ONE Championship
កីឡាជាតិ
ជាតិ
នៅ ស្រីពៅ សរសើរម្ចាស់ខ្សែក្រវាត់ពីរ Stamp Fairtex ដែលមានចំណុចយកគំរូតាម
×
ដោយ៖ ស៊ីធី
កីឡាការិនីមានប្រជាប្រិយភាព នៅ ស្រីពៅ សរសើរដល់ម្ចាស់ខ្សែក្រវាត់កម្រិតពិភពលោកពីរស្ថាប័ន STAMP FAIRTEX អំពីចំណុចល្អៗមួយចំនួន ហើយថែមទាំងអាចយកជាគំរូល្អទៀតផង។
នៅ ស្រីពៅ បានលើកចំណុចវិជ្ជមានបែបនេះ៖«ខ្ញុំបានមើលវីដេអូអំពីការប្រកួតរបស់គាត់ [STAMP FAIRTEX] ជាច្រើននាពេលកន្លងមក។ គាត់ល្អទាំងប្រកួតប្រដាល់សេរី ទាំងវាយដាក់ទ្រុង ឬ គុនចម្រុះ។ គាត់មានកម្លាំងជើងល្អ ទាត់លឿន និង ម៉ាត់លឿន។ STAMP ល្អទាំងវ៉ៃសេរីហើយទៅប្រកួតវាយដាក់ទ្រុង ឬ MMA ក៏នៅតែល្អខ្លាំងទៀតមួយរយៈចុងក្រោយ»។
កីឡាការិនីវ័យ ២៤ ឆ្នាំតំណាងឲ្យកម្ពុជាបានបង្ហើបអំពីទស្សនៈផ្ទាល់ខ្លួនទៀតថារូបគេមានចិត្តរំភើបពេលឃើញ Stamp ប្រកួតម្ដងៗ ព្រោះថាការប្រកួតរបស់ Stamp សុទ្ធតែល្អមើល។ Stamp មានវ័យត្រឹម ២២ ឆ្នាំ ប៉ុន្តែមានសមត្ថភាពអាចឈ្នះខ្សែក្រវាត់កម្រិតពិភពលោក ONE Championship ចំនួនពីប្រភេទកីឡាផ្សេងគ្នា។ Stamp ជាម្ចាស់ខ្សែក្រវាត់ផ្នែកកីឡាការិនីកម្រិតពិភពលោកមិនធ្លាប់មាននៅសង្វៀន ONE។ ខ្សែក្រវាត់ដែល Stamp កំពុងកាន់បច្ចុប្បន្ន មានដូចជា ONE Atomweight Kickboxing World Title និង ONE Atomweight Muay Thai World Title។ នៅថ្ងៃអនាគតដ៏ខ្លីខាងមុខ កីឡាការិនីថៃរូបនេះដាក់គោលដៅឈ្នះខ្សែក្រវាត់ ពីការប្រកួតកីឡាគុនចម្រុះម្ដង ព្រោះថា ការប្រកួតគុនចម្រុះ ៣ លើកចុងក្រោយមកនេះឈ្នះទាំង ៣ លើកតែម្ដង។
នៅ ស្រីពៅ បានគូសបញ្ជាក់ថា៖«និយាយរួមទៅបង ! ខ្ញុំពេញចិត្តចំពោះក្បាច់គុនប្រដាល់សេរីរបស់គាត់ល្អ ប៉ុន្តែពេលឡើងទៅប្រកួតក្បាច់គុនចម្រុះ និង MMA កាន់តែល្អថែមទៀត។ អ្វីដែលជាការលើកទឹកដល់ខ្ញុំ គឺ ខ្ញុំចង់ឈ្នះខ្សែក្រវាត់ដូចគាត់ដែរ»។
ក្រៅពីសរសើរចំពោះកីឡាការិនីជើងខ្លាំងថៃខាងលើ នៅ ស្រីពៅ ដែលជាម្ចាស់មេដាយសំរឹទ្ធកីឡាស៊ីហ្គេមលើកដំបូងក្នុងនាមជាកីឡាការិនី ក៏បង្ហាញអំពីការតាំងចិត្តយ៉ាងមុះបែបនេះ ៖«ខ្ញុំដាក់គោលដៅហ្វឹកហាត់ឲ្យខ្លាំងដូច Stamp ។ មានតែខំហ្វឹកហាត់ និង រកសង្វៀនប្រកួតឲ្យបានច្រើនដើម្បីទទួលបានបទពិសោធន៍ល្អៗថ្មីៗឆ្ពោះទៅដណ្ដើមខ្សែក្រវាត់កម្រិតខ្ពស់។ បើសិនយើងគ្រាន់តែហាត់ ហើយអត់បានប្រកួតក៏សមត្ថភាពនៅយ៉ាប់ដដែលបង»។
គួររំលឹកថា នៅ ស្រីពៅ ប្រកួតនៅសង្វៀន ONE Championship បានតែពីរគត់នៅឆ្នាំ ២០១៩ ហើយកីឡាការិនីវ័យ ២៤ ឆ្នាំរូបនេះទទូចចង់បានការប្រកួតបន្ថែមទៀតនៅសង្វៀនលំដាប់ពិភពលោកមួយនេះបើសិនជាអាចទៅរួច។ ស្រីពៅ ឡើងប្រកួតដំបូងឈ្នះពិន្ទុកីឡាការិនីថៃមានបទពិសោធន៍ច្រើន Rika Ishige កាលខែ កុម្ភៈ ឆ្នាំ ២០១៩ ក្នុងកម្មវិធី ONE: CLASH OF LEGENDS មុនពេលចាញ់កីឡាការិនីជើងចាស់ឥណ្ឌូណេស៊ី Priscilla Hertati Lumban Gaol កាលខែ ឧសភា ឆ្នាំ ២០១៩។
ទោះជាបែបណាក្ដី កូនសិស្សរបស់លោក ញ៉ូវ ម៉ាក និង លោក ម៉ាក សាខន ទទួលបានបទពិសោធន៍យ៉ាងច្រើនពីការប្រកួតលំដាប់អន្តរជាតិ និង ត្រៀមខ្លួនបន្តពង្រឹងទាំងក្បាច់ប្រដាល់គុនខ្មែរ និង គុនចម្រុះដើម្បីឈានទៅការប្រកួតឆ្នាំ ២០២០ ប្រកបដោយគុណភាព៕
© រក្សាសិទ្ធិដោយ thmeythmey.com