អន្តរជាតិ
តុលាការប៉ាគីស្ថាន៖ បើស្លាប់មុនទទួលទោសប្រហារជីវិត សព Musharraf គប្បីដាក់ព្យួរ៣ថ្ងៃ
អតីតប្រធានាធិបតីប៉ាគីស្ថាន Pervez Musharraf ដែលត្រូវកាត់ទោសប្រហារជីវិតពីបទក្បត់ជាតិ
×![]()
សាកសពរបស់អតីតប្រធានាធិបតីប៉ាគីស្ថាន Pervez Musharraf គួរតែត្រូវយកមកកាន់កណ្ដាលរដ្ឋធានី អ៊ីស្លាម៉ាបាដ នៃប្រទេសប៉ាគីស្ថាន ហើយព្យួររយៈពេល ៣ ថ្ងៃ ប្រសិនបើលោកស្លាប់មុនទទួលទោសប្រហារជីវិត។ តុលាការពិសេសមួយក្នុងប្រទេសប៉ាគីស្ថាន បញ្ជាក់បែបនេះនៅថ្ងៃព្រហស្បតិ៍ ទី ១៩ ខែធ្នូ។ សព្វថ្ងៃ លោក Musharraf កំពុងសម្រាកក្នុងមន្ទីរពេទ្យនៅអេមីរ៉ាតអារ៉ាប់រួម។ 
តុលាការពិសេសដែលមានសមាជិក៣នាក់ បានកាត់ទោសប្រហារជីវិតកំបាំងមុខ លោក Musharraf អាយុ ៧៦ឆ្នាំ ពីបទ ក្បត់ជាតិ ក្នុងរឿងក្តីដែលអូសបន្លាយជាង៦ឆ្នាំ។ ក្នុងសាលក្រមលម្អិតចំនួន១៦៧ទំព័រ តុលាការពិសេសនេះ បានបញ្ជាក់ថា៖«ជនដែលត្រូវកាត់ទោស ត្រូវព្យួរក រហូតដល់ស្លាប់»។
បើតាមសារព័ត៌មាន The Times of India ប្រធានយុត្តិធម៌តុលាការជាន់ខ្ពស់ម្នាក់ដែលដឹកនាំតុលាការពិសេសនេះ Waqar Ahmad Seth បានលើកឡើងទៀតថា លោក Musharraf គួរតែត្រូវព្យួរនៅទីសាធារណៈ ប្រសិនបើលោកស្លាប់ មុនទទួលទោសប្រហារជីវិតរបស់លោក។
ត្រង់នេះ លោក និយាយដូច្នេះ៖«[…] ប្រសិនបើរកឃើញថាស្លាប់ សាកសព [លោក Musharraf] គួរត្រូវយកទៅកាន់តំបន់ D-Chowk ក្នុងរដ្ឋធានី អ៊ីស្លាម៉ាបាដ នៃប្រទេសប៉ាគីស្ថាន ហើយព្យួររយៈពេល ៣ ថ្ងៃ»។ គួរកត់សម្គាល់ថា តំបន់ D-Chowk ឬ Democracy Chowk គឺជាទីកន្លែងជិតនឹងអគាររដ្ឋាភិបាលសំខាន់មួយចំនួន ដូចជា ការិយាល័យនាយករដ្ឋមន្ត្រី សភា និងតុលាការកំពូល ជាដើម។
យ៉ាងណាក៏ដោយ យោធាប៉ាគីស្ថាន តាមរយៈអ្នកនាំពាក្យ ខឹងសម្បារជាខ្លាំងចំពោះសាលក្រមលម្អិតរបស់តុលាការពិសេសនេះ ដោយអះអាងថា សាលក្រមនេះ គឺប្រឆាំងនឹងតម្លៃអារ្យធម៌ សាសនា មនុស្សជាតិ និងតម្លៃដទៃផ្សេងទៀត។
ទន្ទឹមនេះ សាលក្រមនេះ ក៏កើតឡើងប៉ុន្មានម៉ោងប៉ុណ្ណោះក្រោយពីលោក Musharraf បានលើកឡើងជាសំណួរពាក់ព័ន្ធការជំនុំជម្រះរបស់តុលាការពិសេសនេះ ដោយនិយាយថា សាលក្រមនេះ គឺផ្អែកលើ «គំនុំសងសឹកផ្ទាល់ខ្លួន» របស់មនុស្សខ្លះ មកលើរូបលោក។ តាមរយៈវីដេអូដែលបង្ហោះកាលពីថ្ងៃពុធសប្តាហ៍នេះ អតីតប្រធានាធិបតីប៉ាគីស្ថានដែលមានទោសក្បត់ជាតិនេះ កំពុងសម្រាកព្យាបាលលើគ្រែមន្ទីរពេទ្យមួយ ដោយមើលទៅទន់ខ្សោយ ហើយនិយាយសឹងមិនរួច។
សូមបញ្ជាក់ថា លោកអតីតប្រធានាធិបតី Musharraf បានព្យួររដ្ឋធម្មនុញ្ញក្នុងឆ្នាំ២០០៧ ហើយប្រកាសដាក់រដ្ឋក្នុងភាពអាសន្ន ដែលក្រោមមាត្រា ៦ នៃរដ្ឋធម្មនុញ្ញរបស់ប៉ាគីស្ថាន គឺជាទង្វើក្បត់ជាតិ ដែលត្រូវកាត់ទោសប្រហារជីវិត។ លោក គឺជាមេដឹកនាំយោធាទីមួយដែលទទួលទោសប្រហារជីវិតក្នុងប្រវត្តិសាស្ត្ររបស់ប៉ាគីស្ថាន។
ការកាត់ទោសលោក គឺជារឿងធំក្នុងប្រទេសប៉ាគីស្ថាន ដែលយោធាដែលមានឥទ្ធិពលខ្លាំង បានដឹកនាំប្រទេសក្នុងតំបន់អាស៊ីខាងត្បូងនេះអស់ពេលជិតពាក់កណ្ដាលនៃប្រវត្តិសាស្ត្រ៧២ឆ្នាំរបស់ខ្លួន។ លោក បានឡើងកាន់អំណាចក្នុងឆ្នាំ១៩៩៩ ដោយផ្តួលរំលំរដ្ឋាភិបាលស៊ីវិលរបស់អតីតនាយករដ្ឋមន្ត្រី Nawaz Sharif ហើយបានដឹកនាំប្រទេសអស់ពេល៩ឆ្នាំ។ ក្នុងឆ្នាំ២០០៨ លោកបានសុំលាលែងពីតំណែងជាប្រធានាធិបតីទី១០របស់ប៉ាគីស្ថាន ក្រោយពីបក្សប្រឆាំងបានព្យាយាមបណ្តេញរូបលោកពីតំណែងកំពូលនេះ៕
Tag:
ប៉ាគីស្ថាន
Pervez Musharraf
តុលាការពិសេស
ក្បត់ជាតិ
© រក្សាសិទ្ធិដោយ thmeythmey.com
