ជាតិ
សង្គមជាតិ
ជនជាតិបរទេសដែលបានបង្ហោះវីដេអូ
×![]()
ដោយ: ឡាយ សុភាវតី
អគ្គនាយដ្ឋានអន្តោប្រវេសន៍នៃក្រសួងមហាផ្ទៃ បានបិទទិដ្ឋាការជាអចិន្ត្រៃយ៍លើជនជាតិបរទេសម្នាក់ ដែលបានបង្ហោះវីដេអូក្នុង YouTube ដែលមាន Chanel ឈ្មោះ James FT ដោយអំពាវនាវមិនឲ្យភ្ញៀវទេសចរបរទេសដទៃ មកទស្សនានៅកម្ពុជា។ ការសម្រេចបិទទិដ្ឋាការនេះ ធ្វើឡើងក្រោយពីរដ្ឋមន្រី្តក្រសួងទេសចរណ៍ លោក ថោង ខុន និងអគ្គនាយកដ្ឋានអន្តោប្រវេសន៍ ប្រជុំជាមួយគ្នា កាលពីថ្ងៃទី១៦ ខែធ្នូ ឆ្នាំ២០១៩។ 
អ្នកនាំពាក្យអគ្គនាយកដ្ឋានអន្តោប្រវេសន៍ លោក អាត់ បូនី ប្រាប់សារព័ត៌មានថ្មីៗ តាមទូរស័ព្ទនៅព្រឹកថ្ងៃទី១៩ ខែធ្នូ ដូច្នេះថា៖«ជនជាតិបរទេស ដែលបានបង្ហោះវីដេអូនោះ ត្រូវបានបិទទិដ្ឋាការមិនចូលកម្ពុជាជារៀងរហូត»។
ជាមួយគ្នាដែរ ក្រសួងទេសចរណ៍ នឹងដាក់ពាក្យបណ្ដឹងទៅកាន់ក្រុមហ៊ុន Google និង Facebook ដើម្បីសុំលុបវីដេអូ ដែលជនជាតិបរទេសនោះ បានបង្ហោះ។ ទំព័រហ្វេសប៊ុករបស់ក្រសួងទេសចរណ៍ បានសរសេរពីសម្តីរបស់លោក ថោង ខុន ដែលនិយាយក្នុងកិច្ចប្រជុំជាមួយអគ្គនាយកដ្ឋានអន្តោប្រវេសន៍ថា ក្រសួងទេសចរណ៍ នឹងរៀបចំសំណើទៅកាន់ក្រសួងការបរទេស និងកិច្ចហសប្រតិបត្តិការអន្តរជាតិ ដើម្បីចាត់ការលើជនបរទេសរូបនោះបន្ថែមទៀត។
សូមបញ្ជាក់ថា ជនជាតិបរទេសនេះ បានបង្ហោះវីដេអូពីកម្ពុជាពាក់ព័ន្ធនឹងបញ្ហាសំរាមនិងចំណីអាហារ។ លើសពីនេះ ជនជាតិបរទេសនេះ មិនពេញចិត្តកម្ពុជាដោយសាររកដៃគូ (មិត្តស្រី ) មិនបាន ហើយលើកឡើងថា កម្ពុជាខុសពីប្រទេសផ្សេងទៀត ដែលខ្លួនធ្លាប់ទៅ។ ជនជាតិបរទេសនេះ បានបង្ហោះវីដេអូនៅក្នុង Youtube តាំងពីថ្ងៃទី១៤ ខែសីហា ឆ្នាំ២០១៩មកម្ល៉េះ ហើយបន្ទាប់មកត្រូវបានចែករំលែកបន្តទៅលើបណ្តាញសង្គមហ្វេសប៊ុក៕
Tag:
បិទទិដ្ឋាការ
© រក្សាសិទ្ធិដោយ thmeythmey.com
