ភ្នំពេញ៖ ពីពិធីចែកសញ្ញាបត្រដល់និស្សិតពេទ្យជាង២០០០នាក់ នៅព្រឹកថ្ងៃទី១៦ ធ្នូនេះ សម្ដេចនាយករដ្ឋមន្ត្រី ហ៊ុន សែន បានផ្ដាំឱ្យគ្រូពេទ្យទាំងអស់ គោរពក្រមសីលធម៌ និងវិជ្ជាជីវៈគ្រូពេទ្យឱ្យបានខ្ជាប់ខ្លួន ក្នុងការព្យាបាលអ្នកជំងឺ ដោយមិនត្រូវមើលឃើញតែលុយនោះទេ។
«ទោះបីជាគ្រូពេទ្យក្នុងផ្នែករដ្ឋ ឬគ្រូពេទ្យក្នុងវិស័យឯកជន កុំយកលុយជាធំ គឺត្រូវយកជីវិតប្រជាជនធ្វើជាធំ»។ នេះជាការលើកឡើងរបស់សម្ដេច ហ៊ុន សែន ដែលប្រាប់ឱ្យគ្រូពេទ្យព្យាបាលអ្នកជំងឺដោយយកចិត្តទុកដាក់ខ្ពស់ ទាំងអ្នកជំងឺជាអ្នកមាន និងជាក្រ។
សម្រាប់លោកនាយករដ្ឋមន្ត្រី ពលរដ្ឋក្រីក្រគួរតែទទួលបានការយកចិត្តទុកដាក់ព្យាបាលខ្ពស់បំផុត ដោយមិនត្រូវទុកពួកគេចោលនោះទេ។ «រឿងលុយ រឿងកាកទុកក្រោយ ហើយធ្វើយ៉ាងម៉េចព្យាបាលជំងឺ ដោះស្រាយបញ្ហា ព្រោះត្រូវការព្យាបាលឱ្យ(ពលរដ្ឋក្រីក្រ)គាត់សិន ហើយកុំឃើញថា គាត់អត់មានប្រាក់ បញ្ជូនគាត់ទៅកន្លែងផ្សេង»។ នេះជាការបញ្ជាក់របស់ប្រមុខរដ្ឋាភិបាល ដែលបានរម្លឹកថា តួនាទីគ្រូពេទ្យ គឺជួយសង្គ្រោះជីវិតមនុស្ស។
ថ្លែងពីបញ្ហាខាងលើនេះហើយ សម្ដេច ហ៊ុន សែន បានសង្កត់ធ្ងន់ថា បើសិនជាគ្រូពេទ្យមិនផ្លាស់ប្ដូរអត្តចរិក ដែលខ្វះក្រមសីលធម៌ និងគិតលើបញ្ហាលុយជាធំនោះទេ ទោះបីជាកន្លែងមន្ទីរពេទ្យនោះ បំពាក់ឧបករណ៍បរិក្ខាពេទ្យទំនើបល្អប៉ុណ្ណា ក៏វាគ្មានប្រសិទ្ធភាព ក្នុងការជួយសង្គ្រោះពលរដ្ឋដែរ។
សូមស្ដាប់សំឡេងនាយករដ្ឋមន្រ្តី៖
លោកនាយករដ្ឋមន្ត្រី ដែលកំពុងប្រមូលថវិកាសាងសង់មន្ទីរពេទ្យកាល់ម៉ែតនាពេលថ្មីៗនេះ បាននិយាយដូច្នេះថា៖«ការពិតហើយ ភាគច្រើន(គ្រូពេទ្យ) ដែលបានធ្វើ (គោរពវិជ្ជាជីវៈគ្រូពេទ្យ) ។ ប៉ុន្តែនៅ(ពេទ្យ)ចំនួនតិចតួចទេ (មិនគោរពវិជ្ជាជីវៈ) ដែលបង្កើតជាពាក្យថា ត្រីមួយត្រក ស្អុយមួយស្អុយទាំងអស់។ ចំណុចនេះហើយ ដែលខ្ញុំអំពាវនាវឱ្យមន្ត្រីសុខាភិបាល ឱ្យគ្រូពេទ្យរបស់យើង យកចិត្តទុកដាក់ទៅលើពាក្យសម្ដី ឥរិយាបថ ដែលប្រព្រឹត្តចំពោះអ្នកជំងឺ។ (ការព្យាបាល) គ្មានការបែងចែកនោះទេ ជីវិតមនុស្សមិនថាអ្នកមាន អ្នកក្រ គឺជាជីវិតមួយដូចគ្នា។ ហើយអ្នកក្រ គឺយើងត្រូវការយកចិត្តទុកដាក់ថែមទៀត ព្រោះដោយសារតែគាត់ក្រហើយបានជាគាត់មករកយើង»។
