ជាតិ
សង្គមជាតិ
លោក សូ យ៉ាន៖«ខ្ញុំលក់មាន់អាំង២០ឆ្នាំនៅមុខអង្គរ មិនដែលលក់មិនសូវដាច់ដូចប៉ុន្មានខែនេះទេ»
×![]()
សៀមរាប៖ មាន់អាំងប្រឡាក់គ្រឿងមានរសជាតិឆ្ងាញ់ជាប់មាត់អ្នកអតិថិជន នៅមុខប្រាសាទអង្គរវត្ត មានឈ្មោះបោះសម្លេងល្បី មិនចាញ់មាន់អាំងនៅផ្សារពួក ក្នុងខេត្តសៀមរាបនោះទេ។ ប៉ុន្តែ លោក សូ យ៉ាន អ្នកលក់មួយអាំងនៅមុខអង្គរវត្តប្រមាណ២០ឆ្នាំ បានរអ៊ូ ថា ក្នុងរយៈពេល៣-៤ខែចុងក្រោយនៃឆ្នាំ២០១៩ នេះ បែរជាមិនសូវមានភ្ញៀវមកចូលទិញមាន់អាំងពិសារបស់គាត់ ដូចឆ្នាំមុនៗទៅវិញ។ ការលក់មិនសូវដាច់នេះ បានធ្វើឲ្យអាជីវករវ័យ៥២ឆ្នាំ រូបនេះ បាត់បង់ចំណូលជាងពាក់កណ្តាលដែលជាទូទៅ ក្នុងមួយខែ លោក យ៉ាន លក់បានចំណូល២០០ទៅ៣០០ដុល្លារ។ 
ស្ថិតនៅក្នុងតូបលក់មាន់អាំងមួយកន្លែង នៅមុខអង្គរវត្ត លោក សូ យ៉ាន អង្គុយលើកៅទាបដោយដៃទាំងពីរកំពុងកាន់មាន់ដែលប្រឡាក់គ្រឿងរួច យកមកកៀបនឹងតង្កៀបឫស្សីដែលមានក្នុងចានដែក ម្តងមួយៗ ដាក់អាំងនៅនឹងមុខតូបរបស់ខ្លួន។ អ្នកលក់មាន់អាំងនៅមុខអង្គរវត្តរូបនេះ រអ៊ូថាដូច្នេះថា ៖«កន្លងមក ខ្ញុំ អាចលក់មាន់អាំងអស់២០-៣០ក្បាលក្នុងមួយថ្ងៃ ព្រមទាំងទទួលបានប្រាក់ចំណេញប្រចាំខែពី២០០ទៅ៣០០ដុល្លារ។ ប៉ុន្តែក្នុងរយៈពេល៣ខែចុងក្រោយនេះ ពោលខែកញ្ញា ដល់ខែវិច្ឆិកា ខ្ញុំអាចទទួលបានប្រាក់ចំណេញពីការលក់មាន់អាំងនេះ បានត្រឹម១០០ដុល្លារ ប៉ុណ្ណោះ ក្នុងមួយខែ»។
បើតាមលោក សូ យ៉ាន ការលក់ធ្លាក់ប្រាក់ចំណេញប្រចាំខែដែលមិនធា្លប់ជួបកន្លងមកនេះ គឺដោយសារតំបន់អង្គរវត្ត មិនសូវមានភ្ញៀវទេសចរ មកទស្សនា មិនថាភ្ញៀវបរទេស ឬភ្ញៀវខ្មែរនោះទេ ហើយសម្រាប់ភ្ញៀវដែលនិយមមកទទួលទានមាន់អាំងនៅមុខអង្គរវត្តនេះ ភាគច្រើន គឺជាភ្ញៀវខ្មែរ។
ជាមួយគ្នានេះ លោក សូ យ៉ាន បានបន្ថែមថា មួយអាំងមួយក្បាល មានតម្លៃពី៣០០០០ទៅ៥០០០០រៀល ដែលអាស្រ័យទៅលើទម្ងន់មាន់តែម្តង។ ក្រៅពីលក់មាន់អាំង លោក សូ យ៉ាន ក៏មានលក់នូវកង្កែបអាំង ប្រហុកអាំង ត្រីអាំង និងសម្លរខ្មែរបែបស្រុកស្រែជាច្រើនមុខ ផងដែរ។
លោក សូ យ៉ាន នឹងលែងប្រកបរបរលក់មាន់អាំង និងម្ហូបអាហារ នៅមុខអង្គរនេះទៀតនៅឆ្នាំក្រោយ ប៉ុន្តែលោកឈប់លក់នេះ មិនមែនដោយសារលក់មិនសូវដាច់នោះទេ គឺអាជីវករមានវ័យ៥២ឆ្នាំ រូបនេះ ផ្ទេរមុខរបរដែលមានអាយុ២០ឆ្នាំមកហើយនោះទៅឱ្យកូនរបស់លោកបន្តម្តង៕
Tag:
មាន់អាំងមុខអង្គរវត្ត
© រក្សាសិទ្ធិដោយ thmeythmey.com
