អន្តរជាតិ
លោកវ៉ាង យី ប្រមុខការបរទេស និងទីប្រឹក្សារដ្ឋចិន និយាយក្នុងវេទិកាជជែកពិភាក្សាពីបញ្ហាសេដ្ឋកិច្ច និងនយោបាយរៀបចំឡើងដោយមជ្ឈមណ្ឌលគោលនយោបាយអឺរ៉ុប នាទីក្រុងព្រុចសែល បែលហ្ស៊ិក, រូបភាព៖ Xinhua
×![]()
ដោយ: ធៀន ភារិន្ទ
រដ្ឋមន្ត្រីការបរទេសចិន វ៉ាង យី នៅថ្ងៃទី ១៦ ខែធ្នូ បានបញ្ជាក់ថា ទីក្រុងប៉េកាំងកំពុងបង្កើនទំនាក់ទំនងការទូតជាមួយអឺរ៉ុបឲ្យកាន់តែរឹងមាំ និងសំខាន់ជាមុន។ ការលើកឡើងរបស់ប្រមុខការទូតចិនបែបនេះ ទំនងជាចង់កាត់បន្ថយការពឹងផ្អែកតែទៅលើអាមេរិក ហើយចាប់ផ្តើមងាកមករកស៊ីជាមួយអឺរ៉ុបវិញ។ 
ក្នុងដំណើរទស្សនកិច្ចទៅអឺរ៉ុបដើម្បីទៅចូលរួមក្នុងកិច្ចប្រជុំរដ្ឋមន្ត្រីការបរទេសអាស៊ី-អឺរ៉ុប នៅក្នុងប្រទេសអេស្ប៉ាញ លោក វ៉ាង យី ទីប្រឹក្សារដ្ឋ និងរដ្ឋមន្ត្រីការបរទេសចិន បានគូសបញ្ជាក់យ៉ាងដូច្នេះថា៖« យើងឃើញអឺរ៉ុប ជាដៃគូសហប្រតិបត្តិការដ៏សំខាន់ និងអាទិភាពនៅលើរបៀបវារៈការទូតរបស់ចិន»។ នេះបើតាមការចុះផ្សាយរបស់ទីភ្នាក់ងារព័ត៌មានរដ្ឋចិន Xinhua។
តាមការលើកឡើងរបស់លោក វ៉ាង ក្នុងពេលនេះ គឺគ្មានអ្វីចម្លែកទេ ព្រោះចិនទំនងជាចង់កាត់បន្ថយការពឹងផ្អែកតែទៅលើអាមេរិក ហើយបែរមករកអឺរ៉ុបវិញ។ ពិតណាស់ ចិនមិនត្រឹមតែកែលម្អទំនាក់ទំនងការទូតជាមួយអឺរ៉ុបប៉ុណ្ណោះទេ ប៉ុន្តែចិន ក៏បានរឹតចំណងការទូតទាំងផ្នែកនយោបាយ និងពាណិជ្ជកម្ម ជាមួយរុស្ស៊ី ជប៉ុនផងដែរ ខណៈពេលទំនងទំនងរវាងចិន និងអាមេរិក កំពុងតែល្អក់កករ។
និយាយក្នុងវេទិកាជជែកពិភាក្សាពីបញ្ហាសេដ្ឋកិច្ច និងនយោបាយ ដែលរៀបចំឡើងដោយមជ្ឈមណ្ឌលគោលនយោបាយអឺរ៉ុប(European Policy Center) នាទីក្រុងព្រុចសែល បែលហ្ស៊ិក ប្រមុខការទូតចិនរូបនេះ បានលើកឡើងថា ទីក្រុងប៉េកាំងមិនមែនជាដៃគូប្រកួតប្រជែងរបស់អឺរ៉ុបទេ ហើយក៏មិនចង់ឲ្យអឺរ៉ុប ចាត់ទុកទីក្រុងប៉េកាំងថាជាគូប្រជែងរកស៊ីជាមួយគ្នាដែរ។ ក្នុងន័យនេះ លោក វ៉ាង ទំនងជាចង់បកស្រាយពីបញ្ហា ដែលអឺរ៉ុបបានចោទប្រកាន់ និងយល់ច្រឡំមកលើចិន ពាក់ព័ន្ធនឹងការវិនិយោគយ៉ាងច្រើនសន្ធឹកនៅក្នុងទ្វីបអឺរ៉ុប។
សូមបញ្ជាក់ថា ដំណើរទស្សនកិច្ចទៅអឺរ៉ុបរបស់លោក វ៉ាង ក្នុងពេលនេះ ធ្វើឡើងតែប៉ុន្មានថ្ងៃតែប៉ុណ្ណោះ បន្ទាប់ពីទីក្រុងប៉េកាំង និងទីក្រុងវ៉ាស៊ីនតោន យល់ព្រមលើកិច្ចព្រមព្រៀងពាណិជ្ជកម្មបឋមមួយ។ កិច្ចព្រមព្រៀងនេះ អាមេរិក បានយល់ព្រមផ្អាកការដំឡើងពន្ធលើមុខទំនិញចិនប្រមាណជា ១៥៦ពាន់លានដុល្លារ ដែលត្រូវចូលជាធរមាននៅថ្ងៃទី១៥ ខែធ្នូ៕
Tag:
ចិន
អឺរ៉ុប
© រក្សាសិទ្ធិដោយ thmeythmey.com
