អន្តរជាតិ
លោក ត្រាំ ស្នើព្រឹទ្ធសភាឲ្យប្រញាប់បើកសវនាការរឿងដកតំណែង ប្រធានាធិបតី ដូណាល់ ត្រាំ ថ្លែងនាកិច្ចប្រជុំរួមសភានាពេលកន្លងមក។ ខាងក្រោយខ្នង គឺអនុប្រធានាធិបតី ម៉ៃ ផេន និងប្រធានរដ្ឋសភា ណាន់ស៊ី ផេឡូស៊ី ។ រូបភាព AFP
× ប្រធានាធិបតីអាមេរិក ដូណាល់ ត្រាំ នៅថ្ងៃទី១៩ ខែធ្នូ បានស្នើឲ្យព្រឹទ្ធសភាប្រញាប់បើកសវនាការលើសំណុំរឿងដកតំណែង ខណៈរដ្ឋសភាបានចោទប្រកាន់លោកជាផ្លូវការហើយនោះ។ លោក ត្រាំ ក៏ស្នើបក្សសាធារណរដ្ឋគ្រប់គ្រងសវនាការនេះឲ្យបានល្អក្នុងនាមជាបក្សសំឡេងភាគច្រើន ហើយឆាប់ផ្ដល់ភាពស្អាតស្អំដល់រូបលោក។ ប៉ុន្តែបក្សប្រជាធិបតេយ្យនៅព្រឹទ្ធសភា ទំនងមិនអនុញ្ញាតឲ្យលោក ត្រាំ រួចខ្លួនស្រួលៗឡើយ។
បន្ទាប់ពីរដ្ឋសភាបោះឆ្នោតចោទប្រកាន់លើប្រធានាធិបតី ដូណាល់ ត្រាំ ជាផ្លូវការ ដល់វេនព្រឹទ្ធសភាធ្វើការវិញម្ដង។ តាមច្បាប់អាមេរិក ព្រឹទ្ធសភាអាមេរិក នឹងក្លាយជាតុលាការកាត់ក្ដីលើសំណុំរឿងនេះថា ត្រូវបណ្ដេញលោក ត្រាំ ចេញពីតំណែងឬយ៉ាងណា។ សំឡេងពីរភាគបី ឬ៦៧នៃសមាជិកព្រឹទ្ធសភាអាមេរិក១០០រូប ជាសំឡេងចាំបាច់បំផុតដើម្បីដកលោក ត្រាំ បាន។
បច្ចុប្បន្ននេះ ការចោទប្រកាន់លោក ត្រាំ មិនទាន់ត្រូវបញ្ជូនទៅកាន់ព្រឹទ្ធសភាទេ ដោយប្រធានរដ្ឋសភាអាមេរិក ណាន់ស៊ី ផេឡូស៊ី រង់ចាំឲ្យព្រឹទ្ធសភាឯកភាពគ្នាលើបញ្ញត្តិ និងនីតិវិធីរបស់សវនាការសិន។លើសពីនេះ អ្នកស្រី ផេឡូស៊ី ក៏មិនទាន់បញ្ចេញឈ្មោះសមាជិកព្រឹទ្ធសភាដែលនឹងត្រូវដើរតួជារដ្ឋអាជ្ញាក្នុងការកាត់ក្ដីនេះដែរ។ ប៉ុន្តែលោក ត្រាំ ឯណោះវិញ ហាក់អន្ទះអន្ទែង និងចង់បានសវនាការមួយឲ្យបានលឿនបំផុត។
«ខ្ញុំចង់បានសវនាការឲ្យបានលឿន។» នេះជាទាមទាររបស់លោក ត្រាំ នៅលើ Twitter របស់ខ្លួននៅថ្ងៃទី១៩ ខែធ្នូ។ ក្នុងកិច្ចប្រជុំថ្ងៃទី១៨ រដ្ឋសភាអាមេរិក បានចោទលោក ត្រាំ លើករណីចំនួនពីរ គឺរំលោភអំណាច និងរារាំងដំណើការសភា ហើយក្លាយជាប្រធានាធិបតីអាមេរិកទីបីដែលត្រូវចោទបែបនេះ។ ប៉ុន្តែលោក ត្រាំ នៅតែចាត់ទុកការចោទប្រកាន់នេះ ជារឿងមិនពិត និងជាការតាមប្រមាញ់របស់បក្សប្រជាធិបតេយ្យ។
លោក ត្រាំ បានប្រាប់ទៅបក្សប្រជាធិបតេយ្យដែរថា ពួកគេនឹងចាញ់ក្ដី បើមិនមានវត្តមានក្នុងសវនាការទេនោះ។ តាមការគ្រោងទុក សវនាការកាត់ក្ដីលោក ត្រាំ រំពឹងធ្វើឡើងនៅដើមខែមករា ឆ្នាំ២០២០ ។ យ៉ាងណាមិញ បក្សសាធារណរដ្ឋ និងបក្សប្រជាធិបតេយ្យ មិនទាន់រកឃើញចំណុចរួមដើម្បីដំណើការសវនាការនៅឡើយទេ។ ចំណុចខ្ទាស់ធំជាងគេ គឺបក្សប្រជាធិបតេយ្យ ចង់ឲ្យសាក្សីសំខាន់ៗមួយចំនួន ចូលរួមផ្ដល់សក្ខីកម្ម ប៉ុន្តែបក្សសាធារណរដ្ឋបដិសេធ។
ក្នុងសវនាការ បើសមាជិកព្រឹទ្ធសភា៦៧ សម្រេចថា លោក ត្រាំ មានកំហុស នោះលោកនឹងត្រូវអស់តំណែង ហើយជំនួសដោយអនុប្រធានាធិបតី ម៉ៃ ផេន ។ ប៉ុន្តែសំឡេង៦៧ នេះ មិនមែនជារឿងងាយស្រួលសម្រាប់បក្សប្រជាធិបតេយ្យដែលមានសំឡេងតែ៤៧ ទល់នឹងបក្សសាធារណរដ្ឋដែលមាន៥៣សំឡេង។ ទាល់តែមានសមាជិកព្រឹទ្ធសភារបស់បក្សសាធារណរដ្ឋគាំទ្រខ្លះទើបគោលដៅដកតំណែងនេះ បានសម្រេច។
យ៉ាងណាក្ដី រឿងនេះទំនងមិនអាចកើតឡើងព្រោះបក្សសាធារណរដ្ឋជឿថា ការចោទប្រកាន់លោក ត្រាំ តាំងពីដើមរៀងមក ជារឿងនយោបាយច្រើនជាងដំណើការស៊ើបអង្កេតបទឧក្រិដ្ឋ។ លោក ត្រាំ ផ្ទាល់ ក៏ជឿជាក់លើសមាជិកបក្សរបស់លោកដែរ ទើបស្នើឲ្យឆាប់សវនាការ ន្អាលផ្ដល់ភាពស្អាតស្អំឲ្យរូបលោកវិញនោះ៕
Tag:
អាមេរិក
ដូណាល់ ត្រាំ
© រក្សាសិទ្ធិដោយ thmeythmey.com