ជ័យលាភីកម្មវិធីប្រគល់ពានរង្វាន់អចលនទ្រព្យប្រចាំឆ្នាំ ២០១៩ត្រូវបានប្រកាសជាផ្លូវការ

អចលនទ្រព្យ

អត្ថបទពាណិជ្ជកម្ម

17, Dec 2019 , 11:25 am

រូបភាព

ទីបំផុត កម្មវិធីដ៏អស្ចារ្យប្រចាំឆ្នាំ២០១៩ ដែលគ្រប់គ្នាទន្ទឹងរង់ចាំបានមកដល គឺកម្មវិធីប្រគល់ពានរង្វាន់អចលនទ្រព្យប្រចាំឆ្នាំ ២០១៩ ដែលត្រូវបានប្រារព្ធធ្វើ កាលពីថ្ងៃព្រហស្បតិ៍ ទី១២ ខែធ្នូ ឆ្នាំ២០១៩កន្លងទៅ នៅសណ្ឋាគារ សូហ្វីតែលភ្នំពេញ។ វាគឺជារាត្រីមួយដ៏អស្ចារ្យ និង សំខាន់បំផុត សម្រាប់វិស័យអចនលទ្រព្យនៅក្នុងប្រទេសកម្ពុជា ហើយក៏ជារាត្រីនៃការជួបជុំពិភាក្សាគ្នា និងផ្លាស់ប្ដូរយោបល់គ្នាមួយដ៏សំខាន់ សម្រាប់អ្នកមានអាជីពក្នុងវិស័យអចលនទ្រព្យ ក៏ដូចជាឆ្លុះបញ្ចាំង អំពីភាពជោគជ័យដែលពួកគេសម្រេចបាន ក្នុងឆ្នាំ ២០១៩នេះ។

ភ្ញៀវកិត្តិយសជាង៤០០នាក់ បានចូលរួមនៅក្នុងកម្មវិធីនេះ រួមមានមន្ត្រីរាជរដ្ឋាភិបាល អ្នកអភិវឌ្ឍគម្រោងអចលនទ្រព្យ វិនិយោគិន និងអ្នកជំនាញផ្នែកអចលនទ្រព្យ ដើរលើកម្រាលព្រំពណ៌ក្រហម ទៅកាន់សាលធំនៃសណ្ឋាគារសូហ្វីតែល ជាកន្លែងរៀបចំកម្មវិធីពិសាអាហារពេលល្ងាចជុំគ្នា និងការប្រកាសជាផ្លូវការជ័យលាភី នៃកម្មវិធីប្រគល់ពានរង្វាន់អចលនទ្រព្យកម្ពុជាប្រចាំឆ្នាំ ២០១៩។

ខណៈដែលគ្រប់គ្នាកំពុងសប្បាយរីករាយ ក្នុងការទទួលទានស្រាក្រហម និងម្ហូបដែលត្រូវបានរៀបចំឡើងយ៉ាងពិសេស សម្រាប់រាត្រីដ៏អស្ចារ្យនោះ អ្នកចូលរួមកម្មវិធីទាំងអស់ ក៏មានឱកាសធ្វើជាសាក្សី និងអបអរជាមួយអ្នកឈ្នះពានរង្វាន់អចលនទ្រព្យឆ្នាំ២០១៩ទាំងអស់។ ឈ្មោះរបស់ជ័យលាភី ត្រូវបានប្រកាសម្ដងមួយៗ និងទទួលបានការទទួលស្គាល់ ចំពោះភាពជោគជ័យ និងកិច្ចខំប្រឹងប្រែងរបស់ពួកគេនៅក្នុងវិស័យអចលនទ្រព្យ ដែលជួយជំរុញឲ្យពួកគេឈ្នះពានរង្វាន់ ទាំងអស់នេះ។

