លោក ត្រាំ ឌឺ លោក គីម ជុំវិញអំណោយថ្ងៃបុណ្យណូអែល

អន្តរជាតិ

លោក ត្រាំ ឌឺ លោក គីម ជុំវិញអំណោយថ្ងៃបុណ្យណូអែល

25, Dec 2019 , 2:11 pm

រូបភាព

លោកប្រធានាធិបតីអាមេរិក ដូណាល់ ត្រាំ។ រូបភាព៖ Reuters

ដោយ: ធៀន ភារិន្ទ

ប្រធានាធិបតីអាមេរិក ដូណាល់ ត្រាំ នៅថ្ងៃទី២៤ ខែធ្នូ បានឌឺដង ដាក់មេដឹកនាំកូរ៉េខាងជើង គីម ជុងអ៊ុន ជុំវិញបញ្ហាអំណោយថ្ងៃបុណ្យណូអែល។ បើតាមលោក ដូណាល់ ត្រាំ អាមេរិក នឹងចាំមើលថាតើមានរឿងអ្វីកើតឡើង ហើយអាមេរិក នឹងដោះស្រាយបញ្ហានេះ ឲ្យបានជោគជ័យ។ អ្វីដែលគេរំពឹង គឺកូរ៉េខាងជើង អាចសាកល្បងមីស៊ីលបាលីស្ទិកចម្ងាយឆ្ងាយ។

ប្រាប់អ្នកកាសែតនាកន្លែងសម្រាកលំហែកាយ Mar-a-Lago លោក ដូណាល់ ត្រាំ ប្រធានាធិបតីអាមេរិក បានលើកឡើងយ៉ាងដូច្នេះថា៖ « យើងនឹងរង់ចាំមើល ថាតើមានអ្វីដែលភ្ញាក់ផ្អើលកើតឡើង ហើយយើងនឹងដោះស្រាយវាឲ្យបានជោគជ័យ»។ ការលើកឡើងរបស់លោក ដូណាល់ ត្រាំ ចំៗបែបនេះ គឺដើម្បីឌឺដងដាក់កូរ៉េខាងជើង ដែលបានព្រមានថា ខ្លួននឹងផ្តល់ការដូដ៏សាកសមនៅថ្ងៃបុណ្យណូអែល តាមអ្វីដែលអាមេរិកចង់បាន។

ជាមួយគ្នានេះ លោក ត្រាំ បានបន្តទៀតថា អាមេរិកជឿថា វា គឺជាអំណោយដ៏ល្អមួយ ដែលទីក្រុងព្យុងយ៉ាងចង់ឲ្យ ហើយសង្ឃឹមថា ទីក្រុងព្យុងយ៉ាង នឹងមិនផ្តល់អំណោយជាការសាកល្បងមីស៊ីលទៅចុះ។ យ៉ាងណាក៏ដោយ គេមិនទាន់ដឹងច្បាស់នៅឡើយទេ ថាកាដូបុណ្យណូអែលរបស់កូរ៉េខាងជើង គឺជាអ្វីទេ។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។

ពាក់ព័ន្ធនឹងបញ្ហានេះ មេដឹកនាំកូរ៉េខាងជើង បានជំរុញឲ្យអាមេរិក ផ្លាស់ប្តូររបៀបវារៈចរចារំសាយកម្មវិធីនុយក្លេអ៊ែរចេញ ដើម្បីផ្តល់សម្បទានដល់កូរ៉េខាងជើងឲ្យច្រើនជាងមុន។ កូរ៉េខាងជើងព្រមានថា បើអាមេរិក មិនផ្លាស់ប្តូររបៀបវារៈចេញទេ ទីក្រុងព្យុងយ៉ាង នឹងផ្តល់អំណោយដ៏សក្តិសម។ តាមកត់សម្គាល់ពីអ្នកជំនាញ ក៏ដូចជាមេបញ្ជាការយោធាអាមេរិក កូរ៉េខាងជើងទំនងជាសាកល្បងមីស៊ីលបាលីស្ទីកចម្ងាយឆ្ងាយ។ ប៉ុន្តែគេត្រូវរង់ចាំមើលសិនថាតើ កូរ៉េខាងជើងពិតជាសាកល្បងមីស៊ីលមែនឬអត់ ហើយជាប្រភេទអ្វី។

ថ្មីៗនេះ លោក គីម បានដឹកនាំកិច្ចប្រជុំយោធាជាន់ខ្ពស់ដើម្បីពង្រឹងសមត្ថភាពកងទ័ព និងជជែកលើបញ្ហាសំខាន់ទាំងក្នុងស្រុក និងក្រៅស្រុក។ ខណៈពេលសល់ប៉ុន្មានថ្ងៃទៀត បក្សពលករកូរ៉េ នឹងបើកកិច្ចប្រជុំរបស់ខ្លួនដើម្បីពិភាក្សាពីបញ្ហានានា និងដាក់ទិសដៅឆ្នាំថ្មី។ អ្វីដែលគេរំពឹងនោះ គឺកូរ៉េខាងជើងអាចប្រកាសបញ្ចប់ការផ្អាកការសាកល្បងនុយក្លេអ៊ែររបស់ខ្លួនផងដែរ៕