ភ្នំពេញ៖ មុនសម្រេចចិត្តទិញសៀវភៅ អ្នកអានគប្បីគិតដល់ខ្លឹមទាំង៣ចំណុចធំៗ គឺខ្លឹមសារ អត្ថរូប និងតម្លៃ ទើបអាចទទួលបានសៀវភៅដែលល្អ និងនាំមកនូវប្រយោជន៍ឱ្យដល់ខ្លួន។ ទោះជាយ៉ាងណា សៀវភៅគឺជាអាវុធមុខ២ ដែលទាមទារឱ្យអ្នកអានថ្មីថ្មោង គួរសួរយោបល់ពីរៀមច្បងឬក៏គ្រូជាមុន ដើម្បីដឹងពីគុណតម្លៃរបស់វា។
ដើម្បីដឹងកាត់តែស៊ីជម្រៅ ទៅលើការជ្រើសរើសសៀវភៅមកអាន តទៅនេះសូមស្ដាប់បទយកការណ៍ដែលរៀបរៀងដោយកញ្ញា ប៉ូ សាគុន ដូចតទៅ៖
ក្នុងសន្និសីទសារព័ត៌មានស្ដីអំពីការតាំងពិព័រណ៍សៀវភៅក្រោមប្រធានបទ “ផ្ដើមក្ដីស្រមៃ ដៃកាន់សៀវភៅ” លោក កុក រស់ ប្រធាននាយកដ្ឋានសៀវភៅនិងការអាន បានបញ្ជាក់ពីគុណតម្លៃរបស់សៀវភៅ ដែលអ្នកអានគួរគម្បីដឹង មុននឹងជ្រើសរើសសៀវភៅយកមកអាន៖«ក្នុងការវិនិច្ឆ័យចង់ដឹងថាសៀវភៅឬស្នាដៃនោះល្អឬអាក្រក់ យើងត្រូវមើលខ្លឹមទាំង៣ គឺទី១ខ្លឹមសារ(អត្ថន័យ) ទី២អត្ថរូប (អក្ខរាវិរុទ្ធ ឃ្លាឃ្លោង) ទី៣ គឺតម្លៃ(អត្ថរស) ពេលដែលអានហើយតើយើងបានអ្វី»។
ទោះជាយ៉ាងណាលោក កុក រស់ បានផ្ដោតសំខាន់ទៅលើអ្នកដែលទើបតែមានចំណាប់អារម្មណ៍ ក្នុងការអានសៀវភៅឱ្យប្រុងប្រយ័ត្ន ដោយលោកណែនាំយ៉ាងដូច្នេះ៖«អ្នកទើបអានថ្មីមិនបានចាប់អារម្មណ៍ចំណុចទាំង៣នេះទេ គឺគ្រាន់តែឃើញក្របហ្នឹងស្អាតគិតថាសៀវភៅហ្នឹងល្អហើយ។ ការវាយតម្លៃសៀវភៅមិនមែនមើលលើក្របសៀវភៅទេ ដូចករណីវាតម្លៃមនុស្សក៏ដូច្នោះដែរ គេមិនមែនមើលតែសំបកក្រៅ ដឹងថាអ្នកនោះបែបណានោះទេ។ ការអានទី១មើលចំណងជើងសៀវភៅ បន្ទាប់មកមើលមាតិកា បើមើលទៅចាប់អារម្មណ៍ហើយ អាចសម្រេចចិត្តទិញបានហើយ។ ប៉ុន្តែបើមើលតែក្របហើយទិញអាចនឹងខកចិត្ត»។
សៀវភៅប្រៀបបាននឹងអាហារដូច្នោះដែរ។ អាហារខ្លះជួយឱ្យអ្នកបរិភោគមានសុខភាពល្អ ប៉ុន្តែអាហារខ្លះវាបែរជានាំទុក្ខដល់អ្នកបរិភោគទៅវិញ ហើយប្រការនេះ ប្រធាននាយកដ្ឋានសៀវភៅនិងការអាន បានផ្ដល់យោបល់ថា៖«សៀវភៅគឺជាអាវុធមុខ២វាអាចល្អ វាអាចមិនល្អ។ អ្នកអានបើមិនធ្លាប់អានធ្លាប់ទិញទេ គួរតែសួរអ្នកគ្រូឬលោកគ្រូ ឬក៏រៀមច្បងដែលធ្លាប់អានសៀវភៅច្រើន ថាសៀវភៅណាផ្ដល់គុណប្រយោជន៍ឱ្យច្រើន។ ការអានសៀវភៅគឺមិនមែនអានតែសៀវភៅណាដែលយើងចូលចិត្តនោះឡើយ ប៉ុន្តែសៀវភៅដែលយើងមិនចូលចិត្តក៏ត្រូវអានដែរ ដើម្បីឱ្យយើងមានពុទ្ធិ»។
លោកបន្ថែមពីបញ្ហាអាក្រក់ដែលអាចនឹងកើតមាន ប្រសិនបើអ្នកអានជ្រើសរើសសៀវភៅខុសយកមកអាន៖«សៀវភៅចាត់ទុកជាគ្រូមួយដែលប្រយោល ដូច្នេះបើសៀវភៅនាំទៅអាក្រក់គាត់និងប្រព្រឹត្តអាក្រក់ ហើយវានឹងប៉ះពាល់ដល់ខ្លួនគាត់ គ្រួសារនិងសង្គមទាំងមូល។ ដូច្នេះមុននឹងជ្រើសរើសសៀវភៅយកមកអាន ត្រូវគិតពិចារណាច្រើនដែរ»។
