រដ្ឋាភិបាល ត្រៀមសាងសង់«ផ្សារព្រំដែន»ពីរទៀត នៅខេត្តកំពត និងស្វាយរៀង

ជាតិ

សេដ្ឋកិច្ច

រដ្ឋាភិបាល ត្រៀមសាងសង់«ផ្សារព្រំដែន»ពីរទៀត នៅខេត្តកំពត និងស្វាយរៀង

24, Dec 2019 , 10:46 am

រូបភាព

ដោយ: ធឿន បញ្ញាឬទិ្ធ

ភ្នំពេញ៖ រដ្ឋាភិបាល គ្រោងសាងសង់«ផ្សារគំរូ» ចំនួន២ទៀត នៅក្នុងខេត្តកំពត និងខេត្តស្វាយរៀង។ សម្ដេច ហ៊ុន សែន អះអាងបែបនេះ នៅក្នុងពិធីសម្ពោធផ្សារដោះដូរទំនិញកម្ពុជា-វៀតណាម(ផ្សារគំរូព្រំដែន កម្ពុជា) នៅខេត្តត្បូងឃ្មុំ នាព្រឹកថ្ងៃទី២៤ ធ្នូនេះ។

សម្តេច ហ៊ុន សែន បានស្នើទៅវៀតណាមរួចហើយ ចំពោះគោលបំណងសាងសង់«ផ្សារគំរូព្រំដែន»នេះ តែវៀតណាមមិនទាន់ឆ្លើយតបវិញ។ តែយ៉ាងណាលោកនាយករដ្ឋមន្ត្រីកម្ពុជា អះអាងថា រដ្ឋាភិបាលនឹងប្រើប្រាស់ថវិកាជាតិ ក្នុងការសាងសង់ផ្សារព្រំដែនទាំងពីរនេះ ដែលត្រូវចំណាយថវិកាប្រមាណជា២លានដុល្លារ សម្រាប់ផ្សារនីមួយៗ។

សម្ដេច ហ៊ុន សែន បានបញ្ជាឱ្យអភិបាលខេត្តទាំងពីរនេះ សិក្សាលើទីតាំងសាងសង់ផ្សារគំរូ ឱ្យបានសមរម្យ ដើម្បីផ្ដល់ភាពងាយស្រួលប្រជាពលរដ្ឋ នៅតាមតំបន់ព្រំដែន។ បើតាមប្រមុខរដ្ឋាភិបាល ការរៀបចំផ្សារគំរូនៅតាមព្រំដែននេះ គឺដើម្បីថែរក្សាស្ថិរភាព និងសុវត្ថិភាពជូនពលរដ្ឋ។

នៅព្រឹកថ្ងៃទី២៤ ធ្នូនេះ រដ្ឋាភិបាលកម្ពុជា និងវៀតណាម បានបើកឱ្យដំណើរការ «ផ្សារគំរូព្រំដែនកម្ពុជា» ឬ «ផ្សារដារ» ដែលមានទីតាំងនៅតំបន់សេដ្ឋកិច្ចពិសេសថារីត្បូងឃ្មុំ ឃុំដារ ស្រុកមេមត់ ខេត្តត្បូងឃ្មុំ លើផ្ទៃដីទំហំប្រមាណ២ហិកតា ចម្ងាយប្រមាណ៣០០ម៉ែត្រពីព្រំប្រទល់ជាមួយខេត្តតៃនិញ ប្រទេសវៀតណាម។ ផ្សារនេះសាងសង់ឡើង ដោយចំណាយទឹកប្រាក់ជិត២លានដុល្លារអាមេរិក ដែលជាជំនួយរបស់រដ្ឋាភិបាលវៀតណាម។

ផ្សារគំរូព្រំដែនកម្ពុជានេះ ត្រូវបានអនុញ្ញាតឱ្យដាក់លក់តែផលិតផលរបស់កម្ពុជា និងវៀតណាមប៉ុណ្ណោះ ដោយមិនអនុញ្ញាតឱ្យលក់ផលិតប្រទេសដទៃនោះឡើយ។ នេះបើតាមលោកនាយករដ្ឋមន្ត្រី ហ៊ុន សែន ដែលបានរំពឹងថា សក្ដានុពលនៃផ្សារគំរូព្រំដែននេះ នឹងជួយបង្កើនទំហំពាណិជ្ជកម្មភាគីទាំងពីរឱ្យដល់៥ពាន់ដុល្លារអាមេរិក តាមការគ្រោងទុក៕