ខេត្តកំពង់ធំ៖ ក្នុងការបន្តចូលរួមជំរុញវប្បធម៌អាន របស់សិស្សានុសិស្ស និងអភិវឌ្ឍធនធានមនុស្សនៅកម្ពុជា អគារបណ្ណាល័យស្តង់ដារចំនួន ៤ ខ្នង ដែលបានសាងសង់ និងបំពាក់សៀវភៅនិងបរិក្ខាររួចរាល់ ដោយប្រើមូលនិធិនៃគ្រឹះស្ថានមីក្រូហិរញ្ញវត្ថុ ប្រាសាក់ ត្រូវបានដាក់សម្ពោធឱ្យប្រើប្រាស់ជាផ្លូវការ កាលពីរសៀលថ្ងៃទី ១៣ ខែធ្នូ ឆ្នាំ២០១៩។ ពិធីនេះ មានការចូលរួមជាអធិបតីភាពដ៏ខ្ពង់ខ្ពស់ លោក ជា ចាន់តូ អគ្គទេសាភិបាល ធនាគារជាតិនៃកម្ពុជា។
ពិធីសម្ពោធនេះ ប្រារព្ធធ្វើឡើងនៅក្នុងបរិវេណវិទ្យាល័យកំពង់ថ្ម ក្នុងស្រុកសន្ទុក ខេត្តកំពង់ធំ ដើម្បីជានិមិត្តរូប នៃការដាក់ឱ្យប្រើប្រាស់ជាផ្លូវការ អគារបណ្ណាល័យទាំង ៤ ខ្នង ដែលស្ថិតនៅទីតាំងសាលាផ្សេងគ្នារួមមាន បណ្ណាល័យនៅវិទ្យាល័យ កំពង់ថ្ម , វិទ្យាល័យ ហ៊ុន សែន សណ្តាន់ , វិទ្យាល័យ ហ៊ុន សែន រុងរឿង និងវិទ្យាល័យ ជា ស៊ីម ប្រឡាយ ដែលស្ថិតនៅទឹកដីខេត្តកំពង់ធំ ជាមួយនឹងសម្ភារ បរិក្ខារបណ្ណាល័យយ៉ាងច្រើន និងសៀវភៅអានប្រមាណជា ១២,០០០ក្បាល។
ចូលរួមជាគណៈអធិបតីក្នុងពិធីនេះដែរ រួមមាន លោក ព្រឹម រដ្ឋា អភិបាលរងខេត្តកំពង់ធំ, លោក ឃឹម សារិន តំណាងក្រសួងអប់រំ យុវជន និងកីឡា, លោក តាន់ ប៊ុនហុង ប្រធានមន្ទីរអប់រំ យុវជន និងកីឡាខេត្តកំពង់ធំ, លោក ទឹម រតនា នាយកសាខាធនាគារជាតិនៃកម្ពុជា ប្រចាំខេត្តកំពង់ធំ និងលោក ស៊ីម សេនាជាតិ ប្រធាននាយកប្រតិបត្តិនៃគ្រឹះស្ថានមីក្រូហិរញ្ញវត្ថុ ប្រាសាក់ ព្រមទាំង លោកអភិបាលស្រុកសន្ទុក ស្រុកស្ទោង និងស្រុកសណ្ដាន់ អាជ្ញាធរដែនដី លោកគ្រូ អ្នកគ្រូ សិស្សានុសិស្ស និងប្រជាជនប្រមាណជា ១,៥០០នាក់។
លោក ឃឹម សារិន តំណាងក្រសួងអប់រំ យុវជន និងកីឡា បានកោតសរសើរ និងថ្លែងអំណរគុណយ៉ាងជ្រាលជ្រៅ ចំពោះប្រាសាក់ ដែលបានកសាងអគារបណ្ណាល័យជាច្រើន ដល់រហូតដល់ ៤១ខ្នង នៅទូទាំងប្រទេស ដើម្បីរួមចំណែកលើកស្ទួយវិស័យអប់រំ និងធនធានមនុស្សនៅកម្ពុជា។ ប្រាសាក់បានឆ្លើយតបត្រូវនឹងតម្រូវការរបស់ក្រសួង ដែលត្រូវការអគារបណ្ណាល័យស្ដង់ដារដាច់ដោយឡែក នៅតាមសាលារៀននានា ដែលបំពាក់ដោយសៀវភៅ និងសម្ភារបរិក្ខារគ្រប់គ្រាន់ ដែលកាលពីមុនសាលារៀន ត្រូវយកបន្ទប់នៃអគារសិក្សា ឬអគារទីចាត់ការមួយផ្នែក មកធ្វើជាបណ្ណាល័យ ដែលមានលក្ខណៈតូចចង្អៀតមិនអំណោយផលដល់ការអាន។
