កីឡាជាតិ
ជាតិ
ខ្សែការពារ ទៀង ទីនី ចូលរួមជាមួយព្រះខ័នរាជស្វាយរៀង, រូបភាពពីក្លិបព្រះខ័នរាជស្វាយរៀង
×![]()
ខ្សែការពារ ទៀង ទីនី បានចុះកិច្ចសន្យាលេងឲ្យក្លិបបាល់ទាត់ព្រះខ័នរាជស្វាយរៀងសម្រាប់រដូវកាលឆ្នាំ២០២០-២០២១ ក្រោយផុតកិច្ចសន្យាជាមួយក្លិបវិសាខា។ នេះបើតាមការប្រកាសរបស់ក្លិបព្រះខ័នរាជស្វាយរៀងនៅលើទំព័រហ្វេសប៊ុកនៅថ្ងៃទី១៣ ខែធ្នូ ឆ្នាំ២០១៩នេះ។ ចំណែកក្លិបបាល់ទាត់បឹងកេត បាននាំចូលយុវជនមកពីសាលាបាត់ទាត់ជាតិបាទីចំនួន៤រូប។
តាមរយៈកិច្ចសន្យាខាងលើខ្សែការពារ ទៀង ទីនី ត្រូវជួយក្លិបបាល់ទាត់ព្រះខ័នរាជស្វាយរៀងប្រជែងដណ្តើមជើងឯកក្នុងពានរង្វាន់លីគកំពូល និងពានរង្វាន់សម្តេច ហ៊ុន សែន ប្រចាំឆ្នាំ២០២០។ តែនៅចំពោះមុខ ខ្សែការពារចាស់វស្សារូបនេះ ត្រូវជួយក្លិបនេះ ប្រជែងក្នុងពានរង្វាន់លំដាប់ទី២របស់សហព័ន្ធកីឡាបាល់ទាត់ទ្វីបអាស៊ី AFC Cup 2020។
សម្រាប់ការប្រកួត AFC Cup ព្រះខ័នរាជស្វាយរៀង ត្រូវប្រជែងជាមួយក្រុម Master 7 របស់ឡាវ នៅវគ្គ Playoff ដើម្បីដណ្តើមកៅអីឡើងទៅវគ្គ Group Stage។ ការប្រកួតធ្វើឡើងពីរជើង ដោយជើងទី១រៀបចំនៅថ្ងៃទី២២ ខែមករា ឆ្នាំ២០២០ នៅពហុកីឡដ្ឋានជាតិ ខណៈជើងទី២ធ្វើឡើងនៅថ្ងៃទី២៩ មករា ឆ្នាំ២០២០ នៅកីឡដ្ឋាន Lao National Stadium។
មុនចូលរួមជាមួយព្រះខ័នរាជស្វាយរៀង កីឡាករ ទៀង ទីនី បានចំណាយពេល៣ឆ្នាំរួមរស់ជាមួយក្លិបវិសាខា ពោលគឺតាំងពីក្លិបនេះនៅលេងក្នុងលីគលំដាប់ទី២។ រូបគេ បានជួយឲ្យក្លិបនេះឈ្នះកៅអីឡើងមកលេងលីគកំពូលឆ្នាំ២០១៨ ដោយកាលណោះពួកគេបញ្ចប់ក្នុងចំណាត់ថ្នាក់លេខ៣ និងបញ្ចប់លេខ២នៅឆ្នាំ២០១៩។ ជាមួយគ្នានេះ រូបគេ ធ្លាប់លេងឲ្យក្លិបភ្នំពេញក្រោន ណាហ្គាវើល និងអង្គរថាយហ្គឺរជាដើម។
ដោយឡែក ក្លិបបាល់ទាត់បឹងកេត បានធ្វើឲ្យអ្នកគាំទ្រកីឡាបាល់ទាត់មានភ្ញាក់ផ្អើលយ៉ាងខ្លាំង តាមរយៈការនាំចូលខ្សែប្រយុទ្ធវ័យក្មេង សៀង ចន្ធា របស់សាលាបាល់ទាត់ជាតិបាទី និងមិត្តរួមក្រុម៣រូបទៀតរួមមាន ជុង មករា, សៅ វ៉ៃហ្វី និងអ្នកចាំទី ថា ច័ន្ទឬទ្ធី។ រដូវកាលដោះដូរកីឡាករបានបើកតាំងពីថ្ងៃទី៩ ខែធ្នូ ឆ្នាំ២០១៩ ហើយបិទបញ្ចប់នៅថ្ងៃទី៧ ខែកុម្ភៈ ឆ្នាំ២០២០៕
Tag:
បាល់ទាត់
ទៀង ទីនី
ព្រះខ័នរាជស្វាយរៀង
បឹងកេត
© រក្សាសិទ្ធិដោយ thmeythmey.com
