អត្ថបទផ្តល់ជូនដោយ លោក ជុំ សន្យា
ស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្តិ នៃសាលាកុលសម្ព័ន្ធ
មនុស្សត្រូវតែមានសេចក្ដីស្រមៃ ហើយវាត្រូវតែខ្ពស់។ ផលប្រយោជន៍នៃការស្រមៃខ្ពស់នោះគឺថា បើយើង មិនអាចទៅដល់ យ៉ាងហោចណាស់ក៏យើងទៅជិតដល់វាដែរ។ ដើម្បីសម្រេចក្ដីស្រមៃរបស់យើង យើងត្រូវ តែ មិន ប្រាប់ពីក្តីស្រមៃរបស់យើងនោះ ទៅមនុស្សដែលមានគំនិតចង្អៀតឡើយ។
សូមនៅឱ្យឆ្ងាយពីមនុស្សដែលព្យាយាមមើលងាយមហិច្ឆតារបស់អ្នក។ មនុស្សគំនិតចង្អៀតជានិច្ចកាលតែងតែមើលងាយមហិច្ឆតារបស់គេ ប៉ុន្តែមនុស្សអស្ចារ្យវិញតែងតែធ្វើអោយអ្នកមានអារម្មណ៍អស្ចារ្យ និង អាចធ្វើអោយអ្នកក្លាយខ្លួនជាមនុស្សអស្ចារ្យផងដែរ។ នៅពេលដែលអ្នកចង់ធ្វើផែនការធំដើម្បីបង្កើតជាផ្លែផ្កាវាសំខាន់ណាស់អ្នកត្រូវតែ ប្រយ័ត្នប្រយែងក្នុងការប្រាស្រ័យទាក់ទងជាមួយអ្នកណាម្នាក់ទៀងទាត់ជាប្រចាំ ។
នៅពេលដែលអ្នកប្រាប់សុបិនរបស់អ្នកទៅកាន់មនុស្សដែលមានគំនិតចង្អៀត ភ្លាមនោះពួកគេនឹង បំបាក់ ទឹកចិត្តអ្នក មើលងាយអ្នក លួចគំនិតអ្នក ឬក៏ក្លាយជាគូប្រជែងរបស់អ្នក។
ក្ដីស្រមៃរបស់អ្នកគឺមិនមែនសម្រាប់ប្រាប់ និងចែករំលែកជាមួយមនុស្សដែលមានចរិតចង្អៀតនោះទេ។ ជាពិសេសទៅទៀតនោះគឺទៅកាន់មនុស្សដែលមានគំនិតតូច បើពុំនោះទេ ពួកគេនឹងធ្វើអោយអ្នកមើលឃើញពីមូលហេតុជាច្រើនដែលធ្វើឱ្យក្ដីសុបិនរបស់អ្នកមិនអាចដំណើរការបាន និងធ្វើអោយអ្នកងងឹតភ្នែក មើលមិនឃើញមូលហេតុដែលវាដំណើរការ។
លោក ចន ស៊ីមិចវែល បាននិយាយថា៖ «ក្ដីស្រមៃកាន់តែធំ អ្នកត្រូវតែជាមនុស្សខ្លាំង និងឆ្លាតឲ្យធំជាងក្ដីស្រមៃរបស់អ្នក ដើម្បីសម្រេចក្ដីស្រមៃរបស់អ្នកឯងទាល់តែបាន»។ មនុស្សចិត្តចង្អៀត នឹងធ្វើឲ្យអ្នកធ្លាក់ទៅក្នុងទីកន្លែងមួយដែលទាបជាងក្ដីសុបិនរបស់អ្នក។ ពួកគេគឺមិនអាចមានក្ដីសុបិនបានទេ និងមិនត្រឹមតែប៉ុណ្ណោះពួកគេតែងតែច្របាច់កសម្លាប់ក្ដីសុបិនដ៏ធំរបស់អ្នក។ ហេតុដូចនេះអ្នកឯងមិនត្រូវចែករំលែកក្ដីស្រមៃរបស់អ្នកឯងជាមួយមនុស្សដែលគ្មានសមត្ថភាព ឃើញរូបភាពធំនោះទេ។
