អ្នកនាំពាក្យក្រសួងការបរទេសចិនលោក Geng Shuang បានឆ្លើយតបទៅកាន់ Mesut Ozil ដែលរិះគន់ចិនជុំវិញការបង្ក្រាបជនជាតិមូស្លីមភាគតិចវីហ្គ័រនៅខេត្តស៊ីនជាំងថាខ្សែបម្រើ Arsenal រូបនេះទទួលបានព័ត៌មានក្លែងក្លាយ (Fake News) ប៉ុណ្ណោះ។ លោក Geng ថែមទាំងចង់បបួល Ozil ទៅមើលស្ថានភាពដ៏រីករាយពិតប្រាកដរបស់ប្រជាជន និងជនជាតិភាគតិចក្នុងខេត្តស៊ីនជាំងសព្វថ្ងៃទៀតផង។
Ozil ដែលមានដើមកំណើតតួកគី និងជាអ្នកកាន់សាសនាអ៊ីស្លាមផង បានថ្កោលទោសការបង្ក្រាបរបស់ចិន ទៅលើជនជាតិភាគតិចវីហ្គ័រ និងជនជាតិភាគតិចដទៃទៀត ក្នុងខេត្តស៊ីនជាំង ប្រទេសចិន។ បុរសវ័យ៣១ឆ្នាំ ដែលបានហៅជនជាតិភាគតិចវីហ្គ័រ ថាជាអ្នកចម្បាំងក្រោយពួកគេប្រឆាំងនឹងការធ្វើទុក្ខបុកម្នេញពីសំណាក់ចិននោះ បានបង្ហោះសារក្នុងបណ្តាញសង្គម Twitter របស់ខ្លួន នៅថ្ងៃទី១៣ ខែធ្នូ ដោយបានរិះគន់ចិន និងប្រទេសមូស្លីមផ្សេងទៀត ដែលមិនហ៊ានហាមាត់ ប្រឆាំងនឹងការរំលោភបំពាននេះ។
យ៉ាងណាក៏ដោយ ការលើកឡើងរបស់ Ozil បែបនេះ បានធ្វើឲ្យភាគីចិនមិនសប្បាយចិត្តឡើយ ហើយទូរទស្សន៍រដ្ឋចិន CCTV ក៏បានបិទការចាក់បញ្ចាំងការប្រកួតរវាងក្រុម Arsenal និង Manchester City នាជំនួបប្រកួតក្នុងក្របខណ្ឌ Premier League សប្តាហ៍ទី១៧ នៅយប់ថ្ងៃទី១៥ ខែធ្នូទៀតផង។
លោក Geng Shuang អ្នកនាំពាក្យក្រសួងការបរទេសចិនបានអះអាង ថាខ្សែបម្រើសញ្ជាតិអាល្លឺម៉ង់រូបនេះទទួលឥទ្ធិពលនិងព័ត៌មានមិនពិត ហើយចង់អញ្ជើញ Ozil ទៅទស្សនាតំបន់ស៊ីនជាំង ដើម្បីមើលពិស្ថានភាពរបស់ប្រជាជននិងជនជាតិភាគតិចទាំងនោះដោយខ្លួនឯង។
អ្នកនាំពាក្យក្រសួងការបរទេសចិនលោក Geng Shuang
«យើងសូមស្វាគមន៍ Ozil ទៅទស្សនាស៊ីនជាំងហើយមើលកន្លែងនោះដោយផ្ទាល់ភ្នែក។ ដរាបណាគាត់មិនមានស្មារតីលំអៀង និងទទួលបានព័ត៌មានពិតគាត់នឹងឃើញស៊ីនជាំងខុសពីអ្វីដែលគាត់បានគិត។ ខ្ញុំចង់ប្រាប់លោក Ozil ថាស៊ីនជាំងមានស្ថេរភាពនយោបាយ កំណើនសេដ្ឋកិច្ច ជនជាតិដើមភាគតិចដែលមានសាមគ្គីភាព និងភាពសុខដុមរមនាក្នុងសង្គម ហើយប្រជាជននៅទីនោះកំពុងរស់នៅក្នុងជីវិតដែលសប្បាយរីករាយ»។ នេះជាការបញ្ជាក់របស់អ្នកនាំពាក្យក្រសួងការបរទេសចិន។
ព័ត៌មានមិនពិតដែល Ozil ទទួលបាននោះ ទំនងជាលោក Geng ចង់សំដៅលើការចុះផ្សាយរបស់សារព័ត៌មានមួយចំនួន រួមទាំងក្រុមសិទ្ធិមនុស្សផង។ ជុំវិញករណីនេះ ក្រុមសិទិ្ធមនុស្សបានបង្ហាញតួលេខថាមានជនជាតិភាគតិចវីហ្គ័រ និងប្រជាជនជាជនជាតិភាគតិចមូស្លីម ជាងមួយលាននាក់ផ្សេងទៀត ត្រូវបានឃុំខ្លួនក្នុងជំរំដោយមានការគ្រប់គ្រងយ៉ាងតឹងរុឹងពីសំណាក់ចិន។
យ៉ាងណា ចិននៅតែបន្តបដិសេធជារឿយៗ ចំពោះការធ្វើបាបជនជាតិភាគតិចវីហ្គ័រនៅក្នុងប្រទេសខ្លួន ដោយនិយាយថាពួកគេកំពុងទទួលការអប់រំនៅក្នុង«មជ្ឈមណ្ឌលបណ្តុះបណ្តាលវិជ្ជាជីវៈ» ដើម្បីប្រយុទ្ធប្រឆាំងនឹងភាពជ្រុលនិយមខាងសាសនា។
ជុំវិញការឃុំខ្លួននេះ លោក Geng បានប្រាប់ទៅខ្សែបម្រើក្រុមកាំភ្លើងធំវិញ តាមរយៈអ្នកកាសែតថា៖«អ្វីដែលគាត់មិនដឹងគឺថារដ្ឋាភិបាលចិនការពារសិទ្ធិសេរីភាពខាងជំនឿសាសនារបស់ពួកគេដោយស្របតាមច្បាប់។ វិធានការរបស់រដ្ឋាភិបាលចិនបែបនេះ ជាការប្រយុទ្ធប្រឆាំងនឹងអំពើភេរវកម្ម និងរក្សាស្ថិរភាពនៅស៊ីនជាំង ហើយក៏ត្រូវបានគាំទ្រដោយប្រជាជនក្នុងតំបន់របស់ជនជាតិភាគតិចផ្សេងៗផងដែរ។ ដោយសារវិធានការទាំងនេះហើយ ទើបស៊ីនជាំងមិនបានឆ្លងកាត់ការវាយប្រហារភេរវកម្មណាមួយឡើយក្នុងរយៈពេលបីឆ្នាំជាប់ៗគ្នានេះ។
នៅពេលអ្នកកាសែតសួរថា ហេតុអ្វីជំនួប Arsenal និង Man City ត្រូវបិទការចាក់បញ្ចាំងលើទូរទស្សន៍រដ្ឋចិន? តើលោករំពឹងថារឿងនេះអាចនឹងកើតឡើងម្តងទៀតជាមួយក្លិបនេះ ឬលីគក្នុងក្របខណ្ឌ Premier League ជាលើកទី២ទេ?
លោក Shuang អ្នកនាំពាក្យក្រសួងការបរទេសចិនមិនឆ្លើយនឹងសំនួរនេះទេ៕