ជាតិ
នាយករដ្ឋមន្ត្រីកម្ពុជា ៖ ជំនួបចិន ជប៉ុន និងកូរ៉េខាងត្បូង នឹងកាត់បន្ថយភាពតានតឹងពាណិជ្ជកម្មជាមួយអាមេរិក
× ភ្នំពេញ៖ ជំនួបមេដឹកនាំចិន ជប៉ុន និងកូរ៉េខាងត្បូង នឹងបន្ធូរបន្ថយភាពតានតឹងពាណិជ្ជកម្មរវាងអាមេរិក និងពិភពលោក។ នេះជាការយល់ឃើញរបស់នាយករដ្ឋមន្ត្រីកម្ពុជា ដែលបានថ្លែងនៅក្នុងពិធីចែកសញ្ញាបត្រដល់និស្សិតសាកលវិទ្យាល័យភូមិន្ទនីតិសាស្ត្រ និងសេដ្ឋកិច្ច នៅព្រឹកថ្ងៃទី២៦ ធ្នូ។
សម្ដេច ហ៊ុន សែន យល់ឃើញថា ជំនួបរបស់មេដឹកនាំទាំង៣នេះ នឹងជះឥទ្ធិពលវិជ្ជមាន សម្រាប់សេដ្ឋកិច្ចក្នុងតំបន់ និងពិភពលោក។ «បើបីនាក់ហ្នឹងត្រូវរ៉ូវគ្នា ដែលអនុវត្តនូវពហភាគីនិយមបន្ត ក៏បានកាត់បន្ថយការលំបាកសង្គ្រាមពាណិជ្ជកម្មរវាងសហរដ្ឋអាមេរិកជាមួយនឹងចិន និងរវាងសហរដ្ឋអាមេរិកជាមួយប្រទេសមួយចំនួនផ្សេងទៀត។ អ៊ីចឹងបើស្ថានភាពទំនាក់ទំនងដៃគូទាំង៣នេះល្អ គឺវាក៏ល្អប្រសើរ មិនមែនតែប្រទេសទាំង៣នោះទេ ប៉ុន្តែសម្រាប់តំបន់យើងតែម្ដង»។ នេះជាការលើកឡើងរបស់សម្ដេច ហ៊ុន សែន ដែលបានបន្ថែមថា ជំនួបមេដឹកនាំទាំង៣ ជាព័ត៌មានល្អចុងឆ្នាំ២០១៩នេះ។
សូមស្ដាប់សំឡេងនាយករដ្ឋមន្ត្រី៖
កាលពីថ្ងៃទី២៤ ធ្នូ លោកនាយករដ្ឋមន្ត្រីចិន លី ខឺឈាំង លោកនាយករដ្ឋមន្ត្រីជប៉ុន ស៊ិនហ្សូ អាបេ និងប្រធានាធិបតីសាធារណរដ្ឋកូរ៉េ មូន ចេអ៊ីន បានជួបប្រជុំគ្នានៅទីក្រុង Chengdu នៃប្រទេសចិន។ មេដឹកនាំទាំង៣ បានរំឮកការតាំងចិត្តក្នុងការបញ្ចប់កម្មវិធីមីស៊ីល និងនុយក្លេអ៊ែររបស់កូរ៉េខាងជើង ដោយព្រមជួយជំរុញកិច្ចសន្ទនារវាងក្រុងវ៉ាស៊ីនតោន និងព្យុងយ៉ាង។ កិច្ចសហប្រតិបត្តិការសេដ្ឋកិច្ចនិងពាណិជ្ជកម្ម ក៏នៅក្នុងជំនួបនេះដែរ៕
Tag:
ហ៊ុន សែន
ស៊ី ជិនភីង
ស៊ិន ហ្ស៊ូអាបេ
មូន ចេអ៊ីន
ដូណាល់ ត្រាំ
© រក្សាសិទ្ធិដោយ thmeythmey.com