អន្តរជាតិ
ចិន៖ កម្មកររ៉ែចំនួន១៤នាក់ បានបាត់បង់ជីវិតឧបទ្ទវហេតុផ្ទុះហ្គាសក្នុងអណ្ដូងរ៉ែ រូបភាព៖ AFP
× ឧបទ្ទវហេតុផ្ទុះហ្គាស និងធ្យូងថ្មមួយ នៅថ្ងៃទី១៧ ខែធ្នូ បានបង្កឲ្យមនុស្សស្លាប់យ៉ាងហោចណាស់១៤នាក់ និងជនរងគ្រោះពីរនាក់ទៀត ជាប់នៅក្នុងដី។ ហេតុការណ៍នេះ បានកើតឡើងនៅក្នុងស្ថានីយជីកយករ៉ែ Guanglong ស្រុក Anlong ខេត្ត Guizhou ប្រទេសចិន។
តាមរយៈការអះអាងរបស់រដ្ឋបាលស្វយ័តភាគខាងត្បូងខេត្ត Guizhou យ៉ាងហោចណាស់មនុស្សចំនួន ១៤នាក់ បានបាត់បង់ជីវិត នៅក្នុងស្ថានីយ Guanglong ដោយសារតែករណីផ្ទុះហ្គាស និងធ្យូងថ្ម។ ក្នុងឧបទ្ទវហេតុមួយនេះ មនុស្សចំនួន ៧នាក់ ត្រូវបានគេជួយសង្គ្រោះ ខណៈពេលមនុស្សចំនួន ២នាក់ទៀត កំពុងជាប់នៅក្រោមដីនៅឡើយ។
យ៉ាងណាក៏ដោយ អាជ្ញាធរក្នុងតំបន់កំពុងតែស្វះស្វែងជួយពួកគេ។ រហូតមកទល់ពេលនេះ គេមិនទាន់ដឹងមូលហេតុច្បាស់លាស់នៅឡើយទេ ជុំវិញបញ្ហាផ្ទុះហ្គាស និងធ្យូងថ្ម។ នេះបើតាមការចុះផ្សាយរបស់ទីភ្នាក់ងារព័ត៌មាន AFP ។
ឧបទ្ទវហេតុហេតុខាងលើនេះ កើតឡើងតែប៉ុន្មានថ្ងៃតែប៉ុណ្ណោះ បន្ទាប់ពីគ្រោះថ្នាក់បាក់ដីនៅក្នុងខេត្តSichuan។ បញ្ហានៅក្នុងខេត្ត Sichuan នេះ កើតឡើងដោយសារតែគ្រោះទឹកជំនន់ ហើយបានធ្វើឲ្យមនុស្សបាត់បង់ជីវិត ៥នាក់ និងជាប់ក្នុងដី១៣នាក់។
សូមបញ្ជាក់ថា រឿងហេតុនៅតំបន់អណ្តូងរ៉ែក្នុងប្រទេសចិន បានបង្កឲ្យមានមនុស្សស្លាប់ជាញឹកញាប់។ បញ្ហានេះ ត្រូវបានគេបន្ទោសថា ដោយសារកង្វះការចាប់បង្ខំឲ្យអនុវត្តច្បាប់ឲ្យត្រឹមត្រូវ។ ពាក់ព័ន្ធនឹងបញ្ហានេះ ក្រុមប្រឹក្សារដ្ឋចិន នៅក្នុងខែវិច្ឆិកា ឆ្នាំ ២០១៩កន្លងមកនេះ បានបញ្ជាឲ្យសមត្ថកិច្ចចិនចុះបង្ក្រាប់ទីតាំងទាំងឡាយណា ដែលធ្វើឲ្យប៉ះពាល់ដល់បញ្ហាសុវត្ថិភាព ដើម្បីកែលម្អសុវត្ថិភាពការងារ៕
© រក្សាសិទ្ធិដោយ thmeythmey.com