មេដឹកនាំនៃប្រទេសចិន ជប៉ុន និងកូរ៉េខាងត្បូង បានរំឭកសារជាថ្មីនូវការតាំងចិត្តពួកគេក្នុងការបញ្ចប់កម្មវិធីមីស៊ីល និងនុយក្លេអ៊ែររបស់កូរ៉េខាងជើង ដោយព្រមជួយជំរុញកិច្ចសន្ទនារវាងក្រុងវ៉ាស៊ីនតោន និងព្យុងយ៉ាង។ កិច្ចសហប្រតិបត្តិការសេដ្ឋកិច្ចនិងពាណិជ្ជកម្ម ក៏ស្ថិតក្នុងប្រធានបទដ៏លេចធ្លោក្នុងកិច្ចពិភាក្សារវាងនាយករដ្ឋមន្ត្រីចិន លី ខឹឈាំង សមភាគីជប៉ុន ស៊ិនហ្សូ អាបេ និងប្រធានាធិបតីសាធារណរដ្ឋកូរ៉េ មូន ចេអ៊ីន ដែលបានរៀបចំឡើងនៅថ្ងៃអង្គារ ២៤ ខែធ្នូ នាទីក្រុង Chengdu នៃប្រទេសចិន។
ថ្លែងនៅសន្និសីទរួមគ្នាក្រោយជំនួប លោកនាយករដ្ឋមន្ត្រីចិន លី ខឹឈាំង គូសបញ្ជាក់ថា ប្រទេសទាំងបី បានយល់ព្រមគ្នាថា កិច្ចសន្ទនា និងការប្រឹក្សា គឺជាវិធីសាស្ត្រដ៏មានប្រសិទ្ធភាពតែមួយគត់ក្នុងការដោះស្រាយបញ្ហានៅឧបទ្វីបកូរ៉េ។ តាមការចុះផ្សាយរបស់ទីភ្នាក់ងារ AP លោក លើកឡើងដូច្នេះថា៖«យើង ប្រទេសទាំងបី មានឆន្ទៈធ្វើការរួមគ្នាជាមួយ សហគមន៍អន្តរជាតិ ក្នុងគោលដៅដោះស្រាយបញ្ហាលើឧបទ្វីបកូរ៉េខាងជើង ដោយប្រើវិធីសាស្ត្រនយោបាយ»។
ចំណែក លោកប្រធានាធិបតី មូន ចេអ៊ីន បានលើកឡើងថា ភាគីទាំងបី បានយល់ព្រមគាំទ្រកិច្ចប្រឹងប្រែងស្តារឡើងវិញនូវកិច្ចសន្ទនារវាងក្រុងវ៉ាស៊ីនតោន និងក្រុងព្យុងយ៉ាង ដូច្នេះហើយ ការរំសាយកម្មវិធីមីស៊ីល និងអាវុធនុយក្លេអ៊ែរ ព្រមទាំងសន្តិភាព ពិតជាអាចជឿនលឿនបាន។ ត្រង់ចំណុចនេះ លោក មូន សង្កត់ធ្ងន់ថា៖«សន្តិភាពលើឧបទ្វីបកូរ៉េ គឺជាផលប្រយោជន៍រួមនៃប្រទេសទាំងបី»។
ដោយមិនផ្លាស់ប្តូរជំហរ លោកនាយករដ្ឋមន្ត្រី ស៊ិនហ្សូ អាបេ បន្តរិះគន់ការបាញ់សាកល្បងមីស៊ីលពីសំណាក់កូរ៉េខាងជើង ដោយចោទថា បំពានសេចក្តីសម្រេចរបស់អង្គការសហប្រជាជាតិ និងគំរាមកំហែងធ្ងន់ធ្ងរដល់សន្តិសុខតំបន់។ តាម AP លោក និយាយបែបនេះ៖ «សម្រាប់គោលបំណងនេះ វាបានបញ្ជាក់ថា ការអនុវត្តពេញលេញនៃសេចក្តីសម្រេចក្រុមប្រឹក្សាសន្តិសុខ នៅតែមានសារសំខាន់ ហើយយើងត្រូវការរក្សាសន្ទុះនៃការវិវឌ្ឍកិច្ចសន្ទនាកូរ៉េខាងជើង-សហរដ្ឋអាមេរិក»។
