និស្សិតពេទ្យមួយក្រុម ស្រាវជ្រាវរុក្ខជាតិទន្ទ្រានខេត្ត បង្កើតជាឱសថព្យាបាល

ជាតិ

វីដេអូ

និស្សិតពេទ្យមួយក្រុម ស្រាវជ្រាវរុក្ខជាតិទន្ទ្រានខេត្ត បង្កើតជាឱសថព្យាបាល

19, Dec 2019 , 8:59 am

រូបភាព

ដោយ: ថ្មីៗ

ភ្នំពេញ៖ និស្សិតពេទ្យមួយក្រុម សិក្សាឆ្នាំទី៣ និងទី៤ នៃសាកលវិទ្យាល័យវិទ្យាសាស្ត្រសុខាភិបាល និងសាកលវិទ្យាល័យអន្តរជាតិ បានជាប់ជ័យលាភីលេខ១ ក្នុងពានរង្វាន់គីណាល់ អំពីអត្ថបទស្រាវជ្រាវវិទ្យាសាស្ត្រសុខាភិបាល។ និស្សិតពេទ្យមួយក្រុមនេះ បានស្រាវជ្រាវពីរុក្ខជាតិទន្ទ្រានខេត្ត បង្កើតជាឱសថព្យាបាលការឈឺចាប់នៃរបួស។ យុវតី សួន សូនិកា តំណាងក្រុមនិស្សិតជ័យលាភីលេខ១ បានលើកឡើងថា៖ «ក្រោយស្រាវជ្រាវលើប្រធានបទនេះ នាពេលអនាគត ពួកយើងនឹងបង្កើតជាឱសថ សម្រាប់ព្យាបាលការបំបាត់ការឈឺចុកចាប់»។

សូមអញ្ជើញទស្សនាបទសម្ភាសខាងក្រោមដូចតទៅ៖

និស្សិតពេទ្យមួយក្រុមនេះ បានស្រាវជ្រាវលើប្រធានបទ «ការសិក្សាពីការប្រើប្រាស់រុក្ខជាតិឱសថព្យាបាលការឈឺចាប់នៃរបួសនាសម័យកម្ពុជាប្រជាធិបតេយ្យ និងនាពេលបច្ចុប្បន្ននៅភូមិស្គន់ ឃុំសូទិព្វ ស្រុកជើងព្រៃ ខេត្តកំពង់ចាម ឆ្នាំ២០១៩»។ យុវតី សួន សូនិកា និស្សិតពេទ្យឆ្នាំទី៣ ជាសមាជិកក្រុម បានបញ្ជាក់ថា ក្រុមរបស់ពួកគេបានស្រាវជ្រាវអំពីរុក្ខជាតិជាឱសថសម្រាប់ការបំបាត់ការឈឺចុកចាប់ ដោយបានរកឃើញរុក្ខជាតិទន្ទ្រានខេត្ត ជារុក្ខជាតិដែលប្រជាពលរដ្ឋប្រើប្រាស់ជាឱសថ។

បើតាមយុវតី សួន សូនិកា ប្រជាពលរដ្ឋមួយចំនួន បានយកស្លឹកទន្ទ្រានខេត្តលាយជាមួយអំបិល ឬស្ករត្នោត ឬទឹកឃ្មុំ សម្រាប់ព្យាបាលការឈឺចាប់នៃរបួស។ មូលហេតុដែលយុវជនមួយក្រុមនេះ ជ្រើសរើសខេត្តកំពង់ចាម សម្រាប់ការស្រាវជ្រាវនេះ ដោយសារខេត្តកំពង់ចាម សម្បូរទៅដោយការធ្វើកសិកម្ម ជាពិសេសដីនាខេត្តកំពង់ចាមមានគុណភាពល្អ។

សូមបញ្ជាក់ថា ពានរង្វាន់គីណាល់ ត្រូវបានបង្កើតឡើងនៅក្នុងឆ្នាំ ២០១៣ ក្នុងគោលបំណងជំរុញនិស្សិតកម្ពុជា ផ្នែកវិទ្យាសាស្ត្រសុខាភិបាលឲ្យមានឱកាសធ្វើការសិក្សាស្រាវជ្រាវស្របតាមស្តង់ដាវិទ្យាសាស្ត្រអន្តរជាតិ ដើម្បីចូលរួមចំណែកអភិវឌ្ឍន៍ឲ្យបានពេញលេញក្នុងវិស័យអប់រំ និងចូលរួមចំណែកក្នុងការអភិវឌ្ឍការសិក្សាស្រាវជ្រាវលក្ខណៈបែបវិទ្យាសាស្ត្រនៅកម្ពុជា។ ពាន់រង្វាន់គីណាល់ ត្រូវបានរៀបចំឡើងដោយមូលនិធិគីណាល់ ដោយមានការជួយឧបត្ថម្ភគាំទ្រទាំងស្រុងពីសហគ្រាសផលិតឱសថ ប៉េប៉េអឹម និងក្រុមហ៊ុនខនហ្វីរេល៕