អ្នកឈ្នះទាំង២៦នាក់ មកពីក្រុមហ៊ុនអចលនទ្រព្យ ដែលមានឈ្មោះបោះសំឡេងក្នុងប្រទេសកម្ពុជា ត្រូវបានប្រកាសជាផ្លូវការនៅក្នុងរាត្រីនោះ ហើយពួកគេត្រូវបានផ្តល់ឲ្យ នូវពានរង្វាន់ជានិមិត្តរូបមួយ ត្រានៃកម្មវិធីប្រគល់ពានរង្វាន់ ផ្លាកតំណាងមួយ ដែលបញ្ជាក់ពីភាពជោគជ័យរបស់ជ័យលាភីម្នាក់ៗ និងក្រុមហ៊ុនរបស់ពួកគេ។

ក្រុមហ៊ុន CPL Cambodia Properties Limited និងក្រុមហ៊ុន CBRE Cambodia ក្រុមហ៊ុនទាំងពីរមានកិតិ្តយសឈ្នះ ពានរង្វាន់ជាក្រុមហ៊ុនភ្នាក់ងារអចលនទ្រព្យឆ្នើមប្រចាំឆ្នាំ ២០១៩ សម្រាប់ប្រភេទ សហគ្រាស ហើយក្រុមហ៊ុន Yi Fung Real Estate ឈ្នះពានរង្វាន់ជាក្រុមហ៊ុន ភ្នាក់ងារអចលនទ្រព្យឆ្នើមប្រចាំឆ្នាំ២០១៩ សម្រាប់ប្រភេទ សាជីវកម្ម។

ក្រុមហ៊ុនដែលទទួលបានពានរង្វាន់ច្រើនជាងគេ សម្រាប់កម្មវិធីប្រគល់ពានរង្វាន់អចលនទ្រព្យឆ្នាំ ២០១៩គឺ ក្រុមហ៊ុន CBRE Cambodia ដែលឈ្នះពានរង្វាន់រហូតដល់ ៨ពាន ហើយក្រុមហ៊ុនដែលឈ្នះពានច្រើនជាងគេបន្ទាប់ គឺក្រុមហ៊ុន Yi Fung Real Estate ដែលឈ្នះចំនួន ៥ ពានរង្វាន់ ខណៈ ដែលក្រុមហ៊ុន CPL Cambodia Properties Limited និង Amatak Property Service ឈ្នះពានចំនួន២ រៀងៗខ្លួន។

កម្មវិធីប្រគល់ពានរង្វាន់អចលនទ្រព្យឆ្នាំ ២០១៩ នេះគឺជាឆ្នាំទីពីរនៃកម្មវិធីនេះ ដែលត្រូវបានរៀបចំ ឡើងដោយក្រុមហ៊ុន Realestate.com.kh ដោយមានការសហការគ្នាជាមួយ ក្រសួងសេដ្ឋកិច្ច និងហិរញ្ញវត្ថុ និងសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា។

កម្មវិធីប្រគល់ពានរង្វាន់នេះ ត្រូវបានបង្កើតឡើង ដើម្បីអបអរសាទរ និងទទួលស្គាល់នូវកិច្ចខំប្រឹងប្រែងរបស់ក្រុមហ៊ុន និងភ្នាក់ងារអចលនទ្រព្យ ដែលមានប្រជាប្រិយភាពនៅក្នុងប្រទេស ទាំំងអស់ ក្នុងការលើកកម្ពស់ស្តង់ដារ និងការអនុវត្តប្រកបដោយវិជ្ជាជីវៈ ក្នុងវិស័យអចលនទ្រព្យក្នុងប្រទេសកម្ពុជា។ ជាមួយគ្នានេះដែរ កម្មវិធីនេះត្រូវបានបង្កើតឡើងក្នុងបំណងជួយធ្វើឲ្យប្រសើរឡើង ចំពោះវិស័យអចលនទ្រព្យរបស់កម្ពុជា តាមរយៈការទទួលស្គាល់នូវភាពជោគជ័យរបស់អ្នករាល់គ្នា នៅក្នុងវិស័យនេះ ដោយសុក្រិត ស្មើភាពគ្នា និងរាប់បញ្ចូលអ្នកគ្រប់គ្នាទាំងអស់ តាមរយៈការអនុញ្ញាតឲ្យរាល់ក្រុមហ៊ុនទាំងអស់ អាចដាក់ពាក្យចូលរួមប្រកួតបានដោយមិនគឺពីទំហំ និងទ្រព្យសម្បត្តិសកម្មរបស់ពួកគេ។

