សហព័ន្ធកីឡាបាល់ទាត់អន្តរជាតិ (FIFA) នឹងចាត់វិធានការផ្លូវច្បាប់នៅចុងឆ្នាំ២០១៩នេះដើម្បីបង្ខំឲ្យលោក Michel Platini ប្រគល់ប្រាក់ចំនួន ២ លានដុល្លារមកវិញ ដែលលោកទទួលបានក្នុងរជ្ជកាលដឹកនាំរបស់លោក Sepp Blatter អតីតអ្នកគ្រប់គ្រងបាល់ទាត់ពិភពលោកមួយនេះ។
FIFA បានដាក់បម្រាមលើលោក Platini ដោយផ្អាករាល់សកម្មភាពកីឡារបស់លោកទាំងអស់រយៈពេល៤ឆ្នាំ កាលពីឆ្នាំ ២០១៥។ ការហាមនេះ បន្ទាប់ពីស៊ើបអង្កេតរកឃើញថាបុរសសញ្ជាតិបារាំងរូបនេះមានជាប់ទាក់ទងនឹងទឹកប្រាក់ស៊ីសំណូក កាលពីឆ្នាំ២០១១។
ក្រុមអ្នកស៊ើបអង្កេតបានរកឃើញថា លោក Blatter អតីតប្រថាន FIFA បានផ្តល់ប្រាក់ ២លានដុល្លារអាមេរិកទៅឲ្យលោក Platini ដែលជាអតីតប្រធានសហព័ន្ធកីឡាបាល់ទាត់ទ្វីបអឺរ៉ុប (UEFA) នាឆ្នាំនោះ។
នៅក្នុងឯកសារមួយដែលទីភ្នាក់ងារព័ត៌មាន AFP បានឃើញនៅថ្ងៃពុធទី១១ ខែធ្នូ FIFA បាននិយាយថាពួកគេនឹងចាត់វិធានការតឹងរឹងដើម្បីប្រមូលប្រាក់ដែលលោក Blatter ចំណាយខុសច្បាប់ទៅកាន់លោក Platini នោះត្រឡប់មកវិញ។
ជុំវិញករណីនេះ Platini វ័យ៦៣ឆ្នាំជាអតីតប្រធានក្រុមបាល់ទាត់ជម្រើសជាតិបារាំង បានបដិសេធមិនធ្វើអត្ថាធិប្បាយទេ ប៉ុន្តែមេធាវីលោក គឺលោក Vincent Solari បានហៅវិធានការនេះថាជា«ការរុកគួន» ដល់កូនក្តីរបស់លោក។
«ជាការពិត នេះជាមានគោលបំណងតែមួយគត់គឺដើម្បីបន្តព្យាយាមធ្វើឲ្យខូចកេរ្តិ៍ឈ្មោះកូនក្តីរបស់ខ្ញុំ»។ នេះជាការលើកឡើងរបស់លោក Solari។
ក្រៅពីលោក Platini ស្ថាប័នគ្រប់គ្រងកីឡាបាល់ទាត់ពិភបលោកមួយនេះ ថែមទាំងគ្រោងប្តឹងលោក Blatter ដោយនឹងស្វែងរកប្រាក់ពុករលួនោះ ព្រមទាំងគិតលើការប្រាក់ដើម្បីជាការពិន័យទៀតផង។
លើសពីនេះទៀត ក្រុមមន្ត្រីពាក់ព័ន្ធបានស៊ើបអង្កេតលើករណីប្រព្រឹត្តអំពើពុករលួយ ដែលជាប់ទាក់ទងនឹងការផ្តល់សិទ្ធិប្រកួត World Cup ឆ្នាំ២០១៨ នៅរុស្ស៊ី និងឆ្នាំ២០២២ នៅកាតាផង។ លោក Blatter និង Platini ក៏ជាប់ពាក់ព័ន្ធក្នុងរឿងក្តីនេះដែរ មុនពេលលោកចុះចេញពីតំណែងក្នុងឆ្នាំ ២០១៥។៕