ជាតិ
សេដ្ឋកិច្ច
ការទូទាត់ថ្លៃសេវាប្រមូលសំរាម នឹងត្រូវធ្វើឡើងតាមប្រព័ន្ធអេឡិចត្រូនិក ចាប់ពីដើមឆ្នាំ២០២០
× ភ្នំពេញ៖ ថ្លៃសេវាប្រមូលសំរាម នឹងត្រូវដកចេញពីវិក្កយបត្ររបស់អគ្គិសនីកម្ពុជា(EDC) ចាប់ពីថ្ងៃទី១មករា ឆ្នាំ២០២០តទៅ។ អំឡុងពេលអន្តរកាលនេះ ការទូទាត់ថ្លៃសេវាប្រមូលសំរាមប្រចាំខែ នឹងត្រូវធ្វើឡើងតាមប្រព័ន្ធទូទាត់អេឡិចត្រូនិក ធនាគារ ឬតាមភ្នាក់ងារវេរលុយនានា។ នេះបើតាមសេចក្តីណែនាំរបស់រដ្ឋបាលរាជធានីភ្នំពេញថ្ងៃទី១៦ ធ្នូ ឆ្នាំ២០១៩។
រដ្ឋបាលរាជធានីភ្នំពេញ បានផ្លាស់ប្ដូរប្រព័ន្ធគ្រប់គ្រង និងនីតិវិធីនៃការបង់ថ្លៃសេវាប្រមូលសំរាម និងសំណល់រឹង ក្នុងដំណាក់កាលអន្តរកាល ដោយអតិថិជន ត្រូវបង់ថ្លៃសេវាប្រមូលសំរាមតាមប្រព័ន្ធអេឡិចត្រូនិក(ទូរស័ព្ទដៃ) ឬបញ្ជរទូទាត់នៅធនាគារ ឬតាមភ្នាក់ងារវេរលុយ។
ជាមួយគ្នាដែរ ក្នុងអំឡុងពេលនេះ រដ្ឋាភិបាល អនុញ្ញាតឲ្យក្រុមហ៊ុន ស៊ីន ទ្រី បន្តសិទ្ធិប្រតិបត្តិការសំអាត ប្រមូល និងដឹកជញ្ជូនសំរាម និងសំណល់រឹងបណ្តោះអាសន្ន ប៉ុន្តែគ្មានសិទ្ធិប្រមូលថ្លៃសេវាសំអាត ប្រមូល និងដឹកជញ្ជូនសំរាម និងសំណល់រឹងនោះទេ។ ទន្ទឹមនឹងនេះ រដ្ឋាភិបាល សម្រេចរក្សាតម្លៃសេវាបច្ចុប្បន្នបណ្តោះអាសន្នសិន និងប្រើប្រាស់អត្រាតម្លៃប្រមូលសំរាមដែលបង់រួច កាលពីខែតុលា ឆ្នាំ២០១៩ ជាមូលដ្ឋានប្រើប្រាស់ក្នុងពេលអន្តរកាលនេះ ដែលរដ្ឋាករស្វ័យតគ្រប់គ្រងសំរាម និងសំណល់រឹងរាជធានីភ្នំពេញ ជាអ្នកដែលមានភារកិច្ចទទួលបន្ទុកលើការគ្រប់គ្រងការផ្តល់សេវាប្រមូលសំរាម និងសំណល់រឹង។
បើតាមតាមសេចក្តីណែនាំរបស់រដ្ឋបាលរាជធានីភ្នំពេញដដែល ចាប់ពីថ្ងៃទី១ មករា ឆ្នាំ២០២០ អតិថិជនត្រូវបង់ថ្លៃសេវាប្រចាំខែ ចាប់ពីថ្ងៃទី១ ដល់ថ្ងៃទី១៥ នៃខែបន្ទាប់ តាមមធ្យោបាយអេឡិចត្រូនិក ឬបញ្ជរទូទាត់នៅធនាគារ ឬភ្នាក់ងារទូទាត់ផ្សេងៗទៀត។ អតិថិជនក៏អាចជ្រើសរើសបង់ថ្លៃសេវាសម្រាប់ច្រើនខែទុកជាមុនបានផងដែរ ដោយប្រព័ន្ធទូទាត់នឹងកាត់កង និងបង្ហាញសមតុល្យទឹកប្រាក់នៅសល់ជាស្វ័យប្រវត្តិជារៀងរាល់ខែ។ ក្នុងករណីខកខាន មិនបានបង់ទូទាត់ក្រោយរយៈពេល១៥ថ្ងៃ នៃដំណាច់ខែនីមួយៗ នឹងត្រូវចាត់ទុកជាបំណុល។
សូមបញ្ជាក់ថា ពលរដ្ឋដែលធ្លាប់បង់ថ្លៃសេវាកម្មប្រមូលសំរាមតាមវិក្កយបត្រអគ្គិសនី ត្រូវគិតអត្រាតម្លៃដែលបានបង់កាលពីខែតុលា ឆ្នាំ២០១៩ និងលេខសម្គាល់(ID) ក្នុងវិក្កយបត្រអគ្គិសនី។ ចំណែកពលរដ្ឋដែលត្រូវបង់ថ្លៃសេវាឲ្យក្រុមហ៊ុនស៊ីនទ្រី ត្រូវបញ្ឈប់ការបង់ ដោយបង្វែរការបង់ថ្លៃសេវាកម្មទៅរដ្ឋាករស្វយ័ត្រគ្រប់គ្រងសំរាមរាជធានីភ្នំពេញ តាមប្រព័ន្ធអេឡិចត្រូនិកឬធនាគារ។ ដោយឡែក ពលរដ្ឋដែលមិនធា្លប់បង់ថ្លៃសេវាកម្ម ត្រូវយកលេខសម្គាល់ក្នុងវិក្កយបត្រអគ្គិសនី បង់តាមប្រព័ន្ធអេឡិចត្រូនិក ឬធនាគារ៕
Tag:
សំរាម
សេវាប្រមូលសំរាម
ប្រព័ន្ធទូទាត់
ហិរញ្ញវត្ថុ
© រក្សាសិទ្ធិដោយ thmeythmey.com