ក្ដីសុបិនជាច្រើនត្រូវបានរាំងស្ទះ ហើយសក្ដានុពលជាច្រើនដែលមិនទាន់ឃើញច្បាស់ខ្លាំងត្រូវបានគេកប់ជាបណ្ដោះអាសន្នដោយសារតែមនុស្សមួយចំនួនបានរៀបចំផែនការជីវិតរបស់ពួកគេជាមួយមនុស្សដែលខ្វះចក្ខុវិស័យឃើញរូបភាពធំ។
សូមនៅជុំវិញមនុស្សដែលពង្រីកនិងជំរុញការគិតរបស់អ្នក តែមិនមែននៅជុំវិញអ្នកដែលកាត់បន្ថយក្ដីសុបិនធំរបស់អ្នក ឲ្យដូចជាក្ដីសុបិនដ៏តូចរបស់ពួកគេទេ។ ជំនួសឱ្យការធ្វើមន្ទីរពិសោធន៍ ស្រាវជ្រាវសម្រាប់ ការ ស្រាវជ្រាវអវកាស លោក អីឡោនម៉ាស បានបើកក្រុមហ៊ុនមួយដែលប្រកួតប្រជែង និងសាហាវជាងនេះ នោះគឺការ ប្រកួតប្រជែងគម្រោងជាច្រើនជាមួយ NASA។ លោក វិឆាតប្រេនសុន សុខចិត្តមិនធ្វើជាភ្នាក់ងារទេសចរណ៍ លោកបានសម្រេចចិត្តបើកក្រុមហ៊ុន Virgin Group Ltd។ ចំណែកឯលោកថៅកែក្រុមហ៊ុន Amazon ឈ្មោះ ជេវ ប៉ែសសូ សម្រេចចិត្តមិនធ្វើជា អ្នកគ្រប់គ្រងទូទៅនៅក្នុងហាងលក់សៀវភៅឡើយ ផ្ទុយទៅវិញគាត់បាន បើក កន្លែងលក់សៀវភៅ តាមប្រព័ន្ធអ៊ីនធឺណិតដ៏ធំបំផុតដែលមិនធ្លាប់មាននៅក្នុងលោក ។
បន្ថែមពីនេះទៅទៀត លោក ប៊ីលហេ្គត មានក្ដីស្រមៃដែលថាផ្ទះទាំងអស់ និងមានកុំព្យូទ័រផ្ទាល់ខ្លួន ហើយសព្វថ្ងៃនេះផ្ទះខ្លះថែមទាំងមានកុំព្យូទ័រច្រើនជាងមួយគ្រឿងទៅទៀត។ រីឯលោក ស្ទីវចប វិញ ក្ដីសុបិនដ៏ធំ របស់លោក គឺដាក់កុំព្យូទ័រទាំងមូលចូលទៅក្នុងប្រព័ន្ធទូរស័ព្ទ។ សព្វថ្ងៃនេះទូរស័ព្ទរបស់យើងមិនត្រឹមតែអាចធ្វើអ្វីដែលកុំព្យូទ័រផ្ទាល់ខ្លួនអាចធ្វើបានប៉ុណ្ណោះទេ ប៉ុន្តែថែមទាំងមានអ្វីៗជាច្រើនទៀត ដែលនឹកស្មានមិនដល់។
អាថ៌កំបាំងរបស់មនុស្សអស្ចារ្យទាំងនោះ គឺពួកគាត់បានដាក់វិន័យ និងគោលការណ៍អោយខ្លួនពួកគាត់នៅអោយឆ្ងាយពីមនុស្សដែលមានចិត្តចង្អៀត។ ដូចនេះ ប្រសិនបើយើងចង់ទទួលបានការសម្រេចគោលបំណងដ៏អស្ចារ្យរបស់យើងអោយដូចពួកគាត់ ពួកយើងក៏ត្រូវតែនៅអោយឆ្ងាយពីប្រភេទមនុស្សដែលមានចិត្តចង្អៀតដូចខាងក្រោម៖
ទី១- មនុស្សចិត្តគំនិតក្ដាម
ចិត្តគំនិតក្ដាម គឺជាពាក្យប្រៀបធៀបមួយ សំដៅដល់មនុស្សមួយក្រុមដែល ឃើញនរណាម្នាក់នៅជុំវិញពួកគេ សម្រេចបាននូវការកែលម្អខ្លួនឯង ដែលពួកគេមិនអាចសម្រេចបានដោយខ្លូនឯង។ ពាក្យប្រៀបធៀបត្រូវបានបង្កើតចេញមកជាគំរូនៃឥរិយាបទដែលបានសំគាល់នៅក្នុងក្ដាមនៅពេលពួកសត្វទាំងនោះជាប់នៅក្នុងធុង។ ខណៈពេលដែលក្ដាមណាមួយអាចរត់គេចបានយ៉ាងងាយស្រួលវា និងត្រូវបានគេបំផ្លាញ និង កំទេចដោយអ្នកដទៃនៃក្រុមពួកវា។