លោក ព្រឹម រដ្ឋា អភិបាលរងខេត្តកំពង់ធំ ក៏បានមានប្រសាសន៍ថ្លែងអំណរគុណ ចំពោះប្រាសាក់ដែលបានផ្ដល់ជាអគារបណ្ណាល័យរហូតដល់ ៧ ខ្នង ដល់ទឹកដីខេត្តកំពង់ធំ។ លោកសង្ឃឹមថាសិស្សានុសិស្សទាំងអស់ នៅតាមបណ្ដាសាលារៀនទាំងនេះ នឹងខិតខំរៀនសូត្រ បង្កើនសមត្ថភាព និងចំណេះដឹងខ្លួន តាមរយៈការចូលអាននៅក្នុងបណ្ណាល័យ ក៏ដូចជាការខ្ចីសៀវភៅ យកទៅអាននៅផ្ទះ ហើយលោក ព្រឹម រដ្ឋា ក៏បានអំពាវនាវឱ្យសិស្សានុសិស្ស ត្រូវចេះចូលរួមថែរក្សា បណ្ណាល័យនេះ បានល្អគង់វង្សរហូតទៅ។
មានប្រសាសន៍សំណេះសំណាលនៅក្នុងពិធីនេះ លោក ជា ចាន់តូ អគ្គទេសាភិបាលធនាគារជាតិនៃកម្ពុជា បានថ្លែងអំណរគុណយ៉ាងជ្រាលជ្រៅ ចំពោះប្រាសាក់ ដែលបានផ្តល់សមិទ្ធផល អគារបណ្ណាល័យទាំងនេះ ដែលជាផ្នែកមួយយ៉ាងសំខាន់ក្នុងការអប់រំ ព្រោះការអភិវឌ្ឍប្រទេសជាតិ គឺផ្អែកទៅលើការអភិឌ្ឍធនធានមនុស្សជាចាំបាច់។ លោក ជា ចាន់តូ បន្តថា វិស័យមីក្រូហិរញ្ញវត្ថុអាចរីកចម្រើនទៅបាន អាស្រ័យលើចំណេះដឹងរបស់អតិថិជន ជាពិសេសចំណេះដឹងផ្នែកហិរញ្ញវត្ថុ និងចំណេះដឹងផ្នែកជំនួញជួញដូរ ដោយពួកគាត់ត្រូវចេះគិត ចេះពិចារណា ចេះប្រកបរបរ និងចេះប្រើប្រាស់កម្ចីឱ្យបានត្រឹមត្រូវទើបទទួលបានជោគជ័យនិងរីកចម្រើន។ លោក ជា ចាន់តូ បន្តដូច្នេះ៖«ពេលអតិថិជនទទួលបានបានជោគជ័យ នោះទើបស្ថាប័នមីក្រូហិរញ្ញវត្ថុ ទទួលបានជោគជ័យដែរ។ ហេតុនេះ យើងត្រូវខិតខំក្រេបយកចំណេះដឹង តាមរយៈការស្ដាប់ គិត សួរ និងសរសេរ (សុ ចិ បុ លិ) ព្រមទាំងការអានផងដែរ។ ដូចនេះសិស្សានុសិស្ស អាចស្រាវជ្រាវ និងបង្កើនចំណេះដឹងបន្ថែម តាមរយៈបណ្ណាល័យនេះ»។
លោក ជា ចាន់តូ ក៏បានលើកឡើងផងដែរថា សមិទ្ធផលដែលបានកើតឡើងនៅពេលនេះ គឺកើតឡើងដោយសារសុខសន្តិភាព និងស្ថិរភាពនយោបាយ នៅប្រទេសកម្ពុជាដែលផ្ដល់ឱកាសឱ្យយើងបានរៀនសូត្រ និងប្រកបរបរទទួលទានចិញ្ចឹមជីវិត បានដោយសុខដុមរមនា។ លោក ចាន់តូ បានផ្ដាំផ្ញើសិស្សានុសិស្សទាំងអស់ ត្រូវខិតខំរៀនសូត្រ ពង្រឹងសមត្ថភាព និងត្រូវស្រលាញ់ចូលចិត្តការអាន ដើម្បីអនាគតដ៏ភ្លឺស្វាង។
អំពីប្រាសាក់ និងគម្រោងបណ្ណាល័យប្រាសាក់
