អតីតនាយករដ្ឋមន្ត្រី យីងឡាក់ ចោទក្រុងបាងកកអនុវត្ត «បទដ្ឋានពីរជាន់» លើករណីរឹបអូសទ្រព្យសម្បត្តិ

អន្តរជាតិ

អតីតនាយករដ្ឋមន្ត្រី យីងឡាក់ ចោទក្រុងបាងកកអនុវត្ត «បទដ្ឋានពីរជាន់» លើករណីរឹបអូសទ្រព្យសម្បត្តិ

17, Dec 2019 , 2:33 pm

រូបភាព

រូបភាព Screen Shot ពីហ្វេសប៊ុកផ្លូវការរបស់លោកស្រី យឺងឡាក់ ស៊ីណាវ៉ាត់

ដោយ:

អតីតនាយករដ្ឋមន្ត្រីថៃ លោកស្រី យីងឡាក់ ស៊ីណាវ៉ាត់ បានត្អូញត្អែរជុំវិញការអនុវត្ត «បទដ្ឋានពីរជាន់» ជុំវិញការរឹបអូសទ្រព្យសម្បត្តិលោកស្រីពីសំណាក់រដ្ឋាភិបាលដែលលោកស្រី អះអាងថា នៅពីក្រោយដោយក្រុមយោធា។

លើទំព័រហ្វេសប៊ុកនៅថ្ងៃចន្ទ ១៦ ធ្នូ លោកស្រី យីងឡាក់ ស៊ីណាវ៉ាត់ បានសរសេរថា លោកស្រីមិនសប្បាយចិត្តខណៈលោកស្រីត្រូវឃ្លាតឆ្ងាយពីកូនប្រុស គ្រួសារ និងអ្នកគាំទ្រ ក៏ដូចជា ទ្រព្យសម្បត្តិដែលលោកស្រីរកបាន មុនពេលក្លាយជានាយករដ្ឋមន្ត្រី។

«ផ្ទះរបស់ខ្ញុំ ត្រូវបានរឹបអូសដោយរដ្ឋាភិបាលបច្ចុប្បន្ន ខណៈទ្រព្យសម្បត្តិនានាត្រូវបានយកទៅលក់ដោយនាយកដ្ឋានអនុវត្តច្បាប់ថៃ»។ លោកស្រី យីងឡាក់ លើកឡើងបែបនេះ ដោយបន្ថែមថា លោកស្រីធ្លាប់បានប្រើនីតិវិធីច្បាប់ទាំងអស់ដើម្បីទាមទារទ្រព្យសម្បត្តិទាំងនោះមកវិញ ក៏ប៉ុន្តែពុំអាចបញ្ឈប់មន្ត្រីទាំងនោះពីការអនុវត្តកាតព្វកិច្ចពួកគេដោយមិនខ្វាយខ្វល់ពីច្បាប់ ក្រោមមាត្រា ៤៤ នៃរដ្ឋធម្មនុញ្ញបណ្ដោះអាសន្ន ឆ្នាំ២០១៤។

តាមសំណេរជាភាសាថៃដដែល លោកស្រី សង្កត់ធ្ងន់ថា លោកនាយករដ្ឋមន្ត្រីថៃប្រាយុទ្ធ ចន្ទអូចា បានប្រើប្រាស់មាត្រានេះ ចាប់តាំងពីលោកបានចូលក្តោបក្តាប់អំណាច ហើយរុញច្រានប្រទេសថៃឲ្យធ្លាក់ចូលក្នុងការដឹកនាំបែបសឹក។ «រហូតមកដល់ពេលនេះ មាត្រានេះមានប្រសិទ្ធភាព ហើយក្រុមមន្ត្រីទាំងនោះ ពុំខ្វល់ទេថា ពួកគេមិនអាចលក់ទ្រព្យសម្បត្តិខ្ញុំបានឡើយ លុះត្រាតែខ្ញុំត្រូវបានតុលាការកាត់ថាជាអ្នកចាញ់ក្តី»។

