រដ្ឋមន្ត្រីបរិស្ថាន៖ នៅអាស៊ាន មានតែកម្ពុជានិងឥណ្ឌូណេស៊ីទេ ដែលលក់ឥណទានកាបូន

ជាតិ

រដ្ឋមន្ត្រីបរិស្ថាន៖ នៅអាស៊ាន មានតែកម្ពុជានិងឥណ្ឌូណេស៊ីទេ ដែលលក់ឥណទានកាបូន

18, Dec 2019 , 9:59 pm

រូបភាព

រូបពីក្រសួងបរិស្ថាន

ដោយ: ថ្មីៗ

ភ្នំពេញ៖ លោក សាយ សំអាល់ រដ្ឋមន្ត្រីក្រសួងបរិស្ថាន ថ្លែងថា នៅតំបន់អាស៊ាន មានតែកម្ពុជា និងឥណ្ឌូណេស៊ីប៉ុណ្ណោះ ដែលនាំចេញឥណទានកាបូន ទៅក្រៅប្រទេស។

ក្នុងវិធីផ្ដល់ប័ណ្ណសរសើរដល់ក្រុមការងាររ៉េដបូកជាតិ កាលពីថ្ងៃទី១៦ ខែធ្នូ ឆ្នាំ២០១៩ លោក សាយ សំអាល់ លើកឡើងថា រយៈពេល២០ឆ្នាំមកនេះ កម្ពុជា មានឱកាសពេញលេញ ក្នុងការគិតគូរពីបញ្ហាបរិស្ថាន និងធនធានធម្មជាតិ។ លោក បន្តថា ការគ្រប់គ្រងតំបន់ធម្មជាតិ បានល្អប្រសើរ ដោយក្នុងនោះកម្ពុជាបានលក់ឥណទានកាបូននៅតំបន់មួយចំនួន ដូចជា តំបន់ជម្រកសត្វព្រៃកែវសីមា តំបន់ព្រៃក្រវ៉ាញខាងត្បូង និងនៅព្រៃតាតៃ ក្នុងក្របខណ្ឌទីផ្សារស្ម័គ្រចិត្ត។

លោក អះអាងថា ឥណទានកាបូន ត្រូវបានលក់ទៅឲ្យក្រុមហ៊ុនអន្តរជាតិមួយចំនួនដូចជា ក្រុមហ៊ុន Disney ក្រុមហ៊ុន Shall និង ក្រុមហ៊ុន Gucci ជាដើម ដោយគិតចាប់តាំងពីឆ្នាំ២០១៦ រហូតមកដល់បច្ចុប្បន្ន កម្ពុជាទទួលបានចំណូលជាង១១,៦លានដុល្លារ។ លោក បន្ថែមថា ថវិកាដែលទទួលបានមកពីការលក់កាបូន គឺយកទៅអភិវឌ្ឍសហគមន៍និងតំបន់អភិរក្សធនធានធម្មជាតិនានា។

លោករដ្ឋមន្ត្រី បញ្ជាក់ដូច្នេះថា៖«យើង កំពុងតែសិក្សា និងបន្តលក់កាបូននៅដែនជម្រកសត្វព្រៃឡង់ក្នុងភូមិសាស្ត្រខេត្តស្ទឹងត្រែងផងដែរ»។ លោក និយាយទៀតថា កម្ពុជាអាចផលិតកាបូនលើសពី ១០លានតោនក្នុងមួយឆ្នាំ៕