យុវតី ជិន ស្រីអយុធ្យា ចេះសរសេរអក្សរខ្មែរបុរាណ ៣សម័យកាល

ជាតិ

បទយកការណ៍ / បទសម្ភាសន៍

យុវតី ជិន ស្រីអយុធ្យា ចេះសរសេរអក្សរខ្មែរបុរាណ ៣សម័យកាល

17, Dec 2019 , 8:59 am

រូបភាព

ដោយ: សែម វណ្ណា (Sem Vanna)

ភ្នំពេញ៖ ក្រៅពីមានជំនាញគំនូរបុរាណ យុវតី ជិន ស្រីអយុធ្យា ចេះសរសេរអក្សរបុរាណខ្មែរដល់ទៅ ៣សម័យកាល គឺ សម័យមុនអង្គរ សម័យអង្គរ និងក្រោយអង្គរ។ យុវតីវ័យ ១៨ឆ្នាំរូបនេះ កំពុងបន្តការសិក្សា ផ្នែករចនាក្រាហ្វិក នៅ សាកលវិទ្យាល័យភូមិន្ទវិចិត្រសិល្បៈ ក្រោយបញ្ចប់ថ្នាក់គំនូរបុរាណ នៅសាលាមធ្យមវិចិត្រសិល្បៈ។ ជាវិចិត្រករគំនូរបុរាណ ដ៏មានទេពកោសល្យម្នាក់ យុវតីសម្បុរស្រអែមរូបនេះ ទទួលបានការគាំទ្រយ៉ាងច្រើន ក្រោយនាងបានផ្សព្វផ្សាយស្នាដៃគំនូរបុរាណ ខ្មុកស្មាច់ និងអក្សរបុរាណ នៅលើបណ្តាញសង្គមហ្វេសប៊ុក។ ការគាំទ្រដ៏ច្រើននេះ បានជំរុញឲ្យអយុធ្យា កាន់តែខិតខំឈ្វេងយល់ និងហ្វឹកហាត់សរសេរអក្សរបុរាណ និងកំពុងចែករំលែកចំណេះដឹងនេះជាបន្តបន្ទាប់ដល់យុវជនជំនាន់ក្រោយទៀតផង។

អត្ថបទទាក់ទង
ទោះបីគ្មានទីផ្សារ កញ្ញា អយុធ្យា នៅតែស្រឡាញ់របរគំនូរបុរាណ

សូមអញ្ជើញទស្សនាវីដេអូដូចខាងក្រោម៖

មានយុវជនខ្មែរវ័យក្មេងមិនច្រើនឡើយ ដែលអាចអាន និងសរសេរអក្សរខ្មែរបុរាណបាន។ យុវតី ជិន ស្រីអយុធ្យា ចេះសរសេរអក្សរបុរាណដល់ទៅ ៣សម័យកាល គឺសម័យមុនអង្គរ សម័យអង្គរ និងក្រោយអង្គរ។ មិនមែនជាសិស្សនិស្សិតជំនាញអក្សរសាស្ត្រខ្មែរ ប៉ុន្តែ យុវតី ស្រីអយុធ្យា វ័យ១៨ឆ្នាំ គឺជាវិចិត្រករគំនូរបុរាណដ៏ចំណានម្នាក់។ បច្ចុប្បន្ន នាងកំពុងបន្តការសិក្សាផ្នែករចនាក្រាហ្វិក នៅសាកលវិទ្យាល័យភូមិន្ទវិចិត្រសិល្បៈ។

មានអាកប្បកិរិយាសុភាព ស្ងប់ស្ងាត់ ស្រីអយុធ្យា ដែលមានឪពុកជាសិល្បករ និងជាអ្នកដឹកភាពយន្តផង រៀបរាប់ប្រាប់សារព័ត៌មានថ្មីៗ២៥ថា ការសរសេរអក្សរខ្មែរ មានក្បាច់ និងម៉ូដ របស់ខ្លួនស្រដៀងនឹងអក្សរបុរាណខ្មែរនោះទេ។ យុវតី ជិន ស្រីអយុធ្យា លើកឡើងដូច្នេះថា៖«កាលឆ្នាំ២០១៧ ខ្ញុំរៀននៅសាលាធម្យម អ្នកគ្រូហៅមេរៀនលឿនពេក ហើយខ្ញុំកត់មិនទាន់ទេ។ ពេលហ្នឹងខ្ញុំសរសេរអក្សមានក្បាច់ និងម៉ូដហើយខ្ញុំថតផុសលើបណ្ដាញសង្គម មានការសរសើរ និងចែករំលែកច្រើន។ ខ្ញុំឆ្ងល់ ក៏ទៅសួរសិស្សច្បង អក្សរខ្ញុំហ្នឹងបែបណា បានជាមានការចាប់អារម្មណ៍ច្រើន? សិស្សច្បងខ្ញុំ និយាយថា អក្សរប្អូនឯង ដូចអក្សរសម័យបុរាណ និងកណ្ដាល»។

វិវឌ្ឍន៍ពីការសរសេរអក្សរលេង និងផ្សព្វផ្សាយតាមបណ្តាញសង្គម រហូតអាចសរសេរអក្សរខ្មែរបុរាណបានចាប់ពីសតវត្សរ៍ទី៦ ដល់សតវត្សរ៍ទី១៣ យុវតីស្រអែមស្រស់រូបនេះ ពន្យល់ថានាងព្យាយាមសិក្សាអក្សរបុរាណ ព្រោះចង់បំផុសស្មារតីយុវជនខ្មែរជំនាន់ក្រោយ ឲ្យស្រឡាញ់អក្សរខ្មែរ ដ្បិតនាងបានឃើញយុវវជនជាច្រើន សរសេរពាក្យខ្មែរមិនត្រឹមត្រូវ។ «គោលបំណងរបស់ខ្ញុំ គឺចង់យកអ្វីដែល បុរាណចាស់ពីមុន មកបំផុសឲ្យយើងទាំងអស់គ្នា បានស្គាល់។ ខ្ញុំចូលចិត្តចែករំលែក។ ប្រសិនបើនរណាម្នាក់ចង់ដឹង ចង់រៀនពីការសរសេរអក្សរ ខ្ញុំអាចប្រាប់ និងបង្រៀនគាត់បាន»។ យុវតី ជិន ស្រីអយុធ្យា អះអាងដូច្នេះ។

ចេះសរសរអក្សរបុរាណនៅលើក្រដាស ឬផ្ទាំងគំនូរហើយ ស្រីអយុធ្យា មានបំណងរៀនសូត្របន្ថែមពីអក្សរបុរាណ និងរបៀបសរសេរលើស្លឹករឹតបន្ថែមទៀត ព្រោះនាងចង់ ចារអក្សររបស់ខ្លួននៅលើស្លឹករឹត។ ទន្ទឹមនឹងបំណងនេះ យុវតី ជិន ស្រីអយុធ្យា ក៏ស្នើឲ្យក្រសួងវប្បធម៌ និងវិចិត្រសិល្បៈ គ្រឹះស្ថានសិក្សារបស់រដ្ឋ ឬស្ថាប័នពាក់ព័ន្ធ ដាក់បង្ហាញប្រភេទអក្សរបុរាណ ដើម្បីឲ្យសិស្សានុសិស្សបានស្គាល់ និងយល់ពីអក្សរបុរាណខ្មែរ ដែលដូនតាបានបន្សល់ទុក៕