ដើម្បីជួយសម្រួលដល់ការធ្វើចរាចរណ៍នៅក្នុងទីក្រុង ក៏ដូចជាជួយរំដោះការកក់ស្ទះ នៅតាមបណ្តាផ្លូវធំៗ រដ្ឋាភិបាល កំពុងសិក្សាពីលទ្ធភាពពង្រីកផ្លូវជាយក្រុង និងសាងសង់សង់ផ្លូវថ្មីបន្ថែមទៀត ដើម្បីជួយសម្រួលដល់ការដឹកជញ្ជូន និងការចេញចូលទីក្រុង។
ឆ្លើយតបនឹងបញ្ហាចរាចរណ៍ សាលារាជធានីភ្នំពេញ គ្រោងស្ថាបនាផ្លូវចំនួន២ខ្សែ អមសងខាងផ្លូវរថភ្លើងតភ្ជាប់ទៅផ្លូវទំនប់កប់ស្រូវ។ បើមើលលើទីតាំងភូមិសាស្ត្រ នៃគម្រោងផ្លូវតាមបណ្តោយផ្លូវរថភ្លើងនេះ វានឹងជួយរំដោះចរាចរណ៍មួយផ្នែកធំ ពីមហាវិថីសហព័ន្ធរុស្ស៊ី ដែលកំពុងមានការកកស្ទះខ្លាំង ជារៀងរាល់ថ្ងៃ។ គម្រោងសាងសង់ផ្លូវថ្មីនេះ ត្រូវបានអភិបាលរាជធានីភ្នំពេញលោក ឃួង ស្រេង លើកឡើងកាលថ្ងៃទី១១ ខែធ្នូ នៅក្នុងដំណើរការចុះត្រួតពិនិត្យជាលើកដំបូង ក៏ដូចការសិក្សាលើផលប៉ះពាល់ដល់ប្រជាពលរដ្ឋ នៅតំបន់សងខាងផ្លូវរថភ្លើងនេះ។
បើតាមលោក ឃួង ស្រេង អាជ្ញាធររាជធានីភ្នំពេញ កំពុងសហកាជាមួយក្រសួងសាធារណការ និងដឹកជញ្ជូន ដើម្បីស្ថាបនាផ្លូវទាំង២ ខ្សែ។ ប៉ុន្តែទោះបីជាយ៉ាងណាក្តី លោកមិនបានបញ្ជាក់ពីពេលវេលាជាក់លាក់ ថាតើគម្រោងនេះ នឹងផ្ដើមបើកការដ្ឋានសាងសង់ នៅថ្ងៃណា និងបញ្ចប់ថ្ងៃណានៅឡើយទេ។
គេមើលឃើញថា គម្រោងនេះ ប្រហែលត្រូវការរយៈពេលសមស្របមួយ ដើម្បីឲ្យក្រសួងសាធារណការ និងដឹកជញ្ជូន និងសាលារាជធានីភ្នំពេញ ក៏ដូចជាក្រុមហ៊ុន Royal Railway ដែលទទួលខុសត្រូវសាងសង់ បានសិក្សាលទ្ធភាព និងផលប៉ះពាល់នានា ដើម្បីលើកសំណើដាក់ជូនរាជរដ្ឋាភិបាល ពិនិត្យសម្រេចចុងក្រោយ។
អចលនទ្រព្យនៅតាមបណ្តោយផ្លូវរថភ្លើង
អ្នកជំនាញអចលនទ្រព្យអចលនទ្រព្យមើលឃើញថា ការសាងសង់ផ្លូវថ្មីតាមបណ្តោយផ្លូវរថភ្លើងនេះ នឹងជួយបង្កើនតម្លៃអចលនទ្រព្យ នៅតាមបណ្តោយផ្លូវរថភ្លើងមួយកម្រិតទៀត។
លោក ស៊ន សៀប ស្ថាបនិក និងជានាយកប្រត្តិបត្តិក្រុមហ៊ុន Key Real Estate បានប្រាប់ Realestate.com.kh ថា បើទោះបីជាគម្រោងនេះ មិនទាន់មានភាពច្បាស់លាស់ថា នឹងសាងសង់នៅពេលណាក៏ដោយ ប៉ុន្តែតម្លៃអចលនទ្រព្យ បានកើនឡើងរួចទៅហើយ។
លោកថា ដីតាមបណ្តោយផ្លូវរថភ្លើង ដែលចេញពីទួលគោកទៅតំបន់ត្រឡោកបែក មានតម្លៃ ចាប់ពី១,០០០ ទៅ ២,០០០ ដុល្លារ ក្នុងមួយម៉ែត្រការ៉េ។ ចំណែកចាប់ពីត្រឡោកបែកទៅតំបន់ផ្លូវទ្រីហេង មានតម្លៃចន្លោះ ៥០០ ទៅ ១,០០០ ដុល្លារ ក្នុងមួយម៉ែត្រការ៉េ។ រីឯដីតាមបណ្តោយផ្លូវរថភ្លើង ជិតគម្រោងបុរីពភពថ្មី តម្លៃអាចមានក្រោម ៥០០ ដុល្លារក្នុងមួយម៉ែត្រការ៉េ។
លោក ស៊ន សៀប រំពឹងថា តម្លៃដីនឹងបន្តកើនឡើងខ្ពស់ជាងនេះ នៅពេលផ្លូវថ្មីបានសាងសង់រួចរាល់៕