អន្តរជាតិ
នាយករដ្ឋមន្ត្រីកម្ពុជា ផ្ដាំឱ្យអ្នកដឹកនាំបន្តវេន ប្រកាន់ខ្ជាប់គោលការណ៍កុងសងស៊ីស ក្នុងក្របខណ្ឌអាស៊ាន
×![]()
ភ្នំពេញ៖ នាយករដ្ឋមន្ត្រី ហ៊ុន សែន ផ្ដាំឱ្យអ្នកដឹកនាំកម្ពុជា ដែលបន្តវេនពីសម្ដេច ត្រូវប្រកាន់ខ្ជាប់គោលការណ៍កុងសងស៊ីស នៅក្នុងក្របខណ្ឌអាស៊ាន ដើម្បីកុំឱ្យមានបែកបាក់គ្នា នៅក្នុងក្រុមរដ្ឋប្រជាជាតិអាស៊ីអាគ្នេយ៍នេះ។
«គោលការណ៍ស្មារតីសហគមន៍ ដែលធ្វើការតាមកុងសងស៊ីស ត្រូវច្បាមឱ្យជាប់។ សូមផ្ដាំផ្ញើទៅអ្នកជំនាន់ក្រោយបន្ទាប់ពីខ្ញុំទៅ ដែលក្លាយជាមេដឹកនាំកម្ពុជា»។ នេះជាការលើកឡើងរបស់សម្ដេច ហ៊ុន សែន ដែលផ្ដាំឱ្យមេដឹកនាំកម្ពុជាជំនាន់ក្រោយ កុំអនុវត្តការងារបែបការបោះឆ្នោតនៅក្នុងក្របខណ្ឌអាស៊ាន ដែលនាំឱ្យមានការបែកបាក់គ្នា។
ត្រង់ចំណុចនេះ ប្រមុខរដ្ឋាភិបាល បាននិយាយថា ក្របខណ្ឌអាស៊ាន វាផ្ដល់ភាពវិជ្ជមាន និងផលប្រយោជន៍រួមដល់ប្រទេសជាសមាជិក ដោយមិនបែងចែកប្រទេសអ្នកមាន អ្នកក្រ ឬធំ-តូច នោះទេ។ ថ្លែងក្នុងពិធីចែកសញ្ញាបត្រដល់និស្សិតសាកលវិទ្យាល័យវេស្ទើន នៅព្រឹកថ្ងៃទី១៨ ធ្នូ លោកនាយករដ្ឋមន្ត្រីកម្ពុជា បានអះអាងថា ភាពវិជ្ជមានរបស់អាស៊ានមាន៤ចំណុច ដែលកម្ពុជាមើលឃើញនោះ រួមមានគោលការណ៍មិនជ្រៀតជ្រែកចូលផ្ទៃក្នុងនៃប្រទេសសមាជិក, ស្មារតីសហគមន៍អាស៊ាន ដែលធ្វើការតាមរបៀបកុងសុងស៊ីស (មតិឯកច្ឆន្ទ) ក្នុងផ្ដល់សិទ្ធសម្រេចចិត្ត និងផលប្រយោជន៍ស្មើគ្នា, ការអនុវត្តន៍សេដ្ឋកិច្ចសង្គម ទាក់ទងសមាហរណកម្ម និងច្រកទ្វារចេញនៃការទូតរបស់កម្ពុជា។
សមាគមប្រជាជាតិអាស៊ីអាគ្នេយ៍ ឬហៅកាត់ថាអាស៊ាន ត្រូវបានបង្កើតជាផ្លូវការនៅថ្ងៃទី០៧ ខែសីហា ឆ្នាំ១៩៦៧ ដោយស្ថាបនិកប្រាំប្រទេសរួមមាន ឥណ្ឌូនេស៊ី ម៉ាឡេស៊ី ហ្វីលីពីន សិង្ហបុរី និងថៃ។មកទល់បច្ចុប្បន្ន អង្គការក្នុងតំបន់មួយនេះ មានសមាជិកសរុបទាំង១០ប្រទេសដែលបន្ថែមពីសមាជិកចាស់ទាំងប្រាំ។ សមាជិកទាំងនោះរួមមាន ព្រុយណេ វៀតណាម ឡាវ មីយ៉ាន់ម៉ា និងកម្ពុជា ដែលចូលជាសមាជិកនៅឆ្នាំ១៩៩៩ ។ ទីម័រខាងកើត កំពុងតែស្ថិតនៅក្នុងនីតិវិធីនៃការវាយតម្លៃដើម្បីមើលពីលទ្ធភាព ដើម្បីសុំជាសមាជិកទី១១របស់អាស៊ាន។
គោលបំណង នៃការបង្កើតស្ថាប័នអន្តររដ្ឋាភិបាលនេះ គឺដើម្បីផ្សារភ្ជាប់ និងពង្រឹងកិច្ចសហប្រតិបត្តិការសេដ្ឋកិច្ច សង្គម វប្បធម៌ បច្ចេកទេស អប់រំ និងវិស័យជាច្រើនផ្សេងទៀត ក្នុងទិសដៅលើកកម្ពស់សន្តិភាព និងស្ថិរភាពនៅតំបន់តាមរយៈការគោរពយុត្តិធម៌ និងនីតិរដ្ឋជាដើម។ បើសរុបប្រជាជនក្នុងបណ្ដាប្រទេសជាសមាជិកទាំងអស់មានជាង ៦០០លាននាក់ ដែលស្មើជិត១០ភាគរយនៃប្រជាជនពិភពលោក៕
Tag:
ហ៊ុន សែន
អាស៊ាន
© រក្សាសិទ្ធិដោយ thmeythmey.com