ជាដំណាក់កាលដំបូងក្នុងការជ្រើសរើសសៀវភៅយកមកអាន អ្នកអានទាំងឡាយគួរស្វែងរកឱ្យឃើញពីចំណុងចំណូលចិត្តរបស់ខ្លួនជាមុនសិន នោះទើបអាចឱ្យអ្នកអានកើតប្រយោជន៍ពីការអានសៀវភៅ៖«អ្នកអានវ័យក្មេង គាត់ត្រូវសួរខ្លួនឯងថា គាត់ចូលចិត្តអានសៀវភៅបែបណា ហើយត្រូវសួរថា តើសៀវភៅដែលគាត់អាននោះបានផ្ដល់ផលប្រយោជន៍អ្វីខ្លះឱ្យគាត់? នេះជាអ្វីដែលគាត់ត្រូវសួរខ្លួនឯងដំបូងបំផុត»។
ទោះជាយ៉ាងណាដើម្បីអាចជួយអ្នកអានបាន អ្នកនិពន្ធជាចំណែកដ៏សំខាន់បំផុតក្នុងការធ្វើឱ្យប្រសើរឡើងនូវស្នាដៃរបស់ខ្លួន ហើយលោក ហុក សុទ្ធិ ប្រធានសមាគមបណ្ណារក្ស និងឯកសារវិទូកម្ពុជា និងជានាយកអង្គការស៊ីប៉ា បានលើកឡើងថា៖«ដើម្បីទាក់ទាញអ្នកអាចឱ្យអានច្រើន ទាល់តែយើងបោះពុម្ពសៀវភៅឱ្យមានលក្ខណៈទាក់ទាញ និងមានគុណភាពល្អ ឱ្យបានច្រើនប្រភេទ។ គ្រួសារនីមួយៗមានតួនាទីសំខាន់ណាស់ ក្នុងការបង្រៀនកូនឱ្យក្លាយជាអ្នកអានតាំងពីក្មេង បើមិនដូច្នោះទេគាត់អានមិនកើតទេ»។
លោកបន្ថែមពីសារសំខាន់ នៅពេលដែលម្ដាយឪពុក បានទម្លាប់កូនឱ្យនៅស្និទ្ធស្នាលនឹងសៀវភៅ៖«តាំងពីកើតភ្លាម ឪពុកម្ដាយត្រូវឱ្យកូនមានទំនាក់ទំនងជាមួយសៀវភៅ ដូចជាឱ្យគាត់លេងសៀវភៅ កាន់សៀវភៅ ឬមើលរូបភាព ទោះគាត់មិនទាន់ចេះអានក្ដី។ ឱ្យគាត់ស្គាល់សៀវភៅកាន់តែលឿនកាន់តែប្រសើរ»។
ជាការពិតណាស់ការផ្សព្វផ្សាយ រួមជាមួយការមានទីតាំងតម្កល់សៀវភៅសម្បូរបែប និងគ្រប់ទីកន្លែង គឺជាកត្តាដ៏ចាំបាច់ដែលត្រូវមាន ក្នុងការលើកស្ទួយក៏ដូចជាការលើកទឹកចិត្ត ឱ្យមានកំណើនការអានសៀវភៅ។ ក្នុងនោះបណ្ណាល័យជាតិបានរួមចំណែកយ៉ាងសកម្មដើម្បីធ្វើកិច្ចការនេះ។ អ្នកស្រី ខ្លូត វីបុលឡា ប្រធានបណ្ណាល័យជាតិកម្ពុជា បានលើកឡើងថា៖« បណ្ណាល័យជាតិរាល់ថ្ងៃនេះ គឺយើងខិតខំគ្រប់បែបយ៉ាង ដូចជាការតាំងពិព័រណ៍សៀវភៅ ដើម្បីឱ្យមហាជនបានស្គាល់បណ្ណាល័យជាតិ និងបានអានសៀវភៅកាន់តែច្រើន»។
អ្នកស្រីបន្ថែម៖«បណ្ណាល័យជាតិជាកន្លែងដែលប្រមូលរាល់ការបោះពុម្ពផ្សាយទាំងអស់ ទាំងក្នុងស្រុកនិងក្រៅស្រុក យកមកតម្កល់ទុក និងផ្សព្វផ្សាយទៅដល់អ្នកស្រាវជ្រាវទាំងអស់។ បណ្ណាល័យជាតិមានការងារច្បាស់លាស់មួយ គឺយើងជួយទំនាក់ទំនងពីបណ្ណាល័យមួយទៅបណ្ណាល័យមួយទៀត ទាំងក្នុងស្រុកទាំងក្រៅប្រទេស»។
ត្រឡប់ទៅលោក កុក រស់ វិញ លោកបានឱ្យតម្លៃលើការអានសៀវភៅយ៉ាងដូច្នេះ៖«សៀវភៅដូចជាឱសថទិព្វ។ ពេលដែលយើងអានសៀវភៅច្រើន យើងនឹងមានបណ្ឌិតអ្នកចេះដឹងនៅជុំវិញខ្លួនយើងច្រើន។ យកសៀវភៅជាមិត្ត ប្រៀបបានយកបណ្ឌិតជាទីប្រឹក្សា។ ដូច្នេះបើយើងអានសៀវភៅច្រើន យើងនឹងធ្វើកិច្ចការអ្វីបានលទ្ធផលល្អភាគច្រើន»៕