អ៊ុងសាន ស៊ូជី ទីប្រឹក្សារដ្ឋ និងរដ្ឋមន្ត្រីការបរទេសមីយ៉ាន់ម៉ា បានច្រានចោលពាក្យបណ្តឹងរបស់ហ្គំប៊ីថា គ្រាន់តែមើលស្ថានភាពនៅក្នុងមីយ៉ាន់ម៉ាតែមួយជ្រុងតូច និងមិនពេញលេញ។ ក្នុងន័យនេះ លោកស្រី បានទទួលស្គាល់ថា ក្រុមយោធាបានប្រព្រឹត្តសកម្មភាពខុសច្បាប់មែន ប៉ុន្តែមិនមែនមានន័យថា ពួកគេកំពុងព្យាយាមលុបបំបាត់ចោលក្រុមជនជាតិភាគតិចរ៉ូហ៊ីងយ៉ានោះទេ។
បើតាមអ្នកស្រី ស៊ូជី ប្រតិបត្តិការយោធា គឺគ្រាន់តែឆ្លើយតប ទៅនឹងការវាយប្រហារលើប៉ុស្តិ៍ប៉ូលិស ពីសំណាក់ក្រុមយោធារ៉ូហ៊ីងយ៉ាក្នុងឆ្នាំ ២០១៧ តែប៉ុណ្ណោះ។ ក្នុងសំលៀកបំពាក់ភូមាបុរាណ និងមានចងផ្កានៅលើសក់ អ្នកស្រី ស៊ូជី បានថ្លែងនៅក្នុងបន្ទប់សវនាការថា ក្នុងករណីខ្លះ វាមិនអាចកំណត់បានទេថា ប្រតិបត្តិការយោធា មិនគោរពទៅតាមច្បាប់មនុស្សធម៌អន្តរជាតិ ដ្បិតតែក្រុមយោធា មិនអាចកំណត់បានច្បាស់ថា ជនមួយណាជាជនស៊ីវិល និងជនមួយណាជាយោធាឡើយ។
ក្នុងករណីនេះ អ្នកស្រីទីប្រឹក្សារដ្ឋបានចង្អុលបង្ហាញថា ការប្រព្រឹត្តបទឧក្រិដ្ឋប្រល័យពូជសាសន៍ មិនមែនគ្រាន់តែជាការសន្មត់ទេ ប៉ុន្តែពេលនេះរដ្ឋាភិបាលណៃពិដោ កំពុងតែស៊ើបអង្កេត លើករណីប្រព្រឹត្តបទឧក្រិដ្ឋប្រល័យពូជសាសន៍។ នេះបើតាមការចុះរបស់ទីភ្នាក់ងារព័ត៌មាន AFP។
ការផ្តល់សក្ខីកម្មរយៈពេល ៣០នាទីរបស់អ្នកស្រី ស៊ូជី គឺក្នុងគោលបំណងច្រានចោលពាក្យបណ្តឹងរបស់ប្រទេសហ្គំប៊ី ដែលថាមីយ៉ាន់ម៉ាបានប្រព្រឹត្តបទឧក្រិដ្ឋប្រល័យពូជសាសន៍ប្រឆាំងជនជាតិភាគតិចរ៉ូហ៊ីងយ៉ា។ ជាពិសេស ការលើកឡើងរបស់លោកស្រីបែបនេះ គឺដើម្បីឆ្លើយតបទៅរដ្ឋមន្ត្រីយុត្តិធម៌ហ្គំប៊ី ដែលបានទទូចឲ្យមីយ៉ាន់ម៉ា បញ្ឈប់សកម្មភាពសម្លាប់រង្គាល ការប្រព្រឹត្តអំពើអមនុស្សធម៌ និងអំពើប្រល័យពូជសាសន៍លើជនជាតិរបស់ខ្លួនជាបន្ទាន់។
សូមបញ្ជាក់ថា ទីក្រុងណៃពិដោ បានបើកប្រតិបត្តិការយោធាក្នុងទ្រង់ទ្រាយធំមួយ ដើម្បីបង្ក្រាបទៅលើជនជាតិភាគតិចរ៉ូហ៊ីងយ៉ា នៅក្នុងរដ្ឋរ៉ាឃីន កាលពីឆ្នាំ២០១៧ បន្ទាប់ពីក្រុមយោធារ៉ូហ៊ីងយ៉ា បានវាយប្រហារលើប៉ុស្តិ៍ប៉ូលិសមីយ៉ាន់ម៉ាមួយចំនួន។ ក្រោយប្រតិបត្តិយោធាមីយ៉ាន់ម៉ា វាបានបង្កឲ្យជនជាតិភាគតិចនេះ ស្លាប់ជាច្រើននាក់ និងជាង ៧០ម៉ឺននាក់ បានភៀសខ្លួនទៅបង់ក្លាដែស និងមួយចំនួនទៀត ទៅប្រទេសផ្សេងៗ។
ពាក់ពន្ធនឹងបញ្ហានេះ តុលាការមីយ៉ាន់ម៉ា បានកាត់ទោស យោធាចំនួន ៧នាក់ ឲ្យជាប់គុក១០ឆ្នាំ ដោយសារតែសម្លាប់មនុស្ស ១០ និងក្មេងប្រុសមួយនាក់។ ប៉ុន្តែពេលនេះ យោធា៧នាក់នោះ ត្រូវដោះលែងហើយ បន្ទាប់ពីជាប់ឃុំឃាំងមិនដល់មួយឆ្នាំផងនោះ៕
Tag:
មីយ៉ាន់ម៉ា
អ៊ុងសាន ស៊ូជី
តុលាការយុត្តិធម៌អន្តរជាតិ
© រក្សាសិទ្ធិដោយ thmeythmey.com