លោក ដាញ់ សារី ឡើងជាប្រធានមន្ទីររៀបចំដែនដីខេត្តកំពត ជំនួសលោក យិន វុឌ្ឍ

ជាតិ

លោក ដាញ់ សារី ឡើងជាប្រធានមន្ទីររៀបចំដែនដីខេត្តកំពត ជំនួសលោក យិន វុឌ្ឍ

23, Dec 2019 , 6:29 pm

រូបភាព

លោក ដាញ់ សារី ទទួលត្រាពីលោក ឆាន់ សាផាន។ រូបថត រដ្ឋបាលខេត្តកំពត

ដោយ: ឡាយ សុភាវតី

ភ្នំពេញ៖ លោក ដាញ់ សារី ឡើងកាន់តំណែងជាប្រធានមន្ទីររៀបចំដែនដីនគរូបនីយកម្មសំណង់ និងសុរិយោដីខេត្តកំពតជំនួស លោក យិន វុឌ្ឍ ដែលត្រូវបានផ្ទេរភារកិច្ចទៅបម្រើការនៅទីស្តីការក្រសួងរៀបចំដែនដី នគរូបនីយកម្ម និងសំណង់។ នេះបើតាមការចេញផ្សាយលើទំព័រហ្វេសប៊ុករបស់រដ្ឋបាលខេត្តកំពតនៅថ្ងៃទី២៣ ធ្នូ ឆ្នាំ២០១៩។

ការតែងតាំងនេះ ធ្វើឡើងនៅសាលប្រជុំសាលាខេត្តកំពត ដោយមានការចូលរួមពីលោក ឆាន់ សាផាន រដ្ឋលេខាធិការប្រចាំការនៃក្រសួងរៀបចំដែនដីនគរូបនីយកម្ម លោក ជាវ តាយ អភិបាលខេត្តកំពត និងមន្ត្រីរាជការជាច្រើននាក់ទៀត។

ក្នុងពិធីរៀបចំផ្ទេរភារកិច្ចនេះ លោក ជាវ តាយ លើកឡើងថា ប្រធានមន្ទីរទើបទទួលតំណែងថ្មីត្រូវបន្តធ្វើកិច្ចការដែលនៅសេសសល់ដើម្បីបម្រើប្រជាពលរដ្ឋឱ្យបានល្អ ពិសេសការផ្តល់ប័ណ្ណកម្មសិទ្ធិជាលក្ខណៈប្រព័ន្ធជូនប្រជាពលរដ្ឋស្របតាមគោលនយោបាយរបស់រាជរដ្ឋាភិបាលលើកិច្ចការងារដីធ្លី។

ជាមួយគ្នាដែរ លោក ឆាន់ សាផាន បានបញ្ជាក់ថា មន្ត្រីជំនាញស្ថិតក្នុងក្របខ័ណ្ឌរដ្ឋត្រូវប្រើប្រាស់ពេលវេលាឱ្យបានសមរម្យស្របតាមច្បាប់ដែលបានកំណត់៕