ជាតិ
មេឃុំកំពង់ភ្លុក ៖ ក្រោយបានអំណាចពីពលរដ្ឋ យើងត្រូវរៀបចំឃុំ បម្រើសេវា និងផលប្រយោជន៍ជូនគាត់
× សៀមរាប៖ ឃុំកំពង់ភ្លុក ជាឃុំមួយដែលមានភូមិសាស្ត្រជាប់បឹងទន្លេសាប។ ឃុំនេះ បានក្លាយទៅជាគោលដៅទេសចរណ៍នៅក្នុងអំឡុងឆ្នាំ២០១០ ខណៈដែលប្រជាពលរដ្ឋជិត ៩០០គ្រួសារ ក្នុងនោះ៧០ភាគរយ មានមុខរបរជាអ្នកនេសាទ និង២៥ភាគរយ ជាអ្នកបើកកាណូតដឹកភ្ញៀវទេសចរណ៍។ មេឃុំកំពង់ភ្លុក លោក នឹង នី បានអះអាងថា ប្រជាពលរដ្ឋនៅក្នុងឃុំលោក មិនសូវចំណាកស្រុកនោះទេ ដោយសារពួកគេទទួលបានផលប្រយោជន៍ និងសេវាសាធារណៈល្អ ពីអាជ្ញាធរឃុំ។
ដើម្បីគ្រប់គ្រងលំហូរទេសចរ និងបម្រើផលប្រយោជន៍ដល់សហគមន៍នោះ ថ្នាក់ដឹកនាំឃុំ បានរៀបចំផែនការច្បាស់លាស់ ក្នុងការពង្រឹងការងារសន្តិសុខ និងការគ្រប់គ្រងអនាម័យ និងបរិស្ថាន។ ជាពិសេសការផ្ដល់សេវាសាធារណៈ និងផលលាភស្មើគ្នា សម្រាប់ប្រជាជនក្នុងសហគមន៍។ នេះជាការបញ្ជាក់របស់លោក នឹង នី មេឃុំកំពង់ភ្លុក ដែលបានរៀបចំកន្លែងអុំទូក កាណូតដឹកភ្ញៀវទេសចរ និងទីតាំងលក់ដូររួម សម្រាប់ពលរដ្ឋក្នុងសហគមន៍។
មេឃុំរូបនេះ បានអះអាងដូច្នេះថា៖«ក្រោយពីយើងបានអំណាចពីពលរដ្ឋ ពីព្រោះពួកគាត់ជាអ្នកលើកឱ្យយើងជាប្រធានក្រុមប្រឹក្សាឃុំ យើងត្រូវបម្រើសេវាសាធារណៈជូនពួកគាត់ និងរកផលប្រយោជន៍ជូនពួកគាត់»។
ជាបន្តសូមលោក-អ្នកនាងស្ដាប់កិច្ចសម្ភាសន៍រវាងលោក រំដួល ចិត្រា អ្នកសារព័ត៌មានថ្មីៗ និងលោក នឹង នី មេឃុំកំពង់ភ្លុក ស្ថិតនៅស្រុកប្រាសាទបាគង ខេត្តសៀមរាប ដូចតទៅ៖
ឃុំកំពង់ភ្លុកមានប្រជាពលរដ្ឋចំនួន ៨៦៤គ្រួសារ ស្មើនឹង៣៦៤៦នាក់។ ស្ថានភាពរស់នៅរបស់ប្រជាពលរដ្ឋក្នុងឃុំកំពង់ភ្លុក គឺ៧០ភាគរយជាអ្នកនេសាទ ,២៥ភាគរយជាអ្នកបើកកាណូតនិងទូកដឹកភ្ញៀវ និង៥ភាគរយទៀត ជាជាងជួសជុលកាណូត និងលក់ដូរបន្តិចបន្តួច។ តាមការបញ្ជាក់របស់លោកមេឃុំកំពង់ភ្លុក ប្រជាពលរដ្ឋក្នុងឃុំរបស់លោក កម្រមានអ្នកចំណាកស្រុកណាស់ ព្រោះថាពួកគេមានមុខរបរត្រឹមត្រូវនៅក្នុងមូលដ្ឋាន ដែលអាចផ្គត់ផ្គង់គ្រួសារបានសមរម្យ។
ភូមិកំពង់ភ្លុក បានក្លាយជាគោលដៅទេសចរណ៍ធម្មជាតិសំខាន់ នៅក្នុងខេត្តសៀមរាប ដែលអាចទាក់ទាញភ្ញៀវទេសចរច្រើនម៉ឹននាក់ ពីមួយឆ្នាំទៅមួយឆ្នាំ។ តួលេខនៅឆ្នាំ២០១៧កន្លងទៅ ភ្ញៀវទេសចរជាតិ និងអន្តរជាតិ ដែលចូលមកកម្សាន្តក្នុងភូមិធម្មជាតិមួយនេះ សរុបទាំងអស់មានប្រមាណ ៩ម៉ឺននាក់ ក្នុងនោះទេសចរអន្ដរជាតិមានជាង ៦ម៉ឺននាក់។
សព្វថ្ងៃនេះ សហគមន៍កាណូតដឹកភ្ញៀវទេសចរមានជ័យកំពង់ភ្លុក មានប្រជាពលរដ្ឋសរុប ៨៧នាក់ ដែលគិតជាទូកទាំងតូចនិងធំ មានជាង ៦០០គ្រឿង។ សម្រាប់កាណូតខ្នាតតូច មានតម្លៃ២០ដុល្លារ ចំណែកធំ មានតម្លៃ ៣៣ដុល្លារ។ ភ្ញៀវទេសចរ អាចគយគន់ទេសភាពនៅតាមដងទន្លេ និងព្រែក ផ្ទះផុតទឹកដែលមានសសរពី៦ម៉ែត្រ ទៅ៨ម៉ែត្រ ឬខ្ពស់ជាងនេះ ស្ថានភាពរស់នៅរបស់ពលរដ្ឋ និងការកម្សាន្តដោយជិះទូកនៅតាមព្រៃលិចទឹកជាដើម៕
Tag:
កំពង់ភ្លុក
ទេសចរណ៍
បរិស្ថាន
បឹងទន្លេសាប
សំរាម
© រក្សាសិទ្ធិដោយ thmeythmey.com