អន្តរជាតិ
អាមេរិក រកការពន្យល់ពីតួកគី ក្រោយលោក អ៊ែរដូហ្កាន់ គំរាមបិទមូលដ្ឋានទ័ពពីរកន្លែង រដ្ឋមន្រ្តីការពារជាតិអាមេរិក ម៉ាក អេស្ពើ ។ រូបភាព AFP
× ការគំរាមរបស់ប្រធានាធិបតីតួកគី តៃយីប អ៊ែដូហ្កាន់ ដែលចង់បិទមូលដ្ឋានទ័ពពីរកន្លែងប្រើដោយអាមេរិក ធ្វើឲ្យទីក្រុងវ៉ាស៊ីនតោនស្រឡាំងកាំងមិនស្ទើរឡើយ។ ប្រមុខការពារជាតិអាមេរិក ម៉ាក អេស្ពើ និយាយនៅថ្ងៃទី១៦ ខែធ្នូ ថា លោកនឹងរកការបកស្រាយពីទីក្រុងអង់ការ៉ាពាក់ព័ន្ធសម្ដីគំរាមរបស់លោក អ៊ែរដូហ្កាន់ ដែលធ្វើឡើងស្របពេលទំនាក់ទំនងទ្វេភាគីកាន់តែល្អក់កករដោយសារការខ្វែងគំនិតគ្នាលើបញ្ហាជាច្រើន។
រដ្ឋមន្ត្រីការពារជាតិអាមេរិក ម៉ាក អេស្ពើ និយាយថា លោកនឹងជជែកជាមួយសមភាគីតួកគី Hulusi Akar ដើម្បីយល់ឲ្យច្បាស់ពីជំហររបស់តួកគីពាក់ព័ន្ធបំណងបិទមូលដ្ឋានទ័ពអាមេរិកពីរកន្លែងក្នុងទឹកដីតួកគី។ ប្រធានាធិបតីតួកគី តៃយីប អ៊ែរដូហ្កាន់ បានលើកឡើងពីគម្រោងបិទមូលដ្ឋានទ័ពអាកាស Incirlik និង Kurecik ដែលនៅក្បែរព្រំដែនជាមួយស៊ីរី បើអាមេរិកហ៊ានដាក់ទណ្ឌកម្មលើតួកគីដោយសារការទិញអាវុធពីរុស្ស៊ីនោះ។
ប្រាប់អ្នកសារព័ត៌មាននៅថ្ងៃទី១៦ ខែធ្នូ មួយថ្ងៃក្រោយការអធិប្បាយរបស់លោក អ៊ែរដូហ្កាន់ លោក អេស្ពើ អះអាងថា លោកចង់បានការពន្យល់ពីតួកគីពីជំហរពីប្រាកដ ហើយតួកគីពិតជាចង់បិទមូលដ្ឋានដ៏សំខាន់នេះកម្រិតណា។ បន្ទាយ Incirlik ជាមូលដ្ឋានទ័ពអាមេរិកបើកប្រតិបត្តិការយោធានៅស៊ីរី និងមានឃ្លាំងនុយក្លេអ៊ែរប្រមាណ៩០គ្រាប់ ខណៈបន្ទាយ Kurecik ជាទីតាំងរ៉ាដាដ៏ធំមួយរបស់សម្ព័ន្ធយោធាណាតូនៅក្បែរមជ្ឈិមបូព៌ា។
«ប្រសិនបើតួកគីពិតជាច្បាស់លាស់មែន ពួកគេមានសិទ្ធិអធិបតេយ្យថា ត្រូវទទួលយកមូលដ្ឋានណាតូឬអត់។» នេះជាការលើកឡើងរបស់លោក អេស្ពើ ដែលទំនងជាការទទួលស្គាល់សិទ្ធិរបស់តួកគីក្នុងនាមជារដ្ឋឯករាជ្យមួយ។ ប៉ុន្តែប្រមុខការពារជាតិអាមេរិករូបអះអាងថា បញ្ហានេះ (ការបិទមូលដ្ឋានទ័ព) ក្លាយជារឿងរួមរបស់ណាតូ ហើយការសម្រេចចិត្តណាមួយ ក៏ត្រូវធ្វើឡើងនៅណាតូដែរ ព្រោះជាការប្ដេជ្ញាចិត្តរួមគ្នា។ នេះបើតាមការផ្សាយរបស់ទីភ្នាក់ងារព័ត៌មាន AFP ។
លោក អេស្ពើ ក៏បង្ហាញការខកចិត្តដែលតួកគីកំពុងដើរលើផ្លូវខុស ដោយងាកកាន់តែឆ្ងាយពីណាតូ ហើយកៀកកិតនឹងរុស្ស៊ី។ លោក អេស្ពើ ចង់និយាយដល់កិច្ចព្រមព្រៀងទិញលក់ខែលការពារមីស៊ីល S-400 រវាងក្រុងអង់ការ៉ា និងក្រុងមូស្គូ ដែលជាដើមហេតុនៃបញ្ហាបច្ចុប្បន្ន។ សព្វថ្ងៃ មូស្គូ បានបញ្ជូនប្រព័ន្ធការពារស៊េរីទំនើបនេះឲ្យអង់ការ៉ាបានមួយចំនួនរួចហើយ។ ក៏ព្រោះរឿងនេះ តួកគី ក៏ត្រូវអាមេរិកដកចេញពីកម្មវិធីយន្តហោះ F-35 តែម្ដង។
មិនទាន់អស់ឡើយ ស្ថាប័ននីតិបញ្ញត្តិអាមេរិក ក៏ចង់ដាក់ទណ្ឌកម្មលើសម្ព័ន្ធមិត្តណាតូមួយទៅទៀត ។ ប៉ុន្តែរដ្ឋបាលប្រធានាធិបតី ដូណាល់ ត្រាំ នៅមិនទាន់ចាត់វិធានការលើរឿងនេះនៅឡើយទេ ទោះបានដាក់សម្ពាធលើសំណុំរឿងតួកគីដាក់ទ័ពនៅស៊ីរីក្ដី។ ពាក្យគំរាមពីអាមេរិក នៅតែឮមិនចេះដាច់ ខណៈតួកគីឯណេះវិញ ហាក់គ្មានជំហរបន្ទន់ឥរយាបថបន្តិចឡើយ៕
Tag:
អាមេរិក
តួកគី
ម៉ាក អេស្ពើ
© រក្សាសិទ្ធិដោយ thmeythmey.com