ជាតិ
សង្គមជាតិ
អាល្លឺម៉ង់ឲ្យជាង២លានដុល្លារដល់ MRC ដើម្បីតាមដានផលប៉ះពាល់ពីទំនប់វារីអគ្គិសនីនៅទន្លេមេគង្គក្រោម
រូបភាពពីលោក Peter Starr
×![]()
ដោយ: ឡាយ សុភាវតី
ភ្នំពេញ៖ អាល្លឺម៉ង់ផ្ដល់ថវិកា២,២លានដុល្លារ ឲ្យគណៈកម្មការទន្លេមេគង្គ(MRC) ដើម្បីបង្កើតកិច្ចសហប្រតិបត្តិការធនធានទឹកឆ្លងដែន ក្នុងការតាមដានផលប៉ះពាល់បរិស្ថានឆ្លងដែនពីទំនប់វារីអគ្គិសនីតាមដងទន្លេមេគង្គក្រោម។ 
ការផ្ដល់ថវិកានេះ បានធ្វើឡើងក្នុងពិធីចុះហត្ថលេខារវាងលោក អាន ពេជ្រហត្ថដា នាយកប្រតិបត្តិលេខាធិការដ្ឋាន MRC និងលោក Jens Lütkenherm ឯកអគ្គរដ្ឋទូតសហព័ន្ធអាល្លឺម៉ង់ប្រចាំប្រទេសឡាវ នៅទីក្រុងវៀងច័ន្ទ ប្រទេសឡាវ នៅថ្ងៃទី១៣ ខែធ្នូ ឆ្នាំ២០១៩។ លោក អាន ពេជ្រហត្ថដា បានលើឡើងថា គម្រោងរបស់អាល្លឺម៉ង់សម្រាប់ MRC កើនឡើងប្រមាណ៦,៤៥លានអឺរ៉ូ ក្នុងការអនុវត្តផែនការយុទ្ធសាស្ត្រឆ្នាំ២០១៦ ដល់២០២០ រួមទាំងផែនការថ្មីឆ្នាំ២០២១ ដល់២០២៥។ ជាមួយគ្នាដែរ គម្រោងថវិកានេះ ប្រទេសអាល្លឺម៉ង់ និងគណៈកម្មការទន្លេមេគង្គ មានគោលបំណងជំរុញកិច្ចសហប្រតិបត្តិការ លើការរៀបចំផែនការ និងគ្រប់គ្រងធនធានទឹកឆ្លងដែនក្នុងចំណោមប្រទេសតាមដងទន្លេមេគង្គក្រោម កម្ពុជា ឡាវ ថៃ និងវៀតណាម។
«ការគាំទ្ររបស់ប្រទេសអាល្លឺម៉ង់ ចំពេលដ៏សំខាន់ គឺពេលដែលទន្លេមេគង្គកំពុងប្រឈមនឹងការថ្លឹងថ្លែងដ៏ពិបាក រវាង ការង្កើនការអភិវឌ្ឍក្នុងវិស័យថាមពល ដឹកជញ្ជូន និងកសិកម្ម និងផលប៉ះពាល់លើបរិស្ថាន និងការប្រកបរបរចិញ្ចឹមជីវិតរបស់ប្រជាជនក្នុងស្រុក»។ នេះជាការបញ្ជាក់បន្ថែមរបស់លោក អាន ពេជ្រហត្ថដា។
បើតាមលទ្ធផលការតាមដានលំហូរទឹករបស់ MRC គ្រោះរាំងស្ងួតឆ្នាំ២០១៩នេះ បណ្ដាលឲ្យទឹកទន្លេមេគង្ដធ្លាក់ដល់កម្រិតទាប បំផុតនៅប្រវត្តិសាស្ត្រ ឬក្នុងអំឡុង៦០ឆ្នាំចុងក្រោយនេះ។ ទន្ទឹមនេះ លទ្ធផលបានបង្ហាញបន្ថែមថា លំហូរទឹកទាបខ្លាំង ការធ្លាក់ចុះយឺតនៃសារធាតុកករ និងវត្តមានសារាយ ឬស្លែនៅលើដីខ្សាច់ និងស្រទាប់បាតទន្លេ គឺជាមូលហេតុដែល បណ្តាល ឱ្យពណ៌ទឹកទន្លេមេគង្គប្រែជាពណ៌ខៀវបៃតងនាពេលថ្មីៗនេះ។ MRC បានក្រើនរម្លឹកថា ស្ថានភាពទឹកប្រែពណ៌ខៀវបៃតង អាចនឹងកើតមាននៅតាមកន្លែងផ្សេងៗទៀត និងបង្កឱ្យមានហានិភ័យ ដូចជាការប្រែប្រួលផលិតភាពរបស់ទន្លេ ការកាត់បន្ថយផលិតភាពជីវសាស្ត្រចម្រុះក្នុងងទឹក ដែលបណ្តាលមកពីទឹកប្រែកាន់តែថ្លាច្បាស់។
ចំណែកលោក Jens Lütkenherm ឯកអគ្គរដ្ឋទូតអាល្លឺម៉ង់បានបញ្ជាក់ថា៖«ថវិកាបន្ថែមរបស់យើងនឹងផ្តល់លទ្ធភាពដល់ MRC ពន្លឿនកិច្ចការវាយតម្លៃផលប៉ះពាល់ទាំងនោះ និងធានាថាភាគីដែលធ្វើការសម្រេចចិត្ត ទាំង អស់នៅក្នុងអាងទន្លេបានយល់ដឹងពីផលវិបាកនានា និងចាត់វិធានការឱ្យបានសមស្រប និង ទាន់ពេលវេលា»។ ទន្លេមេគង្គកំពុងរងនូវសម្ពាធពីផលប៉ះពាល់នៃគម្រោងគ្រប់គ្រងទឹកសម្រាប់ប្រព័ន្ធធារាសាស្ត្រ ថាមពលវារីអគ្គិសនី និងការផ្គត់ផ្គង់ទឹកក្នុងពេលតែមួយ ហើយ MRC នឹងប្រើថវិកានេះ ក្នុងការពិនិត្យតាមដាន និងគ្រប់គ្រងបម្រែបម្រួលរបស់អាងទន្លេមេគង្គ៕
Tag:
អាល្លឺម៉ង់
MRC
© រក្សាសិទ្ធិដោយ thmeythmey.com
