សៀមរាម នឹងមានផ្លូវកង់ប្រវែង២៣គីឡូម៉ែត្រ

ជាតិ

សង្គមជាតិ

សៀមរាម នឹងមានផ្លូវកង់ប្រវែង២៣គីឡូម៉ែត្រ

14, Dec 2019 , 8:30 am

រូបភាព

រូបភាពពីអាជ្ញាធរជាតិអប្សារា

ដោយ: អ៊ុត រស្មី (Uth Raksmey)

ភ្នំពេញ៖ សៀមរាម នឹងមានផ្លូវសម្រាប់ជិះកង់ថ្មីមួយ ដែលមានប្រវែង២៣គីឡូម៉ែត្រពីកន្លែងឆែកសំបុត្រចាស់ក្រោយអង្គរវត្តរហូតដល់ខ្លោងទ្វារដីឆ្នាំង ដើម្បីសម្រួលចរាចរណ៍ដល់សិស្សានុសិស្ស និងភ្ញៀវទេសចរជិះកង់។

តាមសេចក្ដីប្រកាសព័ត៌មានរបស់អាជ្ញាធរជាតិអប្សរា ផ្លូវកង់នេះ មានទទឹង២ម៉ែត្រ បណ្ដោយ២៣គីឡូម៉ែត្រ ចេញពីកន្លែងឆែកសំបុត្រចាស់ កាត់ក្រោយអង្គរវត្ត បន្តទៅប្រាសាទក្រវ៉ាន់ កាត់ខាងត្បូងប្រាសាទបន្ទាយក្ដី បត់ទៅខាងជើងប្រាសាទតាព្រហ្ម ឆ្ពោះទៅស្ពានប្រាសាទតាកែវ។ ចំណែកតំបន់ផ្លូវវង់ធំ គឺចេញពីស្រះស្រង់ រហូតដល់ខ្លោងទ្វារដីឆ្នាំង។

លោក យិត ចាន់ដារដ្ឋ អគ្គនាយករងអាជ្ញាធរជាតិអប្សរា បានឲ្យដឹងថា ផ្លូវនេះសាងសង់ក្នុងទិសដៅស្របនឹងផ្លូវកៅស៊ូដែលមានស្រាប់ និងឃ្លាតពីផ្លូវកៅស៊ូប្រមាណ២៥ម៉ែត្រ។ ពិសេសផ្លូវកង់នេះ ជាប្រភេទផ្លូវស្រាលមិនប៉ះពាល់ដល់ស្រទាប់ដី និងមានភាពបត់បែនទៅតាមដើមឈើតូចធំជាច្រើន។