ជាតិ
បញ្ជូនស្ដ្រីម្នាក់ទៅតុលាការក្រោយលួចវេចខ្ចប់ប៊ីចេងក្លែងក្លាយ១៨តោន
×![]()
សៀមរាប៖ កម្លាំងចម្រុះ បានចុះឆែកឆេរទីតាំងវេចខ្ចប់ និងចែកចាយប៊ីចេងសញ្ញារូបវែងមួយកន្លែង និងបានរកឃើញប៊ីចេងក្លែងក្លាយសរុប១៨តោននៅក្នុងផ្ទះល្វែងមួយកន្លែង ស្ថិតក្នុងបុរីសៀងណាំ១ ក្នុងភូមិខ្នា សង្កាត់ជ្រាវ ក្រុងសៀមរាប។ បច្ចុប្បន្ន ម្ចាស់ទីតាំងត្រូវបានកម្លាំងជំនាញ រៀបចំសំណុំរឿងបញ្ជូនទៅតុលាការហើយ។
ស្នងការនៃស្នងការដ្ឋាននគរបាលខេត្តសៀមរាប លោក ទិត្យ ណារ៉ុង បានប្រាប់សារព័ត៌មានថ្មីៗតាមទូរសព្ទនៅរសៀលថ្ងៃទី១៩ ធ្នូថា ស្ត្រីម្ចាស់អាជីវកម្មមានឈ្មោះ ហ៊ិម មនោរី ត្រូវបាននាំខ្លួនទៅសាកសួរនៅស្នងការដ្ឋាននគរបាលខេត្តសៀមរាប នៅរសៀលថ្ងៃទី១៨ ធ្នូ។ លោកស្នងការបញ្ជាក់ថា ការចុះឆែកឆេរនេះ គឺធ្វើឡើងតាមពាក្យបណ្ដឹងរបស់ក្រុមហ៊ុននាំចូលប៊ីចេងសញ្ញារូបវែក ដោយចោទម្ចាស់អាជីវកម្មខាងលើថាបានក្លែងម៉ាកសញ្ញា ធ្វើអាជីវកម្មចែកចាយប៊ីចេងរូបវែងក្នុងក្រុងសៀមរាបដោយខុសច្បាប់។
លោកស្នងការបន្តថា ក្នុងប្រតិបត្តិការចុះឆែកឆេរនោះ មានការចូលរួមពី កម្លាំងនគរបាលប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្តសៀមរាប ដោយមានការសម្របសម្រួលពីព្រះរាជអាជ្ញារងនៃអយ្យការសាលាដំបូងខេត្តសៀមរាប រួមនិងកម្លាំងជំនាញមកពីរាជធានីភ្នំពេញផងដែរ។ លោក ទិត្យ ណារ៉ុង បញ្ជាក់ថា ម្ចាស់អាជីវកម្មខាងលើនឹងប្រឈមបទចោទពាក់ព័ន្ធនឹងការរំលោភកម្មសិទ្ធិបញ្ញា៕
Tag:
ប៊ីចេង
ក្លែងក្លាយ
© រក្សាសិទ្ធិដោយ thmeythmey.com