ទោះបីជាប្រភពដ៏សំខាន់បំផុតមួយរបស់ទីក្រុងព្យុងយ៉ាងទាំងក្នុងវិស័យវិនិយោគ ការគាំទ្រការទូត និងជំនួយសេដ្ឋកិច្ច ក៏ប៉ុន្តែក្រុងប៉េកាំង ហាក់ពុំសូវទទួលបានផ្លែផ្កាច្រើនឡើយក្នុងការបញ្ចុះបញ្ចូលរដ្ឋាភិបាលរបស់លោក គីម ជុងអ៊ុន ឲ្យបោះបង់កម្មវិធីអាវុធនុយក្លេអ៊ែរ។ កូរ៉េខាងជើង បានដាក់កាលបរិច្ឆេទត្រឹមដំណាច់ឆ្នាំនេះសម្រាប់សហរដ្ឋអាមេរិកផ្លាស់ប្តូរ «គោលនយោបាយគ្រោះថ្នាក់» របស់ខ្លួន ប្រសិនបើចង់បង្កើតកិច្ចពិភាក្សាណាផ្សេងទៀតជាមួយខ្លួន។
ឲ្យពិតទៅ មេដឹកនាំកូរ៉េខាងជើង គីម ជុងអ៊ុន និងប្រធានាធិបតីអាមេរិក ដូនាល់ ត្រាំ បានជួបគ្នា៣លើកហើយ ចាប់តាំងពីខែមិថុនា ឆ្នាំ២០១៨ ក៏ប៉ុន្តែវាពុំសូវមានវឌ្ឍនភាពជាខ្លឹមសាររណាមួយក្នុងកិច្ចសន្ទានានេះ ខណៈក្រុងព្យុងយ៉ាងទាមទារឲ្យដកហូតទណ្ឌកម្មអន្តរជាតិប្រឆាំងខ្លួនជាមុនសិន។ ម្យ៉ាងវិញទៀត ក្រុងព្យុងយ៉ាង គំរាមជូនអំណោយណូអែលដល់សហរដ្ឋអាមេរិក ប្រសិនបើក្រុងវ៉ាស៊ីនតោនមិនផ្តល់ការបន្ធូរបន្ថយការដាក់ទណ្ឌកម្មលើខ្លួនទេនោះ។
ក្រៅពីបញ្ហានៅឧបទ្វីបកូរ៉េ ចិន ក៏ដើរតួនាទីសំខាន់ផងដែរក្នុងការសម្របសម្រួលរវាងមេដឹកនាំជប៉ុននិងកូរ៉េខាងត្បូង ដោយព្យាយាមបង្កើតការស្រុះស្រួលគ្នាមួយរវាងប្រទេសក្នុងតំបន់អាស៊ីបូព៌ាទាំងពីរនេះ។ ជំនួបត្រីភាគីនេះ ក៏ជាជំនួបទល់មុខគ្នាលើកទីមួយរវាងលោកនាយករដ្ឋមន្ត្រី ស៊ិនហ្សូ អាបេ និងប្រធានាធិបតីកូរ៉េខាងត្បូង មូន ចេអ៊ីន ក្នុងពេល១៥ខែចុងក្រោយ។ ចំណងទាក់ទងរវាងក្រុងសេអ៊ូល និងក្រុងតូក្យូ បានកើនឡើងកម្តៅខ្លាំងក្នុងពេលប៉ុន្មានខែចុងក្រោយនេះ ជុំវិញបញ្ហាពាណិជ្ជកម្ម និងទំនាស់ផ្សេងទៀតពាក់ព័ន្ធរឿងប្រវត្តិសាស្ត្រ។
លោកនាយករដ្ឋមន្ត្រីចិន លី ខឹឈាំង ទទួលស្គាល់ពីភាពតានតឹងតានរវាងជប៉ុន និងកូរ៉េខាងត្បូង ក៏ប៉ុន្តែអះអាងថា បញ្ហានេះពុំបង្កឲ្យការតាំងចិត្តរបស់ចិនចំពោះទីផ្សារសេរី និងពាណិជ្ជកម្មសេរី ប្រែប្រួលនោះឡើយ។ ត្រង់នេះ លោក លី គូសបញ្ជាក់ថា ប្រទេសចិន អញ្ជើញសហគ្រាសកូរ៉ខាងត្បូងនិងជប៉ុនឲ្យទទួលកាលានុវត្តភាពដ៏ធំក្នុងវិស័យធុរកិច្ច និងទទួលជោគជ័យព្រមគ្នា។ ចំណែកលោក មូន ចេអ៊ីន សង្កត់ធ្ងន់ថា ការផ្លាស់ប្តូរផ្នែកឧស្សាហកម្ម បម្រែបម្រួលអាកាសធាតុ និងកិច្ចគាំពារនិយមពាណិជ្ជកម្ម តម្រូវឲ្យប្រទេសទាំងបីពង្រឹងកិច្ចសហប្រតិបត្តិការកាន់តែខ្លាំង៕