ថ្លែងបើកកម្មវិធីនេះ លោក Thomas O’Sullivan នាយកប្រតិបត្តិក្រុមហ៊ុន Realestate.com.kh បានមានប្រសាសន៍ថា៖«ខ្ញុំអាចប្រាប់អ្នកទាំងអស់គ្នាបានថា យើងទទួលបានការដាក់ពាក្យចូលរួម ច្រើនជាង១០០ ដែលចំនួននេះគឺជាចំនួនកើនឡើងទ្វេដង ប្រៀបធៀបជាមួយចំនួនពាក្យ ដែលយើងទទួលបានកាលពីឆ្នាំ២០១៨។ ខ្ញុំសូមថ្លែងអំណរគុណ ទៅដល់អ្នករាល់គ្នា ដែលបានចំណាយពេលវេលា ក្នុងការថតជាវីដេអូ និងរៀបចំពាក្យចូលរួមប្រកួត»។

«កត្តាជំរុញមួយដ៏សំខាន់ ក្នុងការរៀបចំឲ្យមានកម្មវិធីនេះឡើង គឺការជួយផ្សព្វផ្សាយអំពីវិស័យនេះជាទូទៅ ហើយកត្តាមួយដែលសំខាន់ជាងគេបំផុតនោះ គឺការផ្សព្វផ្សាយទៅកាន់ពិភពលោកអំពីកម្រិតវិជ្ជាជីវៈ នៃវិស័យអចលនទ្រព្យរបស់កម្ពុជា។ តាមរយៈការប្រគល់ពានរង្វាន់ទៅដល់ក្រុមហ៊ុន និងភ្នាក់ងារអចលនទ្រព្យ ដែលកំពុងដំណើរការដោយមានច្បាប់អនុញ្ញាតគ្រប់គ្រាន់ នឹងជួយជំរុញឲ្យអ្នករកទិញ និងលក់អចលនទ្រព្យទាំងអស់ រួមទាំងជនជាតិកម្ពុជា និងអន្តរជាតិ ឲ្យទទួលយកសេវាកម្មពីភ្នាក់ងារដែលមានវិជ្ជាជីវៈ។ ដូចអ្នករាល់បានឃើញហើយ កម្មវិធីនេះជួយបង្កើននូវភាពជឿជាក់ ទៅលើវិស័យអចលនទ្រព្យ ក្នុងប្រទេសកម្ពុជាក្នុងកម្រិតពិភពលោក»។ លោក Thomas បានបញ្ជាក់បន្ថែម។

ម្ចាស់ឧបត្ថម្ភកម្មវិធី

កម្មវិធីប្រគល់ពានរង្វាន់អចលនទ្រព្យឆ្នាំ២០១៩ ត្រូវបានរៀបចំឡើងដោយជោគជ័យដោយមានការចូល រួមឧបត្ថម្ភដោយម្ចាស់ឧបត្ថម្ភកម្មវិធីរបស់យើងរួមមាន៖ ម្ចាស់ឧបត្ថម្ភកម្មវិធីធំ ក្រុមហ៊ុនអភិវឌ្ឍអចលនទ្រព្យ AGILE NAKI PROPERTY CO., LTD, ចូលរួមឧបត្ថម្ភដោយ KH LAND និង សហការឧបត្ថម្ភដោយ LEVDEO, GARDEN One, Midea Cambodia, TNAOT App, Cellcard, CEO Master Club, Lumiere Residence, CHIEF BANK, និង SingMeng Telemedia។