ភាពស្រដៀងគ្នានៃអាកប្បកិរិយារបស់មនុស្សត្រូវបានគេអះអាងថាសមាជិកនៃក្រុមមួយ និងព្យាយាមកាត់បន្ថយភាពជឿជាក់លើខ្លួនឯងរបស់សមាជិកណាម្នាក់ដែលទទួលបានភាពជោគជ័យលើសពីខ្លួនឯង ដោយការច្រណែន និងការអាក់អន់ចិត្តដើម្បីបញ្ឈប់ការរីកចម្រើនរបស់បុគ្គលនោះ។
ទី២- មនុស្សដែលមានចិត្តបង្គួរ
មនុស្សប្រភេទនេះ គឺជាមនុស្សដែលមានគំនិតមធ្យម។ ពួកយើងតែងតែបង្ហាញសត្រូវដ៏អស្ចារ្យ ដ៏ធំបំផុត គឺក្ដីស្រមៃ ចក្ខុវិស័យ និងការអភិវឌ្ឍផ្ទាល់ខ្លួន។ ពួកគេជឿថាសត្រូវដ៏ធំបំផុតរបស់យើង គឺ ជាមនុស្សម្នាក់ដែលជួយយើងជោគជ័យបានតិចជាងអ្វីដែលធម្មជាតិបានបង្កើតយើងមក។
ពួកយើងត្រូវតែបង្កើតគំនិតមួយរបស់ពួកយើងអោយទៅដល់កម្រិតមួយ ដែលយើងអាចប្រឆាំងទៅ នឹងការហ៊ុមព័ទ្ធដោយមនុស្សដែលមានគំនិតមធ្យម។ បើពួកយើងសម្រេចចិត្តចង់បានតែប៉ុណ្ណឹងតិចជាងអ្វីដែលយើងអាចធ្វើបាននោះពួកយើងនឹងទទួលបានតិចជាងការចង់បានតែប៉ុណ្ណឹង។
ទី៣- មនុស្សដែលមានគំនិតថាខ្លួនឯងអសន្តិសុខ
មនុស្សដែលមានគំនិតចង្អៀត នឹងក្លាយជាមនុស្សប្រយ័ត្ននៃក្ដីស្រមៃដ៏ធំរបស់អ្នក។ ហេតុដូចនេះ មនុស្សដែលមានគំនិតថាខ្លួនឯងអសន្តិសុខជាមួយក្ដីស្រមៃដ៏ធំរបស់យើង នឹងធ្វើការប្រណាំងប្រជែងជាមួយអ្នក ជាជាងការជួយលើកទឹកចិត្ត និងជួយអ្នកឯងទេ។ ក្រុមនោះនឹងបំពុលក្ដីស្រមៃរបស់អ្នក។ ហើយថែមពីនេះទៅទៀត ពួកគេនឹងបំផ្លាញក្តីសុខរបស់អ្នកដទៃដោយសារពួកគេនោះមិនអាចរកក្ដីសុខដាក់ខ្លួន ប៉ុន្តែមានតែសេចក្ដីភ្លើងដាក់ខ្លួន។
អ្នកត្រូវការមនុស្សដែលមានការគោរព និងលើកតម្លៃខ្លួនឯងក្នុងន័យវិជ្ជមាន ដើម្បីវិនិយោគទៅក្នុងក្ដីស្រមៃរបស់អ្នក។ មនុស្សគោរពនិងលើកតម្លៃខ្លួនឯងក្នុងន័យវិជ្ជាមាន គឺជាទ្រព្យសម្បត្តិដ៏អស្ចារ្យបំផុតរបស់មនុស្សដែលមានក្ដីស្រមៃខ្ពស់។
ទី៤- មនុស្សដែលមានគោលបំណងទាប
