អន្តរជាតិ
អ្នកស្រីស៊ូជី៖ សេចក្តីសម្រេចរបស់តុលាការ នឹងជួយមីយ៉ាន់ម៉ាបង្រួបបង្រួមគ្នានៅក្នុងប្រទេស លោកស្រីអ៊ុងសាន ស៊ូជី រដ្ឋមន្រ្តីការបរទេស និងទីប្រឹក្សារដ្ឋមីយ៉ាន់ម៉ា មានវត្តមាននៅក្នុងសវនាការតុលាការយុត្តិធម៌អន្តរជាតិ នាទីក្រុងឡាអេ។ រូបភាព៖ AFP
× អ្នកស្រី អ៊ុងសាន ស៊ូជី ម្ចាស់ពានរង្វាន់ណូបែលសន្តិភាព នៅថ្ងៃទី១២ ខែធ្នូ បានជំរុញឲ្យចៅក្រមតុលាការយុត្តិធម៌អន្តរជាតិ ទម្លាក់ចោលសំណុំរឿងឧក្រិដ្ឋកម្មប្រល័យពូជសាសន៍ជនជាតិភាគតិចរ៉ូហ៊ីងយ៉ា។ ការព្រលយពាក្យរបស់អ្នកស្រី ស៊ូជី បែបនេះ ដោយសង្ឃឹមថា សេចក្តីសម្រេចរបស់តុលាការ នឹងជួយឲ្យមីយ៉ាន់ម៉ាអាចបង្រួបបង្រួមគ្នា និងបញ្ចប់សង្គ្រាមស៊ីវិលនៅក្នុងប្រទេស។
«ខ្ញុំបន់ស្រន់ឲ្យសេចក្តីសម្រេចរបស់តុលាការ ប្រកបដោយគតិបណ្ឌិត និងយុត្តិធម៌ ដើម្បីជួយឲ្យយើង [មីយ៉ាន់ម៉ា] អាចបង្កើតសាមគ្គីភាពនៅក្នុងប្រទេសបាន»។ នេះជាសម្តីរបស់អ្នកស្រី អ៊ុងសាន ស៊ូជី រដ្ឋមន្ត្រីការបរទេស និងទីប្រឹក្សារដ្ឋមីយ៉ាន់ម៉ា ថ្លែងនៅចំពោះមុខចៅក្រមតុលាការយុត្តិធម៌អន្តរជាតិ ដែលមានមូលដ្ឋាននៅទីក្រុងឡាអេ ប្រទេសហូឡង់។
ក្នុងន័យទទូចឲ្យតុលាការទីក្រុងឡាអេ ទម្លាក់ចោលបទចោទប្រកាន់មីយ៉ាន់ម៉ា ពីបទឧក្រិដ្ឋកម្មប្រល័យពូជសាសន៍ អ្នកស្រី ស៊ូជី បាននិយាយយ៉ាងដូច្នេះថា សេចក្តីសម្រេចទម្លាក់បទចោទប្រកាន់ គឺសំខាន់ណាស់ ដើម្បីបញ្ចប់ជម្លោះផ្ទៃក្នុងមីយ៉ាន់ម៉ា និងការបង្រួបបង្រួមជនជាតិភាគតិចទាំងមូល។ ផ្ទុយទៅវិញ សេចក្តីសម្រេចរបស់តុលាការក្នុងគោលបំណងដាក់ទណ្ឌកម្មទៅលើទីក្រុងណៃពិដោ មានតែបង្កឲ្យមានជម្លោះ និងបំផ្លាញដំណើរផ្សះផ្សាផ្ទៃក្នុងមីយ៉ាន់ម៉ាកាន់តែខ្លាំងជាមុន។ នេះបើតាមការលើកឡើងរបស់អ្នកស្រី ស៊ូជី ក្នុងសេចក្តីថ្លែងការណ៍រយៈពេល ៦នាទី ដើម្បីបិទបញ្ចប់ការផ្តល់សក្ខីកម្មនាថ្ងៃទី១២ ខែធ្នូ។
តុលាការយុត្តិធម៌អន្តរជាតិ បានបើកអង្គសវនាការរយៈពេលបីថ្ងៃ ពោលគឺចាប់ពីថ្ងៃទី១០ ដល់ថ្ងៃទី១២ ខែធ្នូ តាមបណ្តឹងរបស់ប្រទេសហ្គំប៊ី។ ក្នុងពាក្យបណ្តឹងនោះ ហ្គំប៊ីបានចោទថា មីយ៉ាន់ម៉ាបានប្រព្រឹត្ត «ឧក្រិដ្ឋកម្មប្រល័យពូជសាសន៍» ដោយការសម្លាប់រង្គាល ចាប់រំលោភ អំពើហិង្សាផ្លូវភេទ និងការដុតផ្ទះសម្បែងជាដើម។ រដ្ឋអាហ្វ្រិកដែលតំណាងឲ្យប្រទេសអង្គការកិច្ចសហប្រតិបត្តិការឥស្លាមមួយនេះ ចង់ឲ្យតុលាការអន្តរជាតិ ចេញវិធានការហាមមីយ៉ាន់ម៉ាបន្តសកម្មភាពធ្វើទុក្ខបុកម្នេញនេះទៀត។
សូមបញ្ជាក់ថា មីយ៉ាន់ម៉ា បានទទួលស្គាល់ជាផ្លូវការ ជនជាតិភាគតិចនៅក្នុងប្រទេសរបស់ខ្លួនចំនួន ១៣៥ក្រុម ចំណែកជនជាតិភាគតិចរ៉ូហ៊ីងយ៉ា រដ្ឋាភិបាលមីយ៉ាន់ម៉ា មិនបានទទួលស្គាល់ឡើយ។ ការមិនទទួលស្គាល់ជនជាតិភាគតិចរ៉ូហ៊ីងយ៉ា ពីសំណាក់រដ្ឋាភិបាលទីក្រុងណៃពិដោ គឺដោយសារតែច្បាប់ស្តីពីប្រជាពលរដ្ឋ ឆ្នាំ១៩៨២។ តាមរយៈច្បាប់នេះ មីយ៉ាន់ម៉ាទទួលស្គាល់តែជនជាតិភាគតិចណា ដែលមកតាំងនៅក្នុងទឹកដីនេះ មុនឆ្នាំ ១៨២៣ប៉ុណ្ណោះ។ ដោយឡែកជនជាតិរ៉ូហ៊ីងយ៉ា គឺមកក្រោយឆ្នាំ១៨២៣ ទើបរដ្ឋាភិបាលមិនទទួលស្គាល់៕
Tag:
មីយ៉ាន់ម៉ា
តុលាការយុត្តិធម៌អន្តរជាតិ
© រក្សាសិទ្ធិដោយ thmeythmey.com