អន្តរជាតិ
ចិននិងរុស្ស៊ី ស្នើព្យួរទណ្ឌកម្មខ្លះលើកូរ៉េខាងជើង តែអាមេរិកថា ពេលវេលាមិនសក្តិសម អគ្គរដ្ឋទូតរុស្ស៊ីប្រចាំអង្គការសហប្រជាជាតិ Vassily Nebenzia ។ រូបភាព AFP
× ចិន និងរុស្ស៊ី នៅថ្ងៃទី ១៦ ខែធ្នូ គ្រោងលើកសំណើឲ្យមានការព្យួរទណ្ឌកម្មមួយចំនួនរបស់អង្គការសហប្រជាជាតិដែលដាក់លើកូរ៉េខាងជើង។ អ្នកជិតខាងកូរ៉េខាងជើងទាំងពីរយល់ថា ចំណាត់ការបែបនេះ នឹងជួយដល់កិច្ចសន្ទនារវាងកូរ៉េខាងជើង និងអាមេរិកដែលជាប់គាំង។ យ៉ាងណាមិញ អាមេរិក មិនព្រមតាមសំណើនេះទេ ដោយលើកឡើងថា ពេលវេលាមិនសក្តិសមព្រោះកូរ៉េខាងជើងមិនទាន់ធ្វើអ្វីជាដុំកំភួនរឿងរំសាយនុយក្លេអ៊ែរនៅឡើយទេ។
សមាជិកអចិន្ត្រៃយ៍ពីរប្រទេសរបស់ក្រុមប្រឹក្សាសន្តិសុខអង្គការសហប្រជាជាតិ គឺចិន និងរុស្ស៊ី បានសរសេរសេចក្ដីព្រាងដំណោះស្រាយមួយដែលស្នើអង្គការសហប្រជាជាតិលើកលែងទណ្ឌកម្មលើកូរ៉េខាងជើងលើវិស័យមួយចំនួនដូចជាការនាំចេញរូបសំណាក, ផលិតផលនេសាទ និងក្រណាត់។ នេះបើតាមការផ្សាយរបស់ទីភ្នាក់ងារព័ត៌មាន Reuters ។
ក្នុងសេចក្ដីព្រាងដដែល មហាអំណាចទាំងពីរ ក៏ស្នើឲ្យមានការលើកលែងបម្រាមលើពលករកូរ៉េខាងជើងធ្វើការនៅបរទេស និងការបញ្ចប់សុពលភាពទណ្ឌកម្មឆ្នាំ២០១៧ ដែលតម្រូវឲ្យប្រទសនានាបញ្ជូនពលករកូរ៉េខាងជើងត្រឡប់ទៅស្រុកកំណើតវិញ។ បច្ចុប្បន្ន ពលករកូរ៉េខាងជើងរាប់ពាន់នាក់ កំពុងធ្វើការនៅចិន និងរុស្ស៊ី។ ឯកសារនេះ ក៏ចង់ឲ្យមានការដកគម្រោងកិច្ចសហប្រតិបត្តិការផ្លូវដែក និងផ្លូវថ្នល់អន្តរកូរ៉េចេញពីការដាក់ទណ្ឌកម្មផងដែរ។
ជាងនេះទៅទៀត សេចក្ដីព្រាងដំណោះស្រាយខាងលើ ក៏ស្នើឲ្យរៀបចំជំនួប៦ភាគីឡើងវិញ ឬក៏បង្កើតយន្តការពហុភាគីដែលស្រដៀងនឹងតុចរចានេះ។ កិច្ចចរចា៦ភាគីមានអាមេរិក ចិន រុស្ស៊ី, ជប៉ុន, កូរ៉េខាងត្បូង និងកូរ៉េខាងជើង បានជាប់គាំងតាំងពីឆ្នាំ២០០៩ ក្រោយទីក្រុងព្យុងយ៉ាងសាកល្បងនុយក្លេអ៊ែរ។
យ៉ាងណាមិញ គេមិនទាន់ដឹងថា សេចក្ដីព្រាងរបស់ចិន និងរុស្ស៊ីនេះ នឹងត្រូវដាក់ឲ្យក្រុមប្រឹក្សាសន្តិសុខនៅពេលណាឡើយ ឬក៏អាចនឹងបញ្ចូលជារបៀបវារៈឬអត់ដែរ។ អគ្គរដ្ឋទូតរុស្ស៊ី Vassily Nebenzia និយាយថា រុស្ស៊ីមិនទាន់ប្រញាប់រឿងអនុម័តដំណោះស្រាយនេះទេ ហើយថា រុស្ស៊ីនឹងជួបជជែកជាមួយសមាជិកក្រុមប្រឹក្សាដទៃទៀតលើសេចក្ដីព្រាងដែលសំដៅដោះស្រាយបញ្ហាមនុស្សធម៌នៅកូរ៉េខាងជើងមួយនេះ។
លោក Nebenzia បន្តថា សេចក្ដីព្រាងដំណោះស្រាយនេះ មានគោលដៅជំរុញឲ្យមានការចរចារវាងអាមេរិក និងកូរ៉េខាងជើង។ យ៉ាងណាក្ដី មន្ត្រីក្រសួងការបរទេសអាមេរិកម្នាក់និយាយថា ពេលនេះ មិនមែនជាពេលដែលក្រុមប្រឹក្សាសន្តិសុខពិចារណាពីការលើកលែងទណ្ឌកម្មឡើយ ព្រោះប្រទេសនេះនៅតែគំរាមកំហែងធ្វើសកម្មភាពបង្កហេតុ បដិសេធជំនួបចរចាដើម្បីរំសាយនុយក្លេអ៊ែរ និងបន្តរក្សាអាវុធហាមឃាត់ ក៏ដូចជាកម្មវិធីមីស៊ីលបាលីស្ទិក៕
Tag:
ចិន
រុស្ស៊ី
អាមេរិក
កូរ៉េខាងជើង
© រក្សាសិទ្ធិដោយ thmeythmey.com