កីឡាជាតិ
ជាតិ
ក្រុមឥន្ទ្រទេវីលើកពានជើងឯកវិទ្យាល័យ ជាមួយប្រាក់រង្វាន់៦០លានរៀល
× ក្រុមបាល់ទាត់វិទ្យាល័យឥន្ទ្រទេវីលើកពាន«ជើងឯកវិទ្យាល័យ»ប្រចាំឆ្នាំ២០១៩ អមជាមួយទឹកប្រាក់ចំនួន៦០លានរៀល ក្រោយយកឈ្នះក្រុមវិទ្យាល័យឬស្សីកែវ ២-១ ក្នុងជំនួបចុងក្រោយ នាកីឡដ្ឋានខេមបូឌាអ៊ែរវ៉េ។ ពិធីបិទការប្រកួតជើងឯកវិទ្យាល័យធ្វើឡើងក្រោមវត្តមានលោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា លោក សាយ សំអាល់ រដ្ឋមន្ត្រីក្រសួងបរិស្ថាន និងជាប្រធានសហភាពសហព័ន្ធយុវជនកម្ពុជាប្រចាំរាជធានីភ្នំពេញ។
ក្រោយប្រកួតសន្សំពិន្ទុតាមរូបមន្តវិលជុំអស់រយៈពេលប្រមាណ៨ខែ ក្រុមវិទ្យាល័យឥន្ទ្រទេវី បានក្លាយជាម្ចាស់ជើងឯកប្រចាំពានរង្វាន់ជើងឯកវិទ្យាល័យប្រចាំឆ្នាំ២០១៩។ តំណែងជើងឯក កើតឡើងក្រោយពួកគេយកឈ្នះក្រុមវិទ្យាល័យឬស្សីកែវក្នុងលទ្ធផល ២-១ នាជំនួបសន្សំពិន្ទុចុងក្រោយនៅកីឡដ្ឋានខេមបូឌាអ៊ែរវ៉េ។ ជ័យជម្នះនេះ ជួយឲ្យពួកគេគ្រងកំពូលតារាងដោយមាន៤៦ពិន្ទុ ខណៈក្រុមលេខ២វិទ្យាល័យឬស្សីកែវមាន៤២ពិន្ទុ។
ក្រៅពីពាននិងមេដាយមាសក្រុមយុវជនវិទ្យាល័យឥន្ទ្រទេវីទទួលប្រាក់រង្វាន់ចំនួន៦០លានរៀល ដែលចំនួននេះប្រហាក់ប្រហែលនឹងប្រាក់រង្វាន់ក្រុមជើងឯកនៃក្របខណ្ឌមិត្តហ្វូនខេមបូឌានលីគ។ ក្រុមលេខ២វិទ្យាល័យឬស្សីកែវទទួលបានប្រាក់រង្វាន់៤០លានរៀល ខណៈក្រុមលេខបីវិទ្យាល័យព្រះស៊ីសុវត្ថិទទួលបាន២០លានរៀល។ ចំណែកក្រុម Fair Play សាលារៀនវេស្ទឡាញន៍ទទួលបានថវិកាលើកទឹកចិត្តចំនួន២លានរៀល។
នាជំនួបចុងក្រោយដ៏ស្វិតស្វាយនៅកីឡដ្ឋានខេមបូឌាអ៊ែរវ៉េ នៅថ្ងៃទី១៩ ខែធ្នូ ឆ្នាំ២០១៩ កីឡាករ ជា ណារិន បានរកគ្រាប់បាល់នាំមុខ ១-០ ឲ្យក្រុមវិទ្យាល័យឬស្សីកែវនៅនាទីទី៣៥។ ប៉ុន្តែភាពរីករាយរបស់អ្នកគាំទ្រឬស្សីកែវបានរសាត់ឆ្ងាយទៅវិញ បន្ទាប់ពីខ្សែបម្រើ អាត អូនតូច វាយបកតាមស្មើ ១-១ ឲ្យក្រុមវិទ្យាល័យឥន្ទ្រទេវីនៅ៣នាទីបន្ទាប់។
សម្រែកទ្រហឹងអឺងកងពីអ្នកគាំទ្រឥន្ទ្រទេវីបានបន្តកើតឡើងម្តងទៀត បន្ទាប់ពីកីឡាករ ស រតនា សម្រេចគ្រាប់បាល់នាំមុខ ២-១ ឲ្យវិទ្យាល័យឥន្ទ្រទេវីនៅនាទីទី៤៥ មុនចប់វគ្គទី១។ ឈានដល់តង់ទី២ គ្មានគ្រាប់បាល់កើតឡើងឡើយសម្រាប់ក្រុមទាំងពីរ ទោះពួកគេបានព្យាយាមដាក់សម្ពាធ និងបង្កើតឱកាសដាក់គ្នាទៅវិញទៅមកក៏ដោយ ហើយពួកគេបានរក្សាលទ្ធផលនេះរហូតចប់ការប្រកួត។
នៅក្នុងពិធីបិទការប្រកួតពានរង្វាន់ជើងឯកវិទ្យាល័យ ដែលរៀបចំនៅកីឡដ្ឋានខេមបូឌាអ៊ែរវ៉េ ធ្វើឡើងក្រោមវត្តមានលោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា លោក សាយ សំអាល់ រដ្ឋមន្ត្រក្រសួងបិរស្ថាន និងប្រធានសហភាពសហព័ន្ធយុវជនកម្ពុជាប្រចាំរាជធានីភ្នំពេញ, លោកស្រី ពុធី ធីតា ប្រធានក្លិបបាល់ទាត់បឹងកេត និងថ្នាក់ដឹកនាំជាច្រើនរូបទៀត៕
Tag:
កីឡាជាតិ
ជើងឯកវិទ្យាល័យ
ឥន្ទ្រទេវី
© រក្សាសិទ្ធិដោយ thmeythmey.com