លោកស្រី យីងឡាក់ អះអាងទៀតថា ការបាត់បង់អំណាចរបស់លោកស្រី គឺខុសប្លែកពីបណ្តាមេដឹកថៃដទៃទៀតក្នុងប្រវត្តិសាស្ត្រ ហើយការដាក់អភ័យឯកសិទ្ធិរបស់មាត្រានេះឲ្យមានអំណាចលើសពីសាលក្រមរបស់តុលាការនោះ គឺជារឿងខុសច្បាប់។ សម្រាប់លោកស្រី ការប្រើប្រាស់មាត្រានេះលើសពីអំណាចអធិបតេយ្យគឺជាបំផ្លិចបំផ្លាញសេរីភាពមូលដ្ឋានរបស់ប្រជាជន។

«ខ្ញុំបានព្យាយាមទាមទាររាល់ទ្រព្យសម្បត្តិទាំងអស់ដែលក្នុងនោះ បានប្រគល់ឲ្យដោយឪពុកម្តាយខ្ញុំ ក៏ប៉ុន្តែ ខ្ញុំមិនមានលទ្ធភាពការពារសម្បីតែមួយក្នុងចំណោមពួកវា»។ លោកស្រី និយាយបែបនេះដោយបន្ថែមថា រាល់ពេលដែលលោកស្រីបានដឹងដំណឹងថា ទ្រព្យសម្បត្តិលោកស្រី ត្រូវបានយកទៅលក់បាត់នោះ លោកស្រីរំជួលចិត្តយ៉ាងខ្លាំង។ ជាសារចុងក្រោយ លោកស្រីអតីតនាយករដ្ឋមន្ត្រីវ័យ៥២ឆ្នាំរូបនេះ បានលើកឡើងថា លោកស្រី នឹងមិនជាប់ផុងក្នុងអតីតកាលឡើយ ព្រោះថាមានមនុស្សជាច្រើននាក់កំពុងផ្ញើក្តីសង្ឃឹមពួកគេលើខ្លួនលោកស្រី។

គួររម្លឹកផងដែរថា ក្នុងឆ្នាំ២០១៧ លោកស្រី យីងឡាក់ និងបក្ខពួកផ្សេងទៀត ត្រូវបានចោទប្រកាន់ពីបទបរាជ័យក្នុងការអនុវត្តកាតព្វកិច្ចពួកគេ ដែលឈានដល់មានអំពើពុករលួយ និងការខូចខាតហិរញ្ញវត្ថុរដ្ឋយ៉ាងច្រើនសម្បើម ខណៈអនុវត្តផែនការស្រូវអង្ករ ដែលលោកស្រីបានសន្យារអំឡុងពេលឃោសនាបោះឆ្នោត។

មាត្រា ៤៤ ត្រូវបានរដ្ឋាភិបាលលោកប្រាយុទ្ធយកទៅប្រើប្រាស់ ហើយលោកស្រី យីងឡាក់ ត្រូវបានរកឃើញថាទទួលខុសត្រូវចំពោះការខូចខាតដែលប៉ះពាល់ដល់កញ្ចប់ថវិការដ្ឋ ពីការអនុវត្តផែនការស្រូវអង្ករ។ ទ្រព្យសម្បត្តិលោកស្រី ត្រូវបានបង្កក ឬរឹបអូស ដោយនាយកដ្ឋានអនុវត្តច្បាប់ថៃ ។ ក្រោយមកលោកស្រី បានរត់ភៀសខ្លួនចេញពីប្រទេសថៃ ក្នុងខែសីហា ឆ្នាំ២០១៧ ប៉ុន្មានថ្ងៃមុនតុលាការកំពូលថៃ រៀបចំចេញសាលក្រមក្នុងសំណុំរឿងប្រឆាំងលោកស្រី។ ហើយក្នុងខែកញ្ញា ឆ្នាំ២០១៩ របាយការណ៍ជាច្រើន ចុះផ្សាយថា រដ្ឋាភិបាលនៃប្រទេសស៊ែប៊ីបានប្រកាសថា លោកស្រី យីងឡាក់ ត្រូវបានផ្តល់សញ្ជាតិស៊ែប៊ី និងលិខិតឆ្លងដែនក្នុងខែកញ្ញា ៕