ប្រាសាក់ ជាគ្រឹះស្ថានមីក្រូហិរញ្ញវត្ថុលំដាប់ទីមួយ ក្នុងវិស័យមីក្រូហិរញ្ញវត្ថុ និងជាស្ថាប័នមួយ ក្នុងចំណោមធនាគារធំៗ ទាំង ៥ នៅកម្ពុជា ដោយផ្តល់សេវាហិរញ្ញវត្ថុជូនដល់អតិថិជន រួមមាន៖ សេវាឥណទាន ប្រាក់បញ្ញើសន្សំ ទូទាត់វិក្កយបត្រទឹក ទូទាត់វិក្កយបត្រភ្លើង សេវាហិរញ្ញវត្ថុឌីជីថល ផ្ទេរប្រាក់ ដកប្រាក់ តាមម៉ាស៊ីនអេធីអឹមប្រាសាក់ ទោះជាគ្មានប័ណ្ណអេធីអឹម ប្តូរប្រាក់ ទិញកាតទូរស័ព្ទ បើកប្រាក់បៀវត្ស សេវាទូទាត់រហ័ស អេធីអឹម សេវាធនាគារចល័ត ម៉ាស៊ីនឆូតកាត ម៉ាស៊ីនដាក់ប្រាក់ សេវាខេមបូឌានស៊ែរស្វ៊ីច (CSS) សេវាទូទាត់ប្រព័ន្ធបាគង និងសេវាហិរញ្ញវត្ថុដទៃផ្សេងៗទៀត ជាមួយនឹងបណ្តាញការិយាល័យជិត ២០០ទីតាំង ព្រមទាំងបុគ្គលិកជិត ៩,០០០នាក់។
ស្របតាមទស្សនវិស័យ និងបេសកកម្មរបស់ខ្លួន ក៏ដូចជាដើម្បីថ្លែងអំណរគុណចំពោះអតិថិជនដែលបានគាំទ្រនិងប្រើប្រាស់ផលិតផលនិងសេវារបស់ប្រាសាក់នាពេលកន្លងមក ប្រាសាក់បានបង្កើតនិងចូលរួមកម្មវិធីសង្គមជាច្រើន ដូចជា កម្មវិធីជំនួយសង្គ្រោះបន្ទាន់សម្រាប់គាំពារអតិថិជនដែលទទួលរងផលប៉ះពាល់ពីគ្រោះមហន្តរាយធម្មជាតិនិងគ្រោះថ្នាក់ផ្សេងៗ កម្មវិធីមនុស្សធម៌ និងការឧបត្ថម្ភសកម្មភាពសង្គមនានា ជាពិសេសនោះគឺការចូលរួមចំណែកបណ្ដុះវប្បធម៌អាន តាមរយៈ «គម្រោងបណ្ណាល័យប្រាសាក់»។
សម្រាប់អគារបណ្ណាល័យនៅវិទ្យាល័យទាំង ៤ នេះស្ថិតក្នុងចំណោមអគារបណ្ណាល័យទាំងអស់ ៤១ ខ្នង ដែលប្រាសាក់បានសាងសង់ជូនបណ្ដាសាលារៀននានានៅទូទាំងកម្ពុជា។ ប្រាសាក់មិនត្រឹមតែផ្ដល់តួអគារបណ្ណា ល័យប៉ុណ្ណោះទេ គឺថែមទាំងឧបត្ថម្ភការបំពាក់ធនធានសម្ភារៈឯកសារ និងការបណ្ដុះបណ្ដាលបណ្ណារក្សថែមទៀតផងដើម្បីឱ្យបណ្ណាល័យនេះដំណើរការបានដោយរលូន ក្រោមកិច្ចសហការពីនាយកដ្ឋានអភិវឌ្ឍកម្មវិធីសិក្សា នៃក្រសួងអប់រំ យុវជន និងកីឡា។
អគារបណ្ណាល័យនេះ ជានិមិត្តរូបមិនចេះរីងស្ងួត និងមិនចេះសាបសូន្យនៃទំនាក់ទំនង និងការយកចិត្តទុកដាក់ចំពោះគ្នាទៅវិញទៅមក រវាងគ្រឹះស្ថានមីក្រូហិរញ្ញវត្ថុ ប្រាសាក់ និងអតិថិជន ក៏ដូចជាប្រជាជនក្នុងសហគមន៍ទាំងមូល ហើយបណ្ណាល័យនេះក៏ជាកេរមរតករបស់ប្រាសាក់សម្រាប់ទុកជូនសិស្សានុសិស្សដែលជាកូនចៅរបស់ប្រជាពលរដ្ឋក្នុងសហគមន៍ទាំងបច្ចុប្បន្ន និងអនាគត៕
(អត្ថបទពាណិជ្ជកម្ម)