អាជ្ញាធរសិក្សាសង់ស្ពានឆ្លងទន្លេ ព្រែកប្រា-ចាក់អង្រែលើ ខណៈចរាចរណ៍នៅច្បារអំពៅកកស្ទះ

ជាតិ

អាជ្ញាធរសិក្សាសង់ស្ពានឆ្លងទន្លេ ព្រែកប្រា-ចាក់អង្រែលើ ខណៈចរាចរណ៍នៅច្បារអំពៅកកស្ទះ

19, Dec 2019 , 7:59 am

រូបភាព

ដោយ:

ភ្នំពេញ៖ សាលារាជធានីភ្នំពេញ សម្រេចបង្កើតក្រុមការងារមួយ ដើម្បីសិក្សាគម្រោងស្ថាបនាស្ពានឆ្លងទន្លេបាសាក់ ដែលតភ្ជាប់ពីព្រែកប្រា ក្នុងខណ្ឌច្បារអំពៅ មកចាក់អង្រែលើក្នុងខណ្ឌមានជ័យ។ នេះបើតាមសេចក្ដីសម្រេចរបស់សាលារាជធានី ចុះនៅថ្ងៃទី១៣ខែធ្នូ។

ក្រុមការងារសិក្សាគម្រោងសាងសង់ស្ពានឆ្លងទន្លេបាសាក់ ព្រែកប្រា-ចាក់អង្រែលើ នេះ ត្រូវដឹកនាំដោយប្រធានគឺលោក ស៊ុយ សេរិទ្ធ អភិបាលរងរាជធានីភ្នំពេញ និងមានអភិបាលខណ្ឌច្បារអំពោ និងអភិបាលខណ្ឌមានជ័យ ជាអនុប្រធាន និងសរុបទាំងសមាជិក គឺមានសមាសភាពសរុប ២១រូប។

ក្រុមការងារនេះមានភារកិច្ចចុះសិក្សាទីតាំង ដើម្បីលើកគម្រោងប្លង់សង់ស្ពានឆ្លងកាត់ទន្លេបាសាក់ ដែលតភ្ជាប់ពីភូមិសាស្ត្រសង្កាត់ព្រែកប្រា មកសង្កាត់ចាក់អង្រែលើ។ ហើយក្រុមការងារ ត្រូវធ្វើរបាយការណ៍ដាក់ជូនអភិបាលរាជធានី។

គួរបញ្ជាក់ថា ការលើកគម្រោងសិក្សាសង់ស្ពានឆ្លងទន្លេបាសាក់មួយទៀតនេះ ទំនងជាមានគោលដៅចង់សម្រួលដល់ការធ្វើដំណើរនៅចំណុចក្បាលថ្នល់ និងច្បារអំពៅ ដែលមានចរាចរណ៍មមាញឹកខ្លាំង និងតែងតែកកស្ទះ៕