ត្រង់ចំណុចនេះ នាយករដ្ឋមន្ត្រី ហ៊ុន សែន បានលើកយកបញ្ហាជាក់ស្ដែងដែលសម្ដេច បានជួបលើករណីបុរសចំណាស់ម្នាក់មានជំងឺបេះដូងរីក និងស្ត្រីម្នាក់មានជំងឺក្បាលពោះរីកធំ ដែលត្រូវការព្យាបាលដែរ តែគ្មានលទ្ធភាពគ្រប់គ្រាន់សម្រាប់ចំណាយការព្យាបាល។ បញ្ហាអ្នកទាំងពីរនេះ ត្រូវបានសម្ដេច ហ៊ុន សែន អះអាងថា ពួកគេទទួលបានការព្យាបាលហើយ ក្រោយពីសម្ដេចបញ្ជាឱ្យមន្ទីរពេទ្យកាល់ម៉ែត យកចិត្តទុកដាក់ជួយពួកគេទាំងពីរ។
ងាកមកនិយាយពីបញ្ហាមន្ទីរពេទ្យឯកជនវិញ វាក៏មានចំណុចអវិជ្ជមាន ដែលប្រមុខរដ្ឋាភិបាលកត់សម្គាល់ឃើញផងដែរ។ ថ្លែងចំពោះមុខនិស្សិតពេទ្យបញ្ចប់ការសិក្សានោះ សម្ដេច ហ៊ុន សែន បាននិយាយថា ពេទ្យឯកជនខ្លះ ដឹងខ្លួនគ្មានលទ្ធភាពគ្រប់គ្រាន់ ក្នុងការព្យាបាលអ្នកជំងឺហើយ ប៉ុន្តែនៅតែព្យាយាមទុកអ្នកជំងឺនោះ ឱ្យនៅសម្រាកព្យាបាលក្នុងមន្ទីរពេទ្យខ្លួន ទាំងចំណាយអស់ថវិកាច្រើន រហូតដល់ស្ថានភាពជំងឺធ្ងន់ធ្ងរ ទើបបញ្ជូនទៅមន្ទីរពេទ្យរដ្ឋ។ បើតាមសម្ដេច ហ៊ុន សែន អ្នកជំងឺធ្ងន់ធ្ងរដែលចេញពីមន្ទីរពេទ្យឯកជន ទៅពេទ្យរដ្ឋនេះ ភាគច្រើនស្លាប់តែម្ដង ហើយពេទ្យរដ្ឋជាអ្នកប្រឈមមុខបញ្ហាស្តីបន្ទោសទៅវិញ។
«សូមឱ្យ(មន្ទីរពេទ្យឯកជន)មានការទទួលខុសត្រូវពីដើមដល់ចប់។ កុំឱ្យដល់ថ្នាក់សង្គ្រោះលែងបានហើយ មន្ទីរពេទ្យឯកជន បញ្ជូន(អ្នកជំងឺ)ទៅមន្ទីរពេទ្យរដ្ឋ ដល់តែងាប់ ងាប់នៅឯមន្ទីរពេទ្យរដ្ឋ ។ បើនិយាយឱ្យចំ មន្ទីរពេទ្យឯកជនដណ្ដើមអ្នកជំងឺយកទៅមើល ដល់ពេលសង្គ្រោះលែងបាន បញ្ជូនទៅមន្ទីរពេទ្យរដ្ឋ ហើយថា ទើបអាចរស់ តែពេលទៅដល់ងាប់នៅមន្ទីរពេទ្យ (ពលរដ្ឋ)ជេររដ្ឋបណ្ដោយ។ ហើយពេទ្យដែលធ្ងន់ធ្ងរជាងគេគឺកាល់ម៉ែតតែម្ដង ព្រោះមន្ទីរពេទ្យឯកជនដទៃ ដោះស្រាយបញ្ហា(អ្នកជំងឺ)មិនចេញ គេថាបញ្ជូនទៅកាល់ម៉ែតសង្គ្រោះបាន ដល់ទៅកាល់ម៉ែតងាប់បណ្ដោយ»។នេះជាការបញ្ជាក់របស់សម្ដេច ហ៊ុន សែន ដែលបញ្ជាឱ្យមានការគ្រប់គ្រងលើគ្លីនិកឯកជនឱ្យច្បាស់លើបញ្ហាព្យាបាលអ្នកជំងឺនេះ ព្រោះវាជាមូលហេតុដែលនាំឱ្យពលរដ្ឋតែងតែបន្ទោសដល់មន្ទីរពេទ្យរដ្ឋដែរ។
សម្រាប់លោកនាយករដ្ឋមន្ត្រី ហ៊ុន សែន គ្រូពេទ្យទាំងអស់ ត្រូវតាំងខ្លួនជា«គ្រូពេទ្យកោសខ្យល់»។ ក្នុងន័យនេះប្រមុខរដ្ឋាភិបាល បានឱ្យនិយមន័យថា «គ្រូពេទ្យកោសខ្យល់» គឺសំដៅទៅលើពេទ្យ ដែលយកចិត្តទុកដាក់ដោះស្រាយបញ្ហាប្រជាពលរដ្ឋឱ្យអស់លទ្ធភាព ហើយមិនគិតលុយជាធំនោះទេ៕