រថយន្ត
អន្តរជាតិ
មហាសេដ្ឋីវៀតណាម បង្ហាញមហិច្ឆតានាំរថយន្តវៀតណាមចូលទីផ្សារអាមេរិក
× លោក Pham Nhat Vuong មហាសេដ្ឋីលំដាប់កំពូលនៅអាស៊ីអាគ្នេយ៍ បានបង្ហាញពីមហិច្ឆតាដ៏ធំក្នុងការនាំរថយន្ត VinFast របស់វៀតណាម ចូលទៅកាន់ទីផ្សារអាមេរិក នាឆ្នាំ២០២១ ខាងមុខ។ នេះបើតាមការផ្សាយរបស់ Bloomberg។
ចាប់ផ្តើមដំណើរអស់ពេលជាង៦ខែមកហើយ VinFast ចង់បង្ហាញឥទ្ធិពលរបស់ខ្លួននៅក្នុងទីផ្សារយានយន្តប្រចាំតំបន់ និងនៅលើពិភពលោក។ លោក Pham Nhat Vuong ដែលម្ចាស់ក្រុមហ៊ុន Vingroup ត្រៀមវិនិយោគប្រាក់ផ្ទាល់ខ្លួនប្រមាណ២ពាន់លានដុល្លារអាមេរិក ដើម្បីនាំផលិតផលយានយន្តអគ្គិសនីរបស់ខ្លួនចូលទៅកាន់ទឹកដីអាមេរិក។
«គោលដៅរបស់យើងគឺបង្កើតឲ្យបានម៉ាក [Brand] អន្តរជាតិដ៏ល្បីល្បាញមួយ»។ លោក Vuong បានអះអាងយ៉ាងដូច្នេះក្នុងបទសម្ភាសមួយនៅទីស្នាក់ការក្រុមហ៊ុន Vingroup JSC នៅក្រុងហាណូយ ដោយលោកទទួលស្គាល់ថា ដំណើរការពិតជាពិបាក ប៉ុន្តែលោកមិនរាថយឡើយ។
វ័យ៥១ឆ្នាំ លោក Vuong ដែលមានកំណើតនៅខេត្តហៃហ្វុង ប្រទេសវៀតណាម មានទ្រព្យសម្បត្តិប្រមាណ ៩.១ពាន់លានដុល្លារអាមេរិក។ នេះបើតាមតាមសន្ទស្សន៍ Bloomberg Billionaires Index។ កាលពីឆ្នាំមុន លោកបានលក់ភាគហ៊ុនមួយចំនួននៅ Vingroup សម្រាប់ការវិនិយោគលើវិស័យយានយន្ត។ បច្ចុប្បន្ន លោក មានភាគហ៊ុន៤៩ភាគរយក្នុង VinFast រីឯនៅ Vingroup ដែលជាក្រុមហ៊ុនមេ លោកមាន៥១ភាគរយ។
ប្រតិបត្តិការលើផ្ទៃដី ៣៣៥ហិកតានៅក្រុងផៃហ្វុង ក្រុមហ៊ុន VinFast ត្រូវការសង្វាក់ផលិតផលយ៉ាងហោចណាស់១០០ ០០០រថយន្តក្នុង១ឆ្នាំ ដើម្បីប្រកួតប្រជែងលើទីផ្សារសកល ដោយបច្ចុប្បន្ន ក្រុមហ៊ុនមួយនេះ នៅតូចចង្អៀតនៅឡើយ
VinFast ផលិតរថយន្តប្រភេទតួទាប Hatchback, Sedan និង SUV ក្នុងតម្លៃទាប ចន្លោះពី១៧០០០ដុល្លារ ដល់៤៧ ៤០០ដុល្លារ និងឈានដល់ ៦០ ៤០០ដុល្លារអាមេរិក។ ចាប់ពីឆ្នាំ២០២៥ ក្រុមហ៊ុនដាក់គម្រោងផលិតឲ្យបាន ៥០០ ០០០គ្រឿងក្នុង១ឆ្នាំ៕
© រក្សាសិទ្ធិដោយ thmeythmey.com