សោកនាដកម្មដ៏ធំបំផុតនៃជីវិត មិនមែនថាយើងមានគោលដៅខ្ពស់ ហើយខកខាន ឬមិនបានធ្វើទៅដល់គោលដៅនោះទេ តែថាយើងបានកំណត់គោលដៅទាប។ កុំអោយមនុស្សដែលមានគំនិតតូច ទាញក្ដីសុបិនធំរបស់អ្នក អោយសមនឹងប្រអប់គោលបំណងដ៏តូចរបស់ពួកគេ។ មនុស្សដែលមានគំនិតទាប នឹងកាត់បន្ថយអ្នកអោយមានការគិតតូចដូចពួកគាត់ដែរ។ តម្កើងគោលបំណងរបស់អ្នកអោយខ្ពស់ដែលអាចទៅរួច ហើយមនុស្សដែលត្រឹមត្រូវនឹងមករកអ្នក។
ទី៥- មនុស្សដែលមានគំនិតច្រណែន
លោក អារីស្តូត បាននិយាយថាការច្រណែន គឺជាការឈឺចាប់ចំពោះសំណាងល្អរបស់អ្នកដទៃ។ នៅពេលមានមនុស្សមានចិត្តច្រណែនឈ្នានីស ពួកគាត់តែងតែជេរប្រមាថអ្វីៗទាំងអស់ មិនថាវាល្អ ឬ អាក្រក់នោះទេ។ ចំណែកឯលោក ណាប៉ូលេអុង បូណាផាត បាននិយាយថា៖ «ការច្រណែន គឺជាការប្រកាសនៃភាពអន់ថយ»។ កុំនាំមនុស្សច្រណែនមកក្នុងរង្វង់គំនិតរបស់អ្នក។ ពួកគេនឹងឱ្យក្ស័យធននៃក្ដីស្រមៃរបស់អ្នក។ រាល់ក្ដីស្រមៃរបស់យើងអាចក្លាយជាការពិត ប្រសិនបើយើងមានភាពក្លាហានក្នុងការតាមប្រមាញ់ក្តីស្រមៃទាំងនោះ។ ក្ដីសុបិន្ដធំ ប៉ុន្តែត្រូវតែចងចាំថា អ្នកត្រូវតែបោះជំហានពីតូចៗឆ្ពោះទៅរកការសម្រេចបាននូវក្ដីសុបិនទាំងឡាយរបស់អ្នក។ អ្នកមិនដែលក្មេងពេកទេ ក្នុងការសុបិន។ ហ៊ានសុបិនធំ។ លោតផ្លោះឆ្ពោះទៅរកសេចក្ដីជំនឿ ហើយបញ្ចេញសក្ដានុពលរបស់អ្នកអោយសាហាវតាមតែអាចធ្វើទៅរួច។
កុំបន្ទាបក្ដីសុបិនរបស់អ្នក គ្រាន់តែឲ្យសមទៅនឹងការពិតរបស់អ្នក។ ធ្វើឲ្យប្រសើរឡើងនូវការជឿជាក់របស់អ្នកដើម្បីឲ្យសមទៅនឹងជោគវាសនារបស់អ្នក។ អនាគតគឺជាកម្មសិទ្ធរបស់អ្នកដែលជឿជាក់លើភាពស្រស់ស្អាតនៃក្ដីសុបិនរបស់អ្នក។ កុំបោះបង់ចោលក្ដីសុបិនរបស់អ្នក ហើយនៅពេលនរណាម្នាក់ប្រាប់អ្នកថា «វាមិនអាចធ្វើបានទេ» វាមិនមែនបានន័យថាអ្នកមិនអាចធ្វើវាបានឡើយ។ វាមានន័យថា អ្នកមិនអាចធ្វើវាជាមួយពួកគេ។ កុំឲ្យនរណាម្នាក់និយាយថា «អ្នកមិនអាចធ្វើអ្វីបានទេ»។ អ្នកមានក្ដីសុបិនដែលអ្នកត្រូវការពារ និង សិទ្ធិក្នុងការរស់នៅក្នុងសុបិនរបស់អ្នកដែលស្ថិតនៅក្នុងដៃរបស់អ្នក។
តាមបទពិសោធន៍របស់ខ្ញុំផ្ទាល់ ខ្ញុំសូមថ្លែងអំណរគុណចំពោះអ្នកទាំងអស់ដែលបាននិយាយថា «ទេ» (វាមិនអាចធ្វើបានទេ) ចំពោះខ្ញុំផ្ទាល់។ ដោយសារតែពួកគេ ខ្ញុំបានធ្វើវាដោយខ្លួនឯង៕