ជាតិ
នាយករដ្ឋមន្ត្រី បញ្ជាឱ្យអាជ្ញាធរប្រឹងទប់ស្កាត់ កុំឱ្យមានការចែកចាយគ្រឿងញៀន និងភេរវកម្មនៅតំបន់សមុទ្រ
×![]()
ដោយ: ធឿន បញ្ញាឬទិ្ធ
ភ្នំពេញ៖ សម្ដេច ហ៊ុន សែន បានបញ្ជាឱ្យអាជ្ញាធរទាំងអស់នៅតាមតំបន់ឆ្នេរ ប្រឹងប្រែងទប់ស្កាត់បញ្ហាគ្រឿងញៀន និងអំពើភេរវកម្ម នៅតំបន់កម្សាន្តទាំងនោះ ដើម្បីរក្សាស្ថិរភាព និងសន្តិសុខដល់ភ្ញៀវទេសចរ ដែលមកលេងកម្ពុជា។
«កុំឱ្យមានភេរវកម្ម កើឡើងនៅតំបន់ទេសចរណ៍មាត់សមុទ្រ។ កុំឱ្យមានគ្រឿងញៀន កុំឱ្យមានបងតូច-បងធំ និងក្រុមធ្វើសកម្មភាពបំផ្លិចបំផ្លាញស្ថិរភាព នៅក្នុងតំបន់ទេសចរណ៍»។ នេះជាការលើកឡើងរបស់សម្ដេច ហ៊ុន សែន ដែលបានកំណត់គោលដៅថា តំបន់ទេសចរណ៍នៅកម្ពុជា ត្រូវតែជាកន្លែងសុវត្ថិភាព ដែលគ្មានការគំរាមកំហែងពីពួកម៉ាហ្វីយ៉ា (ក្រុមជនពាល)។
និយាយដល់ចំណុចនេះលោកនាយករដ្ឋមន្ត្រី ហ៊ុន សែន បានអះអាងថា មូលហេតុដែលរដ្ឋាភិបាលបានសម្រេចបិទល្បែងអនឡាញគ្រប់ប្រភេទ ដោយសារបារម្ភពីបញ្ហាសន្តិសុខ និងបទឧក្រិដ្ឋកម្មផ្សេងៗកើតឡើងនៅកម្ពុជា ជាពិសេសនៅក្នុងតំបន់សមុទ្រនេះតែម្ដង។
ថ្លែងនៅក្នុងពិធីបើកបុណ្យសមុទ្រលើកទី៨ ដែលធ្វើឡើងនៅក្នុងខេត្តកំពត កាលពីថ្ងៃទី២១ ធ្នូ ប្រមុខរដ្ឋាភិបាល បានសង្កត់ធ្ងន់ថា ការបើកឱ្យមានល្បែងអនឡាញនេះ វាធ្វើកម្ពុជាជួបបញ្ហាប្រឈមពីរ គឺបញ្ហាលាងលុយកខ្វក់ ដែលនាំឱ្យមានសកម្មភាពគាំទ្រអំពើភេរវកម្មណាមួយនៅកម្ពុជា និងបញ្ហាអសន្តិសុខ សណ្ដាប់ធ្នាប់ ដែលបង្កឡើងដោយក្រុមម៉ាហ្វីយ៉ា (ក្រុមជនពាល)ជាដើម។ សម្រាប់នាយករដ្ឋមន្ត្រី ហ៊ុន សែន បញ្ហាទាំងនេះ វានឹងធ្វើឱ្យប៉ះពាល់ដល់ការវិនិយោគ និងសេដ្ឋកិច្ចកម្ពុជា ដូច្នេះមានតែការលុបបំបាត់ចោលល្បែងអនឡាញទេ ទើបកម្ពុជាអាចរក្សាស្ថិរភាពសេដ្ឋកិច្ចបាន។
«មនុស្សមួយចំនួនព្រួយបារម្ភអំពីបញ្ហាបាត់អនឡាញ នៅពេលដែលមានអនឡាញ នាំគ្នាព្រួយបារម្ភអំពីវត្តមានជនជាតិចិននៅកម្ពុជា។ នៅពេលដែលយើងបិទអនឡាញគេព្រួយបារម្ភអំពីការបាត់ជនជាតិចិនពីកម្ពុជា។ តើអ្នកចង់បានអ្វីពិតប្រាកដ? សម្រាប់ខ្ញុំ ខ្ញុំសង្កេតឃើញថា បើសេដ្ឋកិច្ចកម្ពុជាពឹងពាក់តែលើអនឡាញ កម្ពុជានឹងក្លាយទៅជាអ្នករងគ្រោះសម្រាប់បញ្ហាសន្ដិសុខជាតិរបស់ខ្លួន យើងស្ថិតនៅក្រោមការគំរាមកំហែង នៃក្រុមម៉ាហ្វីយ៉ាដែលជ្រៀតចូលមកក្នុងប្រទេសរបស់យើង ដើម្បីធ្វើសកម្មភាព យើងក៏ស្ថិតនៅក្នុងស្ថានភាព ដែលនឹងក្លាយទៅជាប្រទេសនៃគោលដៅ នៃការលាងលុយកខ្វក់ តាមរយៈអនឡាញ»។ នេះជាការអះអាងរបស់សម្ដេច ហ៊ុន សែន៕
Tag:
ហ៊ុន សែន
គ្រឿងញៀន
ភេរវកម្ម
ឆ្នេរសមុទ្រ
© រក្សាសិទ្ធិដោយ thmeythmey.com
