ជាតិ
សម្ដេច ហ៊ុន សែន ៖ មន្ត្រីពូកែរាយការណ៍ និងបន្ទោសតែថ្នាក់ក្រោម ត្រូវដាក់ចូលឃ្លាំង
× ភ្នំពេញ៖ មន្ត្រីដែលពូកែខាងរាយការណ៍ និងបន្ទោសតែថ្នាក់ក្រោម ត្រូវដាក់ចូលឃ្លាំង ហើយមិនចាំបាច់ឱ្យបំពេញការងារអ្វីទៀតនោះទេ។ សម្ដេច ហ៊ុន សែន ថ្លែងបែបនេះ នៅក្នុងពិធីប្រគល់សញ្ញាបត្រដល់និស្សិតសាកលវិទ្យាល័យវេស្ទើន នៅព្រឹកថ្ងៃទី១៨ ធ្នូ។
ថ្លែងចំពោះមុខនិស្សិត និងថ្នាក់ដឹកនាំរដ្ឋាភិបាល សម្ដេច ហ៊ុន សែន បានសង្កត់ធ្ងន់ថា នៅពេលមានបញ្ហាកើតឡើងនៅតាមមូលដ្ឋាន ឬថ្នាក់ក្រោមជាតិនោះ វាតែងតែលេចចេញរូបរាងមន្ត្រីពីរប្រភេទឡើង។ មន្ត្រីទាំងពីរប្រភេទ ដែលសម្ដេច កត់សម្គាល់នេះ គឺមន្ត្រីពូកែដោះស្រាយបញ្ហា និងមន្ត្រីពូកែរាយការណ៍ ហើយបន្ទោសថ្នាក់ក្រោមខ្លួន។
សម្រាប់ប្រមុខរដ្ឋាភិបាល មន្ត្រីពូកែដោះស្រាយបញ្ហា គឺអាចជួយអភិវឌ្ឍជាតិឱ្យរីកចម្រើន។ ប៉ុន្តែមន្ត្រីពូកែតែរាយការណ៍នោះ គឺជាមន្ត្រីអសមត្ថភាព ហើយមិនចាំបាច់ផ្ដល់ការងារឱ្យពួកគេធ្វើបន្តទៀតនោះទេ។
សូមស្ដាប់សំឡេង៖
ថ្លែងបែបនេះហើយ សម្ដេច ហ៊ុន សែន ក៏បានលើកករណីរំលំបាក់អគារនៅខេត្តព្រះសីហនុ កាលពីខែមិថុនា ឆ្នាំ២០១៩កន្លងមកថា មន្ត្រីថ្នាក់ជាតិខ្វះការគ្រប់គ្រង និងប្រមូលផ្ដុំកម្លាំងដោះស្រាយបញ្ហាបាក់អគារនោះ ខណៈមន្ត្រីក្រោមជាតិ បានបំពេញការងារយ៉ាងល្អ។
មិនតែប៉ុណ្ណោះនាយករដ្ឋមន្ត្រីកម្ពុជា ក៏បានរម្លឹកមន្ត្រីថ្នាក់ជាតិថា ត្រូវផ្ដល់អំណាចពិតប្រាកដដល់មន្ត្រីថ្នាក់ក្រោមជាតិ ដើម្បីដោះស្រាយបញ្ហានានា ពោលគឺកុំផ្ដល់អំណាចខ្យល់ ទៅពួកគេ ដែលធ្វើឱ្យពួកគេពិបាកសម្រេចចិត្តក្នុងការដោះស្រាយ និងបម្រើផលប្រយោជន៍ពលរដ្ឋ៕
Tag:
ហ៊ុន សែន
មន្ត្រីរាជការ
© រក្សាសិទ្ធិដោយ thmeythmey.com