ពីនេះ ពីនោះ
ព័ត៍មានសុខភាព
×![]()
ដោយ: ថ្មីៗ
ការបន្សាបជាតិពុលពីក្នុងពោះវៀន គឺចាំបាច់ណាស់ដើម្បីអនុញ្ញាតឱ្យប្រព័ន្ធរំលាយអាហាររបស់អ្នកដំណើរការកាន់តែមានប្រសិទ្ធភាពផ្ដល់ឱ្យអ្នកនូវសុខភាពរឹងមាំ ស្រកទម្ងន់ និងមានថាមពល។ ប៉ុន្តែថាតើអ្នកអាចលាងសម្អាតបន្សាបជាតិពុលចេញពីពោះវៀនបានដោយរបៀបណាទៅ? ភាគច្រើននៃពួកយើងប្រហែលជាមិនធ្លាប់ដឹងទេថារបបអាហារអាចបន្សាបជាតិពុលពីក្នុងពោះវៀនបានយ៉ាងងាយ។ថាតើអាហារអ្វីខ្លះទៅដែលមានប្រសិទ្ធភាពកម្ចាត់ជាតិពុល? 
កុំបារម្ភ! ថ្ងៃនេះយើង នឹងបង្ហាញឱ្យដឹងពីអ្វីដែលអ្នកគួរទទួលទានដើម្បីបន្សាបជាតិពុលក្នុងពោះវៀន ៖
១. ទឹក
ការទទួលទានទឹកបានច្រើនគ្រប់គ្រាន់ គឺជាវិធីដ៏ងាយបំផុតមួយដើម្បីសម្អាតពោះវៀនរបស់អ្នក។ ទឹកចាំបាច់ណាស់សម្រាប់ការរំលាយជាតិសរសៃបានត្រឹមត្រូវ។ ដូច្នេះប្រសិនបើអ្នកទទួលទានអាហារសម្បូរដោយជាតិសរសៃច្រើន ប៉ុន្តែទទួលទានទឹកតែបន្តិចនោះអ្នកនឹងជួបប្រទះបញ្ហាពិបាករំលាយអាហារ ឬទល់លាមកជាមិនខាន។ ដើម្បីកម្ចាត់សំណល់លោហៈនិងជាតិពុល ហើយរក្សាបាននូវសុខភាពពោះវៀន ក៏ដូចជារាងកាយទាំងមូលល្អប្រសើរ ចូរព្យាយាមទទួលទានទឹកឱ្យបានយ៉ាងហោចណាស់ ៨ កែវ ឬប្រមាណ ២ លីត្រក្នុងមួយថ្ងៃ។
២. តែខ្ញី
ចូរទទួលទានតែខ្ញី ១ ពែងអោយបានពី ២ ទៅ ៣ ដងក្នុងមួយថ្ងៃដើម្បីកម្ចាត់កាកសំណល់ ក៏ដូចជាជាតិពុលផ្សេងៗចេញពីក្នុងពោះវៀន។ មិនត្រឹមតែជួយលាងសម្អាតពោះវៀនកម្ចាត់ជាតិពុលប៉ុណ្ណោះទេ ប៉ុន្តែតែខ្ញីក៏ជួយព្យាបាលការរលាកក្នុងពោះវៀន និងធ្វើអោយសុខភាពពោះវៀនកាន់តែប្រសើរឡើងតាមរយៈលក្ខណៈសម្បត្តិប្រឆាំងការរលាក និងសារធាតុ Gingerols ដែលវាមានផ្ទុកផងដែរ។
៣. រមៀត
រមៀតមានផ្ទុកសម្បូរទៅដោយសារធាតុប្រឆាំងអុកស៊ីតកម្ម ពិសេសសារធាតុ Curcumin ដែលជួយបន្សាបជាតិពុលគួរអោយកត់សម្គាល់។
៤. ផ្លែប៉ោម
ផ្លែប៉ោមប្រសើរណាស់សម្រាប់សុខភាពរាងកាយទាំងមូល រួមទាំងពោះវៀនដោយវាមានផ្ទុកសម្បូរទៅដោយសារធាតុចិញ្ចឹមល្អៗ ជាតិសរសៃ និងវីតាមីន C ដែលសារធាតុប្រឆាំងអុកស៊ីតកម្មជួយកម្ចាត់ពពួកបាក់តេរីអាក្រក់ ហើយបង្កើនចំនួនបាក់តេរីល្អជំនួសវិញធ្វើអោយឲ្យមុខងារពោះវៀនកាន់តែប្រសើរឡើង។
៥. បន្លែបៃតង
ជាប្រភពដ៏ប្រសើរនៃជាតិសរសៃដែលជាសារធាតុចិញ្ចឹមចាំបាច់ជួយក្នុងការសម្អាតពោះវៀនធំបង្កើនការរំលាយអាហារ។ បន្លែបៃតងក៏មានផ្ទុកសម្បូរទៅដោយជាតិរ៉ែនិងសារធាតុប្រឆាំងអុកស៊ីតកម្មដែលកម្ចាត់ជាតិពុលផ្សេងៗចេញពីរាងកាយ។ ប្រសិនបើអ្នកងាយនឹងជួបប្រទះបញ្ហាទាក់ទងជាមួយការរំលាយអាហារ កុំទទួលទានបន្លែឆៅដោយចាំបាច់ត្រូវចម្អិនជាមុនសិនទើបប្រសើរ។
៦. គីមឈី
គ្រឿងផ្សំចម្បងនៃគីមឈី គឺស្ពៃបូកគោដែលបន្លែនេះមានប្រសិទ្ធភាពបន្សាបជាតិពុលផ្សេងៗពីក្នុងរាងកាយបានយ៉ាងប្រសើរ។ ដូច្នេះការទទួលទានគីមឈីអាចជួយកម្ចាត់ជាតិពុលនិងកាកសំណល់ពីក្នុងរាងកាយ ក៏ដូចជាពោះវៀន។ ហើយប្រព័ន្ធរាងកាយគ្មានជាតិពុលនឹងជំរុញការស្រូបយកសារធាតុចិញ្ចឹមបានកាន់តែប្រសើរ។
៧. ផ្លែបឺរ
ផ្លែបឺរមានផ្ទុកទាំងជាតិសរសៃរលាយ និងមិនរលាយដែលចាំបាច់ជួយជំរុញចលនាពោះវៀន កម្ចាត់ជាតិពុល និងដោះស្រាយបញ្ហាពិបាករំលាយអាហារ៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com
