ជាតិ
ក្រសួងដែនដី៖ កម្ពុជានាំមុខនៅអាស៊ីលើការចុះបញ្ជីដីសហគមន៍ជនជាតិដើមភាគតិច ផ្ទះជនជាតិដើមភាគតិចគ្រឹង នៅភូមិល្អក់ ឃុំល្អក់ ស្រុកអូរជុំ ខេត្តរតនគិរី
× ភ្នំពេញ៖ កម្ពុជា ឈរលំដាប់ថ្នាក់លេខ១ នៅតំបន់អាស៊ី លើការចុះបញ្ជីដីសហគមន៍ជនជាតិដើមភាគតិច ក្នុងគោលដៅរក្សាការពារវប្បធម៌ ប្រពៃណី និង ទំនៀមទម្លាប់ល្អរបស់ជនជាតិដើមភាគតិច។ នេះបើតាមសេចក្តីប្រកាសព័ត៌មានរបស់ក្រសួងរៀបចំដែនដី នគរូបនីយកម្ម និង សំណង់ ដែលចេញផ្សាយក្រោយបញ្ចប់សន្និបាតប្រចាំឆ្នាំរបស់ខ្លួន នៅថ្ងៃទី២៥ ខែធ្នូ ឆ្នាំ២០១៩។
តាមរយៈសេចក្តីប្រកាសព័ត៌មាន ក្រសួងដែនដី បានប្តេជ្ញាថា នឹងបន្តចុះបញ្ជីដីសហគមន៍ជនជាតិដើមភាគតិចឲ្យបានយ៉ាងតិច១០សហគមន៍ ក្នុងមួយឆ្នាំ។ ក្រសួង អះអាងថា មកដល់បច្ចុប្បន្ន ដីសហគមន៍ជនជាតិដើមភាគតិច៣០ហើយ ដែលមានជាង៣ពាន់គ្រួសារ និងមានទំហំជាង២,៨ម៉ឺនហិកតា ទទួលបានការចុះបញ្ជី។
ក្រៅពីការចុះបញ្ជីដីសហគមន៍ជនជាតិភាគតិច ក្រសួង ក៏បានបង្ហាញពីការចុះបញ្ជីដីធ្លីជូនប្រជាពលរដ្ឋទូទៅផងដែរ។ ក្រសួង កំណត់ថា នឹងចុះបញ្ជីដីធ្លីឲ្យបាន៩៤ភាគរយ នៅឆ្នាំ២០២០ និងឈានសម្រេចបាន១០០ភាគរយនៅឆ្នាំ២០២១ នៃក្បាលដីសរុបប្រមាណ៧លានក្បាលដី។ ក្នុងចំណោម៧លានក្បាលដីនោះ ក្រសួង ចុះបញ្ជីបានជាង៨០ភាគរយហើយ។
ជាមួយគ្នានេះ នៅឆ្នាំ២០២០ ក្រសួង មានទិសដៅពន្លឿនការដោះស្រាយវិវាទដីធ្លីដែលនៅសេសសល់ ដើម្បីធានាភាពសុខដុមរមនាក្នុងសង្គម។ គិតត្រឹមចុងឆ្នាំ២០១៩នេះ ក្រសួង ទទួលពាក្យបណ្ដឹងជាង១,២ម៉ឺនករណី ដោយក្នុងនោះ បានដោះស្រាយរួចរាល់ជាង១ម៉ឺនករណី និងកំពុងបន្តដោះស្រាយជាង២,៤ពាន់ករណី។
លើសពីនេះ ក្រសួង មានទិសដៅបន្តអនុវត្តកម្មវិធីសម្បទានដីសង្គមកិច្ច ដើម្បីចែកដីដល់ពលរដ្ឋដែលខ្វះខាតដី ឲ្យបានយ៉ាងតិច៥០០គ្រួសារ ក្នុងមួយឆ្នាំ ហើយបន្តចែកដីនិងផ្ទះ ដល់គ្រួសារកងកម្លាំង ដែលកំពុងឈរជើងនៅព្រំដែន ឲ្យបានយ៉ាងតិច៥០០ខ្នង ក្នុងមួយឆ្នាំ។ បច្ចុប្បន្ន ក្រសួង បានចែកដីជាង១,៣លានហិកតា និងផ្ទះជាង៧ពាន់ខ្នងហើយ ដល់កងកម្លាំង និងពលរដ្ឋទូទៅជាង៤,៨សែនគ្រួសារ៕
Tag:
ចុះបញ្ជីដីធ្លី
ជនជាតិដើមភាគតិច
© រក្សាសិទ្ធិដោយ thmeythmey.com