ពីនេះ ពីនោះ
ព័ត៍មានសុខភាព
×![]()
ដោយ: ថ្មីៗ
ចង់ឱ្យបបូរមាត់ទន់រលោងស្អាតមិនពិបាកឡើយ! ក៏ព្រោះគន្លឹះធម្មជាតិមួយចំនួនអាចជួយអ្នកបានយ៉ាងប្រសើរ។ ថាតើធ្វើយ៉ាងណាទើបអាចរក្សាបាននូវបបូរមាត់ទន់រលោង? 
ថ្ងៃនេះយើង នឹងបង្ហាញឱ្យដឹងពីគន្លឹះងាយៗជួយឱ្យបបូរមាត់ទន់រលោង ៖
១. ប្រទាលកន្ទុយក្រពើ
អ្វីដែលអ្នកត្រូវធ្វើ គឺគ្រាន់តែលាបសាច់ ឬជែលប្រទាលកន្ទុយក្រពើលើបបូរមាត់និងទុកចោលសម្រាប់រយៈពេលមួយយប់។ បន្ទាប់មកសឹមលាងសម្អាតចេញជាមួយទឹកធម្មតានៅព្រឹកបន្ទាប់។
២. កាកាវនិងសូកូឡា
អ្វីដែលអ្នកត្រូវការ គឺបឺរកាកាវ ១ ស្លាបព្រាកាហ្វ វីតាមីន E ១ គ្រាប់ និងសូកូឡាខ្មៅ ២ ដុំ។ អ្វីដែលអ្នកត្រូវធ្វើ គឺរំលាយបឺរកាកាវនិងសូកូឡា បន្ទាប់មកលាយប្រេងវីតាមីន E ចូល។ ទុកឱ្យត្រជាក់ សឹមលាបលើបបូរមាត់និងទុកចោលសម្រាប់រយៈពេលពី ១០ ទៅ ១៥ នាទី។ លាងសម្អាតចេញជាមួយទឹកក្ដៅឧណ្ហៗ។
៣. ប្រេងដូង
អ្វីដែលអ្នកត្រូវធ្វើ គឺគ្រាន់តែលាបប្រេងដូងបន្តិចលើបបូរមាត់ជាការស្រេច។ អ្នកក៏អាចលាយប្រេងដើមតែ ២ ដំណក់ក្នុងប្រេងដូងមុននឹងលាបលើបបូរមាត់។ លាងសម្អាតចេញនៅរយៈពេលពី ២ ទៅ ៣ នាទីក្រោយ ឬទុកចោលមួយយប់។
៤. ស្ករសនិងប្រេងអូលីវ
លាយប្រេងអូលីវ ១ ស្លាបព្រាបាយជាមួយស្ករសបន្តិចរហូតក្លាយជាល្បាយខាប់ៗ។ ដុសលាបល្បាយលើបបូរមាត់ក្នុងចលនាបែបរង្វង់ថ្នមៗសម្រាប់រយៈពេលពី ២ ទៅ ៣ នាទី សឹមប្រើក្រណាត់ស្អាតជូតចេញជាការស្រេច។
៥. ស្ករនិងទឹកឃ្មុំ
អ្វីដែលអ្នកត្រូវធ្វើ គឺគ្រាន់តែលាយស្ករស ២ ស្លាបព្រាកាហ្វេជាមួយទឹកឃ្មុំ ១ ស្លាបព្រាកាហ្វេ។ កូរឲ្យសព្វ សឹមលាបដុសល្បាយថ្នមៗលើបបូរមាត់ ហើយលាងសម្អាតចេញជាមួយទឹកក្ដៅឧណ្ហៗ៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com
