ជាតិ
ក្រោយគ្មានតម្លៃទីផ្សារ លោក សុភ័ក្រ ប្រាប់ឱ្យពលរដ្ឋ ទៅប្រមូលយកស្ពៃជើងទារបស់ខ្លួន ដោយឥតគិតថ្លៃ ចម្ការស្ពៃជើងទា (រូបភាពពីទំព័រហ្វេសប៊ុករបស់ លោក សុភ័ក្រ)
× ភ្នំពេញ៖ លោក អ៊ឹម សុភ័ក្រ ជាកសិករដាំស្ពៃជើងទា នៅភូមិតាគ្រក់ ឃុំត្រែង ស្រុករតនមណ្ឌល ខេត្តបាត់ដំបង ប្រកាសចែកស្ពៃជើងទាជាង១០តោន ឲ្យពលរដ្ឋដែលមានបំណងចង់បាន ដោយឥតគិតថ្លៃ ចាប់ថ្ងៃទី២៥ ដល់២៧ ធ្នូ ឆ្នាំ២០១៩។ លោក សុភ័ក្រ ប្រកាសចែកស្ពៃនេះ ដោយសារតែតម្លៃទាបពេក ហើយមិនសូវមានអ្នកទិញ ។
កសិករវ័យ៤០ឆ្នាំរូបនេះ បានដាំស្ពៃជើងទាលើផ្ទៃដី២ហិកតា ដែលទទួលបានផលប្រមាណជិត៥០តោន ។ លោកបានកាត់ស្ពៃជើងទាលក់អស់មួយចំនួនធំ ក្នុងតម្លៃ៤០០ទៅ៥០០រៀល នៅអំឡុងថ្ងៃទី១០ដល់ថ្ងៃទី២០ ធ្នូ នេះ។ លុះដល់ថ្ងៃ២៥ ធ្នូនេះ លោក សុភ័ក្រ បានសម្រេចចិត្តចែកស្ពៃដែលនៅសល់ជាង១០តោន ឲ្យពលរដ្ឋមកកាត់យកដោយខ្លួនឯង។ ហើយបើគ្មានអ្នកយកស្ពៃទាំងនេះទេ លោក សុភ័ក្រ នឹងភ្ជួរ(ឈូសឆាយ)ស្ពៃចោល ក្រោយថ្ងៃទី២៧ ធ្នូ ព្រោះវាដល់អាយុកាល ដូច្នេះបើមិនភ្ជួរចោល វាក៏រលួយដែរ។
«ខ្ញុំមិនចង់លក់ស្ពៃទាំងនេះទេ ដោយសារតម្លៃទាបពេកត្រឹម៣០០រៀល ហើយអ្នកទិញ ទិញចំនួនតិចៗ (ទិញយកទៅបរិភោគ ឬលក់ខ្លះ) មិនមែនម៉ៅទិញទាំងអស់ផង។ អ៊ីចឹង ខ្ញុំសម្រេចចិត្តឲ្យពលរដ្ឋនៅក្នុងស្រុកដែលចង់បានមកកាត់យក»។ នេះបើតាមការអះអាងរបស់លោក សុភ័ក្រ ប្រាប់សារព័ត៌មានថ្មីៗតាមទូរស័ព្ទ នៅថ្ងៃទី២៥ ធ្នូ ឆ្នាំ២០១៩។
សូមបញ្ជាក់ថា កាលពីពេលថ្មីៗនេះ កសិកររូបនេះ បានអំពាវនាវឲ្យស្ថាប័នពាក់ព័ន្ធ ជួយដោះស្រាយនិងរកទីផ្សារសម្រាប់គាត់ ខណៈស្ពៃជាច្រើនតោនកំពុងប្រឈមមុខនឹងការខូចខាត ដោយសារគ្មានអ្នកបញ្ជាទិញ។ ក្រោយការអំពាវនាវនេះ មន្ទីរកសិកម្មខេត្តបាត់ដំបង និងប្រធានកសិកម្មស្រុករតនមណ្ឌល បានចុះទៅពិនិត្យ និងណែនាំដល់ លោក សុភ័ក្រ អំពីផែនការនៃការដាំដុះ។
«មន្ទីរកសិកម្មបានចុះមើល ស្ពៃដែលបានដាំដុះលើដីខ្ញុំ ហើយថាមន្ទីរក៏មិនដឹងធ្វើយ៉ាងដែរ ព្រោះស្ពៃដល់ពេលកាត់ហើយ។ មន្ទីរថា នឹងជួយរកទីផ្សារឲ្យ ហើយពេលហ្នឹង ខ្ញុំក៏សុំឲ្យមន្ទីរជួយបង្រៀនពីបច្ចេកទេសនៃដាំបន្លែនិងប្រើប្រាស់ថ្នាំផងដែរ»។ នេះជាលើកឡើងរបស់លោក សុភ័ក្រ ដោយបន្ថែមថា ខាងមន្ទីរសន្យានឹងចុះមកណែនាំពីគម្រោង «អេម» ដល់ពលរដ្ឋនៅភូមិគីឡូ៣៨ ឃុំត្រែង ដែលលោករស់នៅ ឲ្យមានផែនការក្នុងការដាំដុះក្នុងវិស័យកសិកម្ម នៅថ្ងៃទី៣០ ធ្នូនេះ ៕
© រក្សាសិទ្ធិដោយ thmeythmey.com