កីឡាជាតិ
ជាតិ
ជើងឯកពិភពលោកវ៉ូវីណាម៖ ប៉ាល់ ឆរស្ម៊ី ដណ្តើមបានមេដាយមាសទី៣ឲ្យកម្ពុជា រូបភាពពី Cambodia Vovinam Team
× កីឡាការិនី ប៉ាល់ ឆរស្ម៊ី ដណ្តើមបានមេដាយមាសទី៣ឲ្យកម្ពុជា នាការប្រកួតកីឡាវ៉ូវីណាមជ្រើសរើសជើងឯកពិភពលោកលើកទី៦នៅកម្ពុជា។ មេដាយមាសនេះដណ្តើមបានលើវិញ្ញាសាសម្តែងកាំបិតភ្លោះ(Dual Knife Form) ដែលមានកីឡាការិនីមកពី៤ប្រទេសចូលរួម។ នេះជាមេដាយមាសទី២របស់ រស្ម៊ី បន្ទាប់ពី នាង ដណ្តើមបានមេដាយមាសដំបូងក្នុងវិញ្ញាសាសម្តែងជាក្រុម។
ការធ្វើបានក្នុងលំដាប់ពិន្ទុ២៦៧ គឺវាគ្រប់គ្រាន់ក្នុងការជួយឲ្យកីឡាការិនី ប៉ាល់ ឆរស្ម៊ី គ្រងជើងឯកលើវិញ្ញាសាសម្តែងកាំបិតភ្លោះក្នុងការប្រកួតកីឡាវ៉ូវីណាមជ្រើសរើសជើងឯកពិភពលោក ដែលមានអត្តពលិកមកពី២៣ប្រទេសចូលរួម។ តាមរយៈមេដាយនេះ បង្ហាញឲ្យឃើញថា ឆរស្ម៊ី នៅតែជាកីឡាការិនីវ៉ូវីណាមឆ្នើមសម្រាប់កម្ពុជា ទោះបីមានវ័យច្រើនក៏ដោយ។
កីឡាការិនីមីយ៉ាន់ម៉ា Khaing War Phoo ទទួលបានមេដាយប្រាក់ ក្រោយធ្វើបាន២៦៦ពិន្ទុ រីឯមេដាយសំរឹទ្ធបានទៅលើកីឡាការិនីសិង្ហបុរី Shahrudin Nurhanishah ក្រោយធ្វើបាន២៦២ពិន្ទុ និងមេដាយសំរឹទ្ធស្ទួនបានទៅកីឡាការិនីបារាំង Truong Thuy Tien ក្រោយសម្រេចបាន២៥៩ពិន្ទុ។
នេះជាមេដាយមាសទី៣របស់កម្ពុជា តែជាមេដាយមាសទី២សម្រាប់កីឡាការិនី ប៉ាល់ ឆរស្ម៊ី បន្ទាប់ពីរូបគេដណ្តើមបានមេដាយមាសដំបូងលើវិញ្ញាសាសម្តែងជាក្រុមនៅថ្ងៃប្រកួតបើកឆាកដំបូង។ មុនមេដាយមាសរបស់កីឡាការិនីរូបនេះ កម្ពុជាដណ្តើមបានមេដាយមាសមួយរួចមកហើយ ដែលរកបានដោយកីឡាករ ភូថង អេ (ម៉ឹន មេឃា) លើវិញ្ញាសាប្រយុទ្ធទម្ងន់៦៤គីឡូក្រាម។
ការប្រកួតជើងឯកពិភពលោកនេះប្រព្រឹត្តទៅចន្លោះពីថ្ងៃទី១៦-២២ ខែធ្នូ ឆ្នាំ២០១៩ ដោយមានអត្តពលិកមកពី២៣ប្រទេសចូលរួម៕
Tag:
វ៉ូវីណាម
ប៉ាល់ ឆរស្ម៊ី
ជើងឯកពិភពលោក
© រក្សាសិទ្ធិដោយ